اتا-انالار بالاباقشاداعى تاماقتىڭ قۇنارلىلىعىن تەكسەرە الادى
اتا-انالار بالاباقشاداعى تاماقتىڭ قۇنارلىلىعىن كورە الادى. استانا قالالىق ءبىلىم بەرۋ باسقارماسى باسشىسىنىڭ مىندەتىن اتقارۋشى ءانۋار ءجانعوزيننىڭ ايتۋىنشا، وسى ىسپەتتى باستامالار "Smart بالاباقشا" جوباسى اياسىندا قولعا الىنادى.
"جوبانىڭ ءبىرىنشى باعىتى ول - قاۋىپسىزدىك. وندايدا بالاباقشانىڭ بارلىق كىرۋ مەن شىعۋ جاقتارىندا بەينەباقىلاۋ جۇيەسى ورناتىلادى. سوسىن اتا-انالاردىڭ كەلىپ-كەتكەنىن تىركەۋ جۇيەسى بولادى. بۇل دەگەنىمىز، ءاربىر اتا-اناعا ەلەكتروندى كارتوچكا بەرىلەدى. ءسويتىپ، بارلىق اتا-انالاردىڭ كىرگەنى مەن شىققانى تىركەلىپ وتىرادى. بالاباقشاعا كەلگەن بالالاردى تىركەۋ تەتىگى دە ەنگىزىلەدى. بۇدان بولەك، ارنايى دەنساۋلىق ءتولقۇجاتىندا ءاربىر بالانىڭ اۋرۋى، وعان جاسالعان ەكپەلەر جانە تاعى باسقا مەديسينالىق اقپارات بولادى. ال جەكە كابينەت ارقىلى اتا-انالار ءوز بالالارىنىڭ جەتىستىكتەرىن، ءبىلىم بەرۋ كەستەسىن، اس ءمازىرىن، ءتىپتى تاماقتىڭ قۇنارلىلىعىن كورە الادى"، - دەيدى جانعوزين.
ونىڭ سوزىنە قاراعاندا، قازىرگى كەزدە "Smart بالاباقشا" جوباسى قالاداعى ەكى بالاباقشادا پيلوتتىق رەجيمدە ىسكە اسىپ جاتىر. مامىردىڭ اياعىنا دەيىن وسى جۇمىستىڭ قورىتىندىسى شىعارىلادى. سودان كەيىن ونى باسقا دا بالاباقشالارعا تاراتۋ جوسپارلانعان.
ايتا كەتەيىك، بۇگىن استانا ساراپشىلارى كلۋبىنىڭ كەزەكتى وتىرىسىندا ەلورداداعى ءبىلىم بەرۋدى دامىتۋعا ارنالعان باعدارلامانىڭ جوباسى تالقىلاندى. سونىڭ اياسىندا قالاداعى بارلىق ءبىلىم بەرۋ مەكەمەلەرىندە اۋديت وتكىزىپ، ءبىلىم بەرۋ ساپاسىن كوتەرۋدىڭ وزەكتى ماسەلەلەرىن انىقتاۋ جوسپارلانىپ وتىر.
You Might Also Like
-
ادامزات مەكەن ەتەتىن 5 قۇرلىقتىڭ بارلىعىنا قاناتىن كەڭ جايعان الىپ ءبىر پاتشالىق بولىپتى. ول پاتشالىقتىڭ ەرەكشەلىگى ادامداردىڭ جاسىنا، جىنىسىنا، تىلىنە، دىنىنە، ۇلتىنا قاراماي بارلىعىن دا ءوز پ...
-
قازىرگى زامان تالابىنا ساي، جان-جاقتى جەتىلگەن، بويىندا ۇلتتىق سانا مەن ۇلتتىق پسيحولوگيا قالىپتاسقان، يماندىلىق ادەبى، پاراساتى بار ۇرپاق تاربيەلەۋ، ءوسىرۋ، ءبىلىم بەرۋ، بۇگىنگى تاڭدا وتباسىنىڭ، بال...
