الماتىدا 1 قىركۇيەكتە سەگىز جاڭا مەكتەپ اشىلدى
بيىلعى وقۋ جىلىندا الماتىدا ءبىرىنشى سىنىپقا 32 مىڭعا جۋىق بالا باردى. قالا مەكتەپتەرىندە بارلىعى 317 مىڭ وقۋشى ءبىلىم الاتىن بولادى. بيىل باستاۋىش سىنىپ وقۋشىلارى تەگىن ىستىق تاماقپەن قامتاماسىز ەتىلەدى.
قالا اكىمدىگىنىڭ باسپا ءسوز قىزمەتى تاراتقان مالىمەتتەرگە قاراعاندا، ءبىلىم كۇنى بىردەن سەگىز جاڭا مەكتەپ ەسىگىن ايقارا اشتى، ولاردىڭ تورتەۋى – مەملەكەتتىك. بۇل وقۋ ورىندارى مادەنيەت، قالقامان، سايالى، توميريس شاعىناۋداندارىندا ورنالاسقان جانە 6600 ورىنعا ەسەپتەلگەن. قالعان ءتورت مەكتەپ (1470 ورىن) جەكە ينۆەستيسيا ەسەبىنەن سالىندى. سونداي-اق، بۇگىندە №191، 146، 125 مەكتەپتەرگە جاپسارلاس قۇرىلىس جۇمىستارى اياقتالدى، بۇل وقۋشىلار سانىن 875 ورىنعا ۇلعايتۋعا مۇمكىندىك بەردى.
بيىلعى وقۋ جىلىنان باستاپ الماتى مەكتەپتەرى ءبىر نەمەسە ەكى اۋىسىممەن ءبىلىم الۋعا تولىق كوشەدى. مادەنيەت شاعىناۋدانىندا اشىلعان 1500 ورىندىق مەكتەپ قالاداعى جالعىز ءۇش اۋىسىمدى مەكتەپ ماسەلەسىن شەشۋگە مۇمكىندىك بەردى. قالادا بارلىعى 210 مەملەكەتتىك جانە 91 جەكەمەنشىك مەكتەپ جۇمىس ىستەيدى.
«جىل سوڭىنا دەيىن بەس مەملەكەتتىك جانە ەكى جەكەمەنشىك مەكتەپتى پايدالانۋعا بەرۋ، سونداي-اق جۇمىس ىستەپ تۇرعان وقۋ ورىندارىنىڭ جانىنداعى ءۇش قوسالقى نىساننىڭ قۇرىلىسىن اياقتاۋ جوسپارلانىپ وتىر»، - دەلىنگەن حابارلامادا.
You Might Also Like
-
مەكتەپ پەن كوللەدجدەردە ديرەكتورلاردىڭ تاپشىلىعى بايقالىپ وتىر. بۇل تۋرالى پەداگوگتەردىڭ رەسپۋبليكالىق تامىز كونفەرەنسياسىندا وقۋ-اعارتۋ ءمينيسترى اسحات ايماعامبەتوۆ ايتتى.
-
«پەداگوگ» كاسىبي ستاندارتى ەنگىزىلەدى. بۇل تۋرالى ۇكىمەت وتىرىسىندا ق ر وقۋ-اعارتۋ ءمينيسترى اسحات ايماعامبەتوۆ ايتتى.
