اسحات ايماعامبەتوۆ استاناداعى ۋنيۆەرسيتەتتە وقىتۋشى بولماق
بۇرىنعى وقۋ-اعارتۋ ءمينيسترى اسحات ايماعامبەتوۆ ەلورداداعى بەدەلدى جوو-نىڭ بىرىندە ۇستازدىق ەتۋدى جوسپارلاۋدا.
«ءقازىر ۋاقىتىمدى بالالارىممەن وتكىزىپ جاتىرمىن. ولاردىڭ تاربيەسىنە ءمان بەرىپ، بالاباقشا، مەكتەپكە الىپ بارىپ، اكەلۋمەن اينالىسىپ ءجۇرمىن. جۋىردا استانا قالاسىنداعى ءىرى ءارى ساپالى ءبىلىم بەرەتىن ۋنيۆەرسيتەتتەردىڭ ءبىرى ۇسىنىس ءبىلدىردى. ءبىراز تاجىريبەڭىز بار، ستۋدەنتتەرمەن بولىسسەڭىز دەدى. ءوزىم پەداگوگ، وقىتۋشى بولعاننان كەيىن ماعان ول جاقىن. قاراپايىم وقىتۋشى بولىپ، ستۋدەنتتەرمەن جۇمىس ىستەۋ دەگەن ۇسىنىستى قابىلدادىم. ءقازىر قۇجاتتارمەن ياعني وقۋ باعدارلاماسىمەن اينالىسىپ جاتىرمىن»، - دەدى اسحات ايماعامبەتوۆ ءتىلشى نارتاي ارالبايۇلىنا بەرگەن سۇحباتىندا.
ەكس-مينيستردىڭ ايتۋىنشا، وقىتۋشى بولۋدان باسقا دا ۇسىنىستار تۇسكەن.
«جەكە سەكتور بويىنشا دا، باسقا دا ءتۇرلى ۇسىنىستار بار. ۇسىنىستار بويىنشا سوڭعى شەشىمدى جاقىندا قوعامعا جەتكىزەمىز. اعارتۋشىلىقپەن اينالىسۋ، بالالارعا تاربيە، ءبىلىم بەرۋ، جيناعان تاجىريبەمەن ءبولىسۋدى قايدا جۇرسەڭ دە ونى بىرگە الىپ جۇرۋگە بولادى. ءوزىم وسكەلەڭ ۇرپاقپەن تاجىريبەممەن ءبولىسۋدى ءجون كورىپ وتىرمىن»، - دەيدى ول.
سۇحبات الۋشىنىڭ «دەمەك، بۇرىنعى وقۋ-اعارتۋ ءمينيسترى ۋنيۆەرسيتەتتە ۇستاز بولىپ جۇمىس ىستەۋگە دايىندالىپ جاتىر ما؟» دەگەن ناقتىلاۋ ساۋالىنا ا. ايماعامبەتوۆ «ءيا» دەپ قىسقا قايىردى.
«بۇدان دا باسقا جوسپارلار بار. دەگەنمەن ازىرگە وسىنداي شەشىم. كەزىندە ءبىراز جىل ۇستاز بولىپ ەڭبەك ەتكەندىكتەن مەن ءۇشىن وقىتۋشى بولۋ قىزىق. ءارقاشاندا جۇرەگىمە جىلى ءارى جاقىن»، - دەيدى ءبىلىم مينيسترلىگىنىڭ بۇرىنعى باسشىسى.
ەسكە سالايىق، بيىل 4 قاڭتاردا مەملەكەت باسشىسىنىڭ جارلىعىمەن اسحات ايماعامبەتوۆ قازاقستان رەسپۋبليكاسىنىڭ وقۋ-اعارتۋ ءمينيسترى لاۋازىمىنان بوساتىلعان ەدى.
You Might Also Like
-
ءمىرجاقىپ دۋلات ۇلى (1885-1935) قازاقتىڭ اسا كورنەكتى اعارتۋشىسى، اقىن، جازۋشى، قوعام قايراتكەرى، كازاق ەلىنە ەڭبەك سىڭىرگەن. جاس كەزىنەن ءوز بەتىنشە العا تالپىنىپ، وقۋ وقىپ، ءبىلىم العان.
-
— ۋينستون چەرچيلل 6 سىنىپتان وتە الماي كەلەسى جىلعا قالعان، 62 جاسىندا انگليا پريمەر-مينيسترى بولعان.
