اقساق قاز (ءىى نۇسقا)
جازعى جاسىل جايلاۋدىڭ كوز قۇرتىن تارتار ءسانىنىڭ ءبىرى — كول جاعالاي، وزەندى بويلاي جۇرەتىن، جايلاۋ ءتوسىن دۋمانعا بولەگەن قاز بولسا كەرەك. اق قانات بالاپاندارىن ارتىنان ەرتىپ، وزىنە ءتان ۇنىمەن ءومىر ءانىن شىرقاعان ءبىر توپ قازعا ات ءمىنىپ، ەل قىدىرۋدان باسقا شارۋاسى جوق مەرگەنسىماق جىگىتتىڭ كوزى تۇسەدى. ول بەيعام جۇرگەن قازدىڭ شىرقىن بۇزىپ، شىراپاتىن شىعارۋدى ەرمەك سانايدى، ەرلىك كورەدى. قازدى اتىپ ولجالاۋدى ارمانداعان جىگىت، ءبىر كۇنى مىلتىعىن الادى دا، كول جاعالاي ءبىرى ۇشىپ، ءبىرى قونىپ ءوز قىزىعىنا ماساتتانىپ جۇرگەن قازدارعا بەت تۇزەيدى. قامىس جيەگىن پانالاي كەلگەن مەرگەنسىماق قازعا وعىم داريدى-اۋ دەگەن مەجەلى جەرگە توقتايدى دا، ءبىر توپ بالاپانىن ارتىنان ەرتكەن ەنە قازدى قاراۋىلعا الادى. بالاپاندارىنىڭ ءتاي-تاي ءجۇرىسىن قىزىقتاپ تۇرعان قازدىڭ تۇرىسى جىگىت دەگبىرىن قوزدىرادى. مىلتىق داۋسى تارس ەتە تۇسەدى دە، ويىندا قۋانىشتان باسقا ەشتەمە جوق ەنە قاز قاناتىن قاعىپ-قاعىپ جىبەرىپ، ۇشارعا دارمەنى جوق ەكەنىن بىلگەننەن كەيىن كولگە ءتۇسىپ جۇزە جونەلەدى. جاڭا عانا قاناتىن قومداپ جۇرگەن بالاپاندار شۋلاي ۇشىپ ارالعا ءوتىپ كەتەدى. ەنە قاز دا ارالعا ىلىنەدى. قازدى قانجىعاسىنا بايلاماسا دا، وعى تيگەنىنە ماساتتانعان جىگىت اتىنا ءمىنىپ، اۋىلعا تارتادى. بالاپاندارىن ەرتىپ ارالدى مەكەندەگەن، ۇشارعا دارمەنى جوق اقساق قاز ۋايىممەن سولادى. كۇن ارتىنا كۇن كەلىپ، كۇز بولادى. قۇس قايتادى. بارلىق قۇس ءساندى ساپ قۇرىپ، ءان مارجانىن توگىلتىپ، وڭتۇستىككە بەت العاندا، بەيشارا بولعان اقساق قاز عانا مۇڭ مەن زارىن توگىپ ۇيىرىنەن ايىرىلىپ ارالدا قالا بەرەدى. كۇيشى اقساق قازدىڭ وسى مۇڭىن كۇيگە قوسقان ەكەن دەيدى.
You Might Also Like
-
قازىرگى تاڭدا قاتتى دامىپ كەتكەن جايتتاردىڭ ءبىرى، ول- الەۋمەتتىك جەلى. كۇندەلىكتى ءومىردىڭ جارتىسىن، كەيدە ودان دا كوپ بولىگىن الىپ كەتىپ جاتادى. بەسىكتەگى بالاعا دا، ەڭكەيگەن كارىمىزگە دە الەۋمەتتى...
-
باياعىدا ءبىر شال مەن كەمپىر بولعان ەكەن. ولاردىڭ ەركەتاي دەگەن جالعىز قىزى بار ەكەن. ەركەتايدىڭ بوتاسىنان ءوزى اق ىرىمشىك بەرىپ، ەركەلەتىپ، ۇيرەتىپ اسىراعان تايلاعى بار ەكەن. ەركەتاي وعان ەركەاتان دە...
