InfoHub Logo

وقۋ جىل باستالۋىنا از ۋاقىت قالدى. مەكتەپ كيىمدەرىنىڭ ساۋداسى قىزىپ تۇر. «قازاقپارات» ءتىلشىسى ساۋدا بازارلارى مەن تاڭداۋلى بۋتيكتەردى ارالاپ، مەكتەپ فورمالارىنىڭ باعاسىن ءبىلىپ قايتتىپتى. نازارلارىڭىزعا ۇسىنامىز.

ەلوردانىڭ ورتالىق بازارىندا شامامەن 19،5 مىڭ تەڭگە كولەمىندەگى قاراجاتقا بالانى تولىق كيىندىرۋگە (اياق-كيىم مەن جەيدەنى قوسقاندا) بولادى. شالبارى، پيدجاگى جانە جيلەتى بار كوستيۋم 15 مىڭ تەڭگە تۇرادى. ءبىراق ونىڭ باعاسىن 12 مىڭعا دەيىن تۇسىرۋگە بولادى. ساتۋشىلاردىڭ ايتۋىنشا، كيىمدەر تۇركيا، جۇڭگو، قىرعىزستاندا تىگىلگەن. ءبىراق شىققان جەرى مەن ماتاسى تۋرالى قاعاز بارلىق كيىمدەردە بىردەي بولا بەرمەيدى.

بۇل رەتتە كلاسسيكالىق اق جەيدە باعاسى 1،5- 4 مىڭ تەڭگە شاماسىندا، ال ساپاسى جاقسىلارىن 3،5 مىڭ تەڭگە كولەمىندە الۋعا بولادى. قىز بالالارعا ارنالعان شالبار نەمەسە بەلدەمشەنى 4 مىڭ تەڭگەگە، جەيدەنى 3 مىڭعا، پيدجاكتى 6 مىڭ تەڭگە شاماسىندا الا الاسىز. اياق-كيىم باعاسى 6 مىڭنان 14 مىڭ تەڭگە دەيىنگى ارالىقتا.

ساۋدا ورتالىقتارىنىڭ بۋتيكتەرىندە ساپاسى جاقسى مەكتەپ كيىمدەرىن سايكەسىنشە 35 مىڭ تەڭگە شاماسىندا ساتىپ الۋعا بولادى. الەمدىك برەندتەردىڭ كيىمدەرى ساتىلاتىن دۇكەندەردە ماقتادان جاسالعان جالعىز اق جەيدە باعاسى 105 مىڭ تەڭگەگە دەيىن بارادى، ورتاشا باعا - 40 مىڭ تەڭگە.

ۇل بالاعا ارنالعان مەكتەپ فورماسىنىڭ جيىنتىق باعاسى - 275 مىڭ، وعان پيدجاك (119 مىڭ تەڭگە)، شالبار (44،6 مىڭ تەڭگە)، جەيدە (54،8 مىڭ تەڭگە) تۋفلي (57 مىڭ تەڭگە) كىرەدى. قىزدارعا ارنالعان جيىنتىق باعاسى - 257 مىڭ تەڭگە، وندا پيدجاك (104،8 مىڭ تەڭگە)، بەلدەمشە (49،4 مىڭ تەڭگە)، جەيدە (43،4 مىڭ تەڭگە)، تۋفلي (60 مىڭ تەڭگە) بار.

---