سول ماڭعا سوعا المادىم كوپتەن بەرى،
كۇز بە ەدى؟!
ەسىمدە جوق، كوكتەم بە ەدى؟!
ەسىمدە تەك - دالانىڭ وكپەك جەلى،
ەسىمدى الىپ، قۇشاقتاپ، وپكەن مەنى،
سول ماڭعا سوقپاي كەتتىم كوپتەن بەرى.
ءسان تۇزەگەن ەسىلدىڭ وڭىرىندە،
اق قايىڭدار ءالى ءجۇر كوڭىلىمدە.
ەرەكشە ەدى ول جەردىڭ كولى مۇلدە،
ەرەكشە ەدى سول جەردىڭ ەلى مۇلدە،
ەرەكشە ورىن الىپ ءجۇر كوڭىلىمدە.
سۋىپ بارعام سۋىتقان قىلىقتاردان،
ءجىلبىپ قايتىپ كەتكەن ەم،
(سۋىپ بارعام...)
اراسىنان ورماننىڭ اقىن كوردىم،
جىرىن ىزدەپ ءجۇر ەكەن ۇمىت قالعان...
جاعاسىندا ەسىلدىڭ تۇرىپتى ارمان!..
اققۋدىڭ قاناتىنداي سىڭقىلداعان،
ۇنىنەن سول اقىننىڭ جىر تىڭداعام.
جىر تىڭداعان:
تىڭ دالام - سىلقىم دالام.
اق ەسىل ءبىر تولاستاپ، ءبىر تۋلاعان،
جاعادا اق قايىڭ ماس، بىلقىلداعان.
...وتىنەم، سول اقىننىڭ تاعدىرىن بەر،
وزگەنى قيماساڭ دا، جۇرتىم، ماعان؟..
اق ەسىل - اق وتاۋىم، القا كولىم،
قايىڭ ب ا ق، ويدىم ورمان، قامقا جەرىم.
اقىننىڭ امانات ءبىر جىرىنداي-اق،
اڭسايمىن دا تۇرامىن ارقا جەلىن.

---