InfoHub Logo

ءوز جولىنا ءتۇسىپ الىپ سۇرلەۋ سوقپاعىمەن كىپ-كىشكەنتاي قۇمىرسقا كەلە جاتىر ەدى، كەنەت الدىنان پەندە شىعا كەلدى. پەندە قۇمىرسقانى ءبىر-اق مىجىپ ولتىرە سالسام با ەكەن دەپ ويلادى. سول ويمەن پەندەنىڭ ءداپ-داۋ باتەڭكە كيگەن اياعى كوتەرىلىپ كەلە جاتىر ەدى، وسى كەزدە قۇمىرسقا:

- ەي، پەندە، تۇرا تۇر! ايتاتىنىم بار، - دەدى.

- نە ايتايىن دەپ ەدىڭ؟ - دەدى پەندە قۇمىرسقاعا سايقىمازاق داۋىسپەن. ءسويتتى دە، ءوزى جۇرەسىنەن وتىرا قالدى: - ال ايت، ايتاتىنىڭدى! ايتپەسە، مىجي سالام!

- جاقسىلىق جاسا، - دەدى قۇمىرسقا.

پەندە قۇمىرسقانىڭ سوزىنە كۇيىپ-پىستى:

- سول ما ايتايىن دەگەنىڭ؟! سول دا جاڭالىعى بار ءسوز بە؟!

- جاقسىلىق جاساساڭ، وزىڭە پايداسى تيەدى، - دەدى قۇمىرسقا.

- ساۋابى تيەدى دەسەيشى، - دەدى پەندە مىرس ەتىپ. - سونى مەن بىلمەيدى دەپ ويلايسىڭ با؟!

- ونى ايتىپ تۇرعان جوقپىن، - دەدى قۇمىرسقا. - جاقسىلىق جاساساڭ، ءاميانىڭناڭ ءبىر ءتۇيىر التىن تەڭگە تاۋىپ الاسىڭ.

پەندە قۇمىرسقانىڭ سوزىنە ىشەك-سىلەسى قاتىپ كۇلدى:

- كىپ-كىشكەنتاي بولىپ الىپ سەن دە مەنى الداعىڭ كەلەدى، ءيا؟ سەنىمەن سويلەسىپ وتىرعان مەن دە اقىماق. مەن سەن تۇگىلى، ءوزىم سياقتى پەندەدەن الدانبايمىن عوي.

- سەنبەسەڭ، سىناپ كور، - دەدى قۇمىرسقا. - ءبىراق سول ءبىر ءتۇيىر التىن تەڭگەنى قاناعات ەت.

ءسويتتى دە، قۇمىرسقا پەندەنى اينالىپ ءوتىپ، ءوزىنىڭ جولىنا ءتۇسىپ جۇرە بەردى.

پەندە سول كۇنى جاقسىلىق جاسادى. ءبىراق ۇيىنە كەلە جاتىپ: "قايداعى ءبىر قۇمىرسقانىڭ سوزىنە سەنىپ، التىن ۋاقىتىمدى بوسقا كەتىرگەنىمدى ايتسايشى. ودان دا سول ۋاقىتىمدى وزىمە پايداسىن تيگىزەر ءبىر ىسكە جۇمساسام نەتتى؟" - دەپ وكىنىپ كەلە جاتتى.

پەندە كەشكىسىن ءاميانىن اشىپ قالىپ ەدى، ىشىندە جارقىراپ جاتقان ءبىر ءتۇيىر التىن تەڭگەنى كورىپ قۋانىپ كەتتى. "التىن تەڭگە تاۋىپ الدىم! - دەپ ايعاي سالدى پەندە. - بۇل ەندى مەنىكى! مەنىڭ اقشام!

سونان سوڭ پەندەنىڭ كوڭىل-كۇيى ءتۇسىپ كەتتى. باعاناعى قۇمىرسقانىڭ "سونى دا قاناعات تۇت" دەگەن ءسوزىن تارس ەسىنەن شىعارىپ: "نەگە التىن تەڭگە بىرەۋ-اق؟ مەن بۇگىن ەكى ادامعا جاقسىلىق جاساپ ەدىم عوي"، - دەپ تومسىرايىپ وكپەلەپ وتىردى.

---