نازدى، نازىك، اق ساۋلە،
كوزدىڭ جاسىن يسەڭ-اۋ!
ەلجىرەپ جاس جۇرەگىڭ،
مەندەي بولىپ كۇيسەڭ-اۋ!
ومىراۋى اشىق اق كويلەك،
ەتەگى قىسقا كيسەڭ-اۋ.
ەركەلەتىپ، بۇرالتىپ،
ەرىنگە ەرىن تيسەڭ-اۋ.

اق ءتىسىڭدى اقسيتىپ،
ماحابباتپەن كۇلسەڭ-اۋ.
اق تورعىنعا ورانىپ،
تاۋ ىشىنە كىرسەڭ-اۋ.
اراسىندا گۇلدەردىڭ،
قولتىقتاسىپ جۇرسەم-اۋ.

اراسىنان توعايدىڭ،
ءتۇرلى جەمىس تەرسەڭ-اۋ.
مىنانى قارا، جانىم،— دەپ،
بۇرالىپ، كۇلىپ، كەلسەڭ-اۋ.
موينىما كەلىپ اسىلىپ،
جەمىسىڭدى بەرسەڭ-اۋ.
جاس بالاداي ەركەلەپ،
جالعىز ماعان سەنسەڭ-اۋ.
كىلىعىڭمەن، نازىڭمەن
ەركىمدى الىپ جەڭسەڭ-اۋ.
قاز الاتىن قىرانداي،
قايىرىلىپ مەن دە ىلسەم-اۋ.
گۇل، بايشەشەك ىشىندە
ءىسىمدى ءوزىم بىلسەم-اۋ.
اققان بۇلاق قاسىندا،
ساۋلەلى كۇن باسىمدا،
بۇلبۇل سايراپ قاسىمدا،
ىرزا بولام ومىرگە،
ءۇستىپ داۋرەن سۇرسەم-اۋ.

ءبىر تومارعا وتىرىپ،
اياقتى سۋعا مالسام-اۋ.
مايىسقان اق قولىڭمەن
دەنەگە سۋ سالسام-اۋ.
كەيدە سۋدى شاشىسىپ،
كەيدە جابىسىپ قالسام-اۋ.
كۇلىمدەپ كوزگە كوز ءتۇسىپ،
الدىما قىسىپ السام-اۋ.
كيىم جاپقان الەمنىڭ
ءلاززاتىنا قانسام-اۋ.

ۇستە ساۋلە التىن كۇن،
قورشاعان توعاي نانساڭ-اۋ،
سايراعان بۇلبۇل بۇتاقتا،
كۇلاق قۇرىش قانساڭ-اۋ!
نەشە ءتۇرلى گۇل ءيىسى
يىسكەپ ماس بوپ قالسام-اۋ.
كەرىلىك كەلمەي، جاز وتپەي،
سونداي تۇردە قالسام-اۋ!

---