InfoHub Logo

بوكەننىڭ ءبىر مىنەزى كىمنىڭ جانىنا جاقىن جۇرسەم، ابىرويدى كوبىرەك جينايمىن، كىمنىڭ جانىندا كوبىرەك سويلەسىپ تۇرسام، ابىرويلى كورىنىپ تۇرامىن، كىممەن بايلانىس ورناتسام، ابىرويىم اسقاقتاي تۇسەدى دەپ ءجۇرۋشى ەدى. كەيدە وسى ادام بالاسىن الالاعانداي بولعانىم نەسى دەپ بوكەن وز-وزىنە ىشتەي رەنجىسە دە، بالا كەزدەن قالىپتاسىپ كەتكەن وسى ادەتىن قويا المادى.

بوكەن ءدال ءقازىر كلۋبقا كونسەرتكە كەلىپ تۇر. ءبىراق كونسەرتكە كىرمەستەن بۇرىن كلۋبتىڭ ەسىگىنەن سىعالاپ، كىمنىڭ جانىندا وتىرسام، ابىرويدى كوبىرەك جينايمىن دەپ ويلانىپ تۇر. كوپشىلىك جينالا باستاسا دا، كونسەرت ءالى باستالا قويماعان كەز. بوكەن سوندىقتان اسىقپاي ويلانىپ تۇر. كوزى الدىمەن الدىڭعى ورىندىقتا وتىرعان نۇكەڭە ءتۇستى. نۇكەڭ - ەل اعاسى بولىپ جۇرگەن ازامات. نۇكەڭنىڭ جانىندا وتىرعاننان ابىرويسىز بولا قويماس ەدى. ءبىراق نۇكەڭنىڭ ءوزى "ءاي، بوكەن، بەرى كەل، مەنىڭ جانىما وتىر" دەپ شاقىرىپ جاتپاعاسىن، نۇكەڭدەي ادامداردىڭ جانىنا بارىپ، ءاي جوق، ءشاي جوق، جايعاسا كەتكەنى ابىروي بولا قويار ما ەكەن؟ مۇندايدا نۇكەڭ نە ويلايدى، قاراپ وتىرعان سىرت جۇرت نە ويلايدى؟ جوق، وتىرا الماس. نۇكەڭدەي كىسىلەرگە جاقىنداۋ ءجۇرۋدىڭ دە ءبىر ىڭعايى كەلەر. بوكەن وسىلاي ويلانىپ تۇرىپ، كوزىمەن بالۋان جىگىت سەيتەكتى دە، دارىگەر جىگىت قاپاردى دا، ساتۋشى كەربەز كەلىنشەك اقبىلەكتى دە، كىشىلەرگە ۇنەمى ءتالىم ايتىپ جۇرەتىن قۇرمەتتى دەمالىستاعى زەينەتكەر ساليحا اپايدى دا، ءمۇعالىم جىگىت زەينەلدى دە، وزىمەن قۇرداس ەسەپشى حاليدوللانى دا ءبىر-بىر شولىپ ءوتتى. ءبارىنىڭ دە جانىندا وتىرعاننان ابىرويسىز بولا قويماس ەدى.

بوكەننىڭ كوزى كەنەت الۋاعا تۇسە كەتتى. الۋا دەسە، الۋا. الۋا - سۇپ-سۇيكىمدى اپ-ادەمى قىز. الۋانىڭ جانىندا وتىرعاننان ابىرويسىز بولماس ەدى. بوكەن ەندى وسى كونسەرتتەن كەيىن الۋامەن كوشە بويلاپ قىدىرىپ بارا جاتقان ءساتىن كوز الدىنا ەلەستەتتى. ەكەۋى ءبىر شوق تالدىڭ تۇبىنە ايالداپتى. بوكەن قيالىمەن الۋانىڭ بىلەگىنەن ۇستاپ وزىنە قاراي يكەمدەي بەرگەنى سول ەدى، وسى كەزدە بىرەۋ بوكەندى قۇيرىعىنان تىزەسىمەن ىڭق ەتكىزىپ ءبىر تەپكەنى. اڭداۋسىز تۇرعان بوكەن ەتپەتىنەن جىعىلا جازدادى. ارتىنا جالت بۇرىلىپ قاراعاندا جۇرت "جىندى جۇماحان" دەپ اتاپ كەتكەن جىگىتتى كوردى.

- نە ىستەپ تۇرسىڭ؟! - دەدى جۇماحان بوكەنگە ءتۇسىن سۋىتا قاراپ. - تاعى دا سول كىمنىڭ جانىندا وتىرسام، ابىرويدى كوبىرەك جينايمىن دەپ ىشكى ەسەبىڭدى قۇرىپ تۇرسىڭ با؟!

جۇماحان بوكەندى شەڭگەلدەي ءتۇستى.

- قوي دەيمىن، جۇما! قوي! كويلەگىمدى جىرتاسىڭ، جۇما!

جۇماحان وعان قاراعان جوق.

- ءجۇر! بۇگىن كونسەرتتە مەنىڭ جانىما وتىراسىڭ! - دەدى جۇماحان.

ءسويتتى دە، بوكەندى ىشكە قاراي دىرىلداتىپ سۇيرەي جونەلدى.

- قويا بەر دەيمىن، جۇما! ابىرويىمدى توگەسىڭ!

- سەنىڭ ءبۇيتىپ اركىمگە كوزىڭدى ساتىپ ءجۇرىپ جيناعان ابىرويىڭدى ۇرعانىم! - دەدى جۇماحان.

بوكەنگە ەندى تەك جۇرتتىڭ كوزىنشە جۇماحانمەن ازىلدەسىپ كەلە جاتقانداي كورىنىپ، جۇماحاننىڭ بەتىنە قاراپ ىرجالاقتاي بەرۋدەن باسقا شاراسى قالمادى. ءبىراق ەكى اياعى دەدەكتەپ كەلە جاتتى.

جۇماحان سول كۇيى كلۋبتىڭ ارتقى ورىندىعىنا بەتتەدى. اۋەلى ورىندىققا ءوزى جايعاستى دا، جانىنا بوكەندى ءبىر-اق تارتىپ سىلق ەتكىزدى.

بوكەن سول كۇنى جۇماحاننىڭ جانىندا وتىرىپ كونسەرت كورىپ شىقتى. وز-وزىنە ءبىر ءتۇرلى كوڭىلى تولىڭقىراماي وتىردى.

---