InfoHub Logo

ۇستاز...  ايتقانىڭدا جۇرەگىڭدى تەربەيتىن، ەستىگەندە كوڭىلىڭدى قوزعايتىن وسى ءبىر اياۋلى ەسىم ءاربىر ازاماتتىڭ ساناسىندا ماڭگىلىك جاتتالىپ قالعان بولار. مەكتەپ تابالدىرىعىن تارىداي بولىپ اتتاعاننان قولىڭنان جەتەكتەپ، ءدارىس الاتىن پارتاڭا وتىرعىزىپ، ءسوز اناسى – سالەمدەسۋدەن باستاپ بارلىق ادەپتىلىك ەرەجەلەرىن قۇلاعىڭا سىڭىرگەن، ءبىلىم بەرە وتىرىپ، ومىرىڭە ىقپال ەتەر باعىت-باعدار كورسەتىپ، تىعىرىققا تىرەلگەنىڭدە سۇيەنىشىڭ، قايعىعا باتقانىڭدا جۇبانىشىڭ بولىپ جول سىلتەگەن اياۋلى جان – ءمۇعالىم. ءبىرىنشى اناڭ – اق ءسۇتىن بەرىپ، الاقانىنا سالىپ وسىرگەن، جىلاعانىڭدا جۇباتقان، جابىرقاعانىڭدا قۋانتقان تۋعان اناڭ بولسا، ەكىنشىسى – ءبىلىم ارالىنا باستايتىن باعىتتى ايقىنداپ تا، ايشىقتاپ بەرەتىن ەكىنشى اناڭ – ءمۇعالىم.

الەمنىڭ جارتى بولىگىن جاۋلاعان ادامزات تاريحىنداعى ۇلى قولباسشى الەكساندر ماكەدونسكييدىڭ ۇستازى جايلى قالدىرعان پىكىرىن ەستۋىڭىز بار ما؟  «مەن ءوزىمنىڭ ۇستازىما اكەمنەن كەم قارىزدار ەمەسپىن: اكەمنەن ءومىر السام، ال اريستوتەلدەن ءومىرىمدى جاقسى وتكىزۋ تۋرالى ءبىلىم الدىم»، - دەگەن ەكەن ماكەدونسكيي.  ۇستاز بەن شاكىرتتىڭ بايلانىسى انا مەن بالانىڭ كىرشىكسىز ماحاباتتىمەن پاراپار. ۇستازىڭنىڭ بەرگەن ءبىلىمى مەن ايتقان اقىلى اتا-اناڭنىڭ تاربيەسىنەن ارتىق بولماسا، كەم تۇسپەيدى.

ۇستازدىق – قيىندىعى دا، قىزىعى دا مول، اۋىرى مەن جەڭىلى قاتار جۇرەتىن، اششىسى مەن تۇششىسى قاتار سەزىلەتىن ءومىردىڭ ۇزاق جولى. سونداي جولدىڭ اۋىرتپالىقتارى مەن قيىنشىلىقتارىن مويىماي كوتەرەتىن، شاكىرتىنىڭ ساپالى ءبىلىمى مەن سانالى تاربيەسى ءۇشىن تاڭنان قارا كەشكە دەيىن ەرىنبەي ەڭبەكتەنەتىن ءمۇعالىم اتتى ارداقتى جاننىڭ جولىن كەسىپ وتۋگە جەر بەتىن باسىپ جۇرگەن ءبىر دە ءبىر جاننىڭ قۇقى جوق. سەبەبى، ءومىردىڭ ءوزى – ءمۇعالىم. ال ءبىلىم ورداسىندا ساعان بار بىلگەنىن قاجىماي ۇيرەتىپ، ءبىلىم اتتى كەمەگە مىنگىزىپ، ءومىر دەيتىن مەكتەپكە، ۇلكەن سىناق الاڭىنا دايىندايتىن دا – ءوز ۇستازىڭ. «ءبىر ءارىپ ۇيرەتكەنگە قىرىق جىل سالەم بەر»، - دەگەن ەكەن قازاقتىڭ بەلگىلى جازۋشىسى جۇسىپبەك ايماۋىتوۆ. ەرلىگىمەن جەر-دۇنيەگە ءماشھۇر بولعان باتىر دا، سوزدەرىمەن ولەڭ ورە بىلگەن اقىن دا، حالىقتى اۋزىنا قارا شىبىنداي ۇيمەلەتكەن شەشەن دە باس يگەن مۇعالىمگە ءبىز نەگە باس يمەيمىز؟ ەلىمىزدىڭ مارتەبەسىن بيىككە كوتەرىپ، بولاشاققا دەگەن ءۇمىت شامىن وشىرمەيتىن جاستاردى تاربيەلەپ، شىنىقتىرىپ، ءبىلىمنىڭ بيىك شىڭىنا قوندىراتىن ۇستازدارعا مىڭ تاعزىم!

---