InfoHub Logo

استانا اكىمدىگى مۇعالىمدەرگە 1000 تۇرعىن ءۇي كۋالىگىن بەرۋدى كوزدەيدى. ءاربىر كۋالىكتىڭ مولشەرى - 1 ميلليون تەڭگە. ونى باسپانانىڭ العاشقى جارناسى رەتىندە پايدالانۋ قاجەت.

قالالىق ءبىلىم باسقارماسىنىڭ باسشىسى ءانۋار ءجانعوزيننىڭ ايتۋىنشا، وتكەن جىلى ەلوردادا 100 ادامعا تۇرعىن ءۇي كۋالىگى تابىستالدى. ونىڭ ىشىندە 80-گە جۋىعى - مۇعالىمدەر.  

«نەگىزى، اتالعان شارانىڭ نەگىزگى ماقساتى دا سول، مۇعالىمدەردى قولداۋ، ولاردىڭ تۇرعىن ءۇي ماسەلەسىن شەشۋ. بيىل استانا اكىمدىگى 2000-عا جۋىق تۇرعىن ءۇي كۋالىگىن تاراتۋدى كوزدەيدى. سونىڭ جارتىسى ۇستازدارعا ارنالعان. ونىڭ ىشىندە كوللەدج، مەكتەپ جانە جوعارى وقۋ ورىندارىنىڭ وقىتۋشىلارى بار»، - دەدى ءا.جانعوزين.

ايتا كەتەيىك، وتكەن جىلدىڭ سوڭىندا قالا اكىمى باقىت سۇلتانوۆ 100 ادامعا تۇرعىن ءۇي كۋالىكتەرىن تابىستاعان بولاتىن. ءاربىر كۋالىكتىڭ مولشەرى - 1 ميلليون تەڭگە. اتالعان اقشانى يپوتەكالىق باسپانانىڭ العاشقى جارناسى رەتىندە قولدانۋ قاجەت. ال پاتەردى ءۇش ايدىڭ ىشىندە تابۋ قاجەت. دەمەك، وسى جىلى ناۋرىزدىڭ اياعىنا دەيىن پاتەر تابىلماسا، اقشانى بيۋدجەتكە كەرى قايتارۋعا تۋرا كەلەدى.

«بۇل «7-20-25» باعدارلاماسى ەمەس. دەگەنمەن، بانكتىڭ ىشكى شارتتارى سوعان ۇقساس. سالىمشى العاشقى جارنانىڭ 20 پروسەنتىن جيناۋى ءتيىس. سودان كەيىن 7 پروسەنتتىك يپوتەكا 25 جىلعا بەرىلەدى. ءبىراق پاتەردى ءۇش ايدىڭ ىشىندە تاۋىپ، يپوتەكانى راسىمدەپ الۋ قاجەت. ءۇي جاڭا تۇرعىن ۇيدەن الىنۋى شارت. ايتپەسە، اكىمدىكتىڭ اقشاسى بيۋدجەتكە كەرى قايتارىلادى. ازىرشە ول اقشا ارنايى ەسەپشوتتا جاتا بەرەدى. بارلىق شارتتار ورىندالعاننان كەيىن ەسەپشوت اشىلادى دا، العاشقى جارنا رەتىندە سالىمشىنىڭ قارجىسىنا قوسىلادى»، - دەيدى «تۇرعىن ءۇي قۇرىلىس جيناق بانكىنىڭ» استانا قالاسىنداعى ورتالىق فيليالىنىڭ ديرەكتورى جانسۇلتان ماتايەۆ.

قازاقپارات

---