InfoHub Logo

(مەكتەپ شاكىرتى ءۇشىن جازىلعان)

ول قازاق دالاسىنىڭ شالقار كوگىندە كۇمبەز بولىپ كوتەرىلگەن ەدى. ايبىنىن اسىرعىسى كەلىپ، مەيماناسىن تاسىتپاق بولعان ءنوپىر جاۋعا قاس باتىردىڭ تىلىمەن رۋح بولىپ اتتانداپ، قىران قۇستاي ءشۇيىلدى. ول قازاق ساحاراسىنىڭ ۇلان-بايتاق شەتىنە ءان بولىپ قالىقتادى، كۇي بولىپ دومبىرا پەرنەسىنەن توگىلدى، قوزى قايىرعان بالانىڭ سىبىزعىسى بولىپ سارنادى، قوبىز شاناعىندا مۇڭ بولىپ جۇرەكتەردى جىلاتتى. ول تاعى دا مىڭداردى تەبىرەنتتى. شارانا ءسابيدىڭ قۇلاعىنا بەسىك جىرىمەن انا ءالديى بولىپ قۇيىلدى، بويجەتكەن ارۋدىڭ ىستىق ۇياسىن قيماعان سىڭسۋ ءانى بولىپ ەستىلدى، تۋعان ەلىنە، اتا-اناسىنا دەگەن اسىل سەزىمى بولىپ جۇرەك پەرنەسىنىڭ كوڭىل-كۇيىن شەرتتى. وسىنىڭ بارلىعىندا دا انا ءتىلىمىزدىڭ رۋحى جاتتى. مەنىڭ تۋعان ءتىلىمنىڭ رۋحى ەدى.

مەنىڭ انا ءتىلىم. مەنىڭ تىلىمە قاتىستى سوزدەر قۇلاققا قانداي جاعىمدى ەستىلەتىن ەدى. وسى ءتىل مەنىڭ قۇلاعىما بەسىك الديىمەن ەندى، اتا-انامنىڭ ماعان ارناعان جىلى سوزدەرىمەن دارىدى. ول مەكتەپتەگى العاشقى ۇستازىمنىڭ اۋەزدى ۇنىمەن ءتالىمدى تاربيە بولىپ جۇرەككە قۇيىلدى. ول وقۋ ورداسىنداعى انا ءتىلى ءپانى ءمۇعالىمىنىڭ قوڭىر داۋسىمەن عىلىم نەگىزى بولىپ سانامدى بيلەپ الدى. ىستىق ۇياداعى ۇستازدارىمنىڭ ماعىنالى سوزدەرى ارقىلى ۇلتتىق رۋحىمدى بيىككە كوتەردى، ارمان كوكجيەگىنە جەتەلەدى. انا ءتىلىم ساعىنىش سەزىمگە تولى اندەر ارقىلى بيىك بەلەسكە شارىقتاتتى، تۋعان جەرىمدى سۇيۋگە، ارداقتاۋعا ۇيرەتتى. سوندىقتان دا مەن انا تىلىمە ماڭگى قارىزدارمىن.

بۇل كۇندە مەنىڭ ءتىلىم بەلەستەرگە كوتەرىلدى. قازاق مەملەكەتىنىڭ مەملەكەتتىك ءتىلى مارتەبەسىن يەلەنىپ، ەلىمىزدىڭ ءانۇرانى بولىپ شەت جۇرتتار اسپانىندا دا سامعادى، القالى جيىنداردا شەشەندەردىڭ تولعامىنا اينالدى.
حالىق رۋحىنىڭ بۇدان دا زور بيىكتەرگە كوتەرىلۋى ءۇشىن انا ءتىلىمىزدىڭ بۇدان دا زور مارتەبەگە جەتۋىن ىشتەي تىلەر ەدىم. جانە وعان پەرزەنتتىك پارىزىم رەتىندە دە ءوزىمنىڭ ۇلەسىمدى قوسقىم كەلەدى.

تاريحىمنان باستالاتىن عۇمىرى،
ءداستۇرىمنىڭ، بولمىسىمنىڭ تۇنىعى.
قازاعىما كورىنەتىن قاستەرلى،
ءتىلىم مەنىڭ - تاۋەلسىزدىك تۇعىرى.

قول سوزدىرىپ ەدى بولاشاقتان ازات كۇن،
ەندى، مىنە، تاۋەلسىزبىن، ازاتپىن.
ۇلت رۋحى جاساي بەرەر ماڭگىلىك،
قاسيەتتى ءتىلى باردا قازاقتىڭ.

انا ءتىلىم - ارداعىم سەن، بايلىعىم،
بولسىن تۇنىق سەنىڭ ءمولدىر ايدىنىڭ.
تەك سەن باردا كورىنەمىن بيىكتەن،
سەن جوعالساڭ، حالقىم شەگەر قايعى-مۇڭ.

ءوزىڭ بولدىڭ تاريحىمنىڭ داستانى،
سەن كۇمبەزسىڭ، اسپانىمنىڭ اسقارى.
انا ءتىلىم - مەملەكەتىمنىڭ وجدانى،
ەلىمدەگى بارلىق ءتىلدىڭ باستاۋى.

---