InfoHub Logo

اناناس (لات. Ananas comosus) كوپجىلدىق ءشوپ تەكتەس وسىمدىك. اناناستىق وتانى — وڭتۇستىك امەريكا قۇرلىعى. قازىرگى كەزدە تروپيكتىك ايماقتاردا وسىرىلەدى. ءبىر قىزىعى، تروپيكتەن شالعاي جاتقان گوللانديادا (نيدەرلاندى) اناناس وسىمدىگى جىلىجايدا (تەپليسا) وسىرىلەدى.

اناناس — جىلۋسۇيگىش، جارىقسۇيگىش جانە قۇرعاقشىلىققا ءتوزىمدى وسىمدىك. اناناستىڭ جەمىسى وتە ءدامدى ءارى پايدالى. اناناس شىرىنىنداعى فەرمەنتتەر اس قورىتۋ بارىسىندا پايداسىن تيگىزەدى. قۇرامىنداعى فەرمەنتتەردىڭ اتقاراتىن قىزمەتى تريپسين فەرمەنتىنە وتە ۇقساس كەلەدى، ديەتالىق قاسيەتتەرى دە بار. اناناس جەمىسىن جەگەن كەزدە ول پىسكەن بولۋى كەرەك. پىسپەگەن جەمىس ەرىن مەن اۋىز قۋىسىن زاقىمدايدى.

اناناستىڭ قۇرامىندا بارلىق دارۋمەندەر مەن كوپتەگەن مينەرالدى زاتتار بار. اناناستىڭ قۇرامىنداعى مينەرالدى زاتتار: كاليي، تەمىر، مىس، مىرىش، مارگانەس، ماگنيي، كالسيي جانە يود.

اناناس قان قىسىمىن تومەندەتۋگە جانە قان تامىرلارىنىڭ قىزمەتىن جاقسارتۋعا قىزمەت ەتەدى. اناناستىڭ كوپتەگەن اۋرۋلاردىڭ الدىن-الا حابارىن الۋعا تيگىزەر كومەگى دە از ەمەس.

اعزاداعى اسقورىتۋ جۇيەسىندە اقاۋلار پايدا بولسا، ءبىر ستاكان اناناس شىرىنىن ءىشىپ، ازداعان مولشەردە جەمىستەن جەگەن ابزال. اناناس شىرىنى اسقازان ءسولىنىڭ بەلسەندىلىگىن ارتتىرادى. ەگەر ەتتى تاعام جەگەن بولساڭىز، وندا اناناس شىرىنىن ءىشىپ، جەمىسىن جەۋدى ۇمىتپاڭىز. ول ەتتىڭ وڭاي قورىتىلۋىنا كومەكتەسەدى.

اناناستىڭ تاعامدىق قۋاتتىلىعى تومەن، نەبارى 100 گر.-عا 48 ككال. بولادى. ال قۇرامىنداعى كاليي تۇزى اعزاداعى ارتىق سۇيىقتىقتار مەن زاتتاردى كەتىرەدى، بىرنەشە كەلىگە دەيىنگى ارتىق سالماقتان ارىلتادى.

اناناستان جاسالعان دەسەرت دەنەدەگى ارتىق مايلاردى جاعۋعا جانە زات الماسۋ پروسەسىن دۇرىستاۋعا ءوز ىقپالىن تيگىزەدى.

قازىرگى تاڭدا كوپتەگەن زەرتتەۋشى-دارىگەر ماماندار اناناستىڭ قۇرامىنداعى فەرمەنتتەردىڭ كومەگىمەن راك اۋرۋلارىن (قاتەرلى ىسىك اۋرۋلارى) ەمدەۋ ءىسىنىڭ تيىمدىلىگىن ارتتىرۋ ماقساتىندا جۇمىستار جاساۋدا. اناناستى تۇراقتى تۇردە قورەك ەتۋدىڭ پايداسى ونكولوگيالىق اۋرۋلاردى الدىن-الا ەسكەرتۋگە كەرەمەت ءادىس رەتىندە سانالاتىنىن دالەلدەدى.

---