InfoHub Logo

مەنىڭ قىمباتتى اتامنىڭ «اينالايىن» دەپ ەركەلەتكەن ءسوزى ەسىمنەن كەتەر ەمەس. قولىما قالام الدىم، وعان سەبەپ مەنىڭ ول كىسىگە دەگەن ساعىنىشىم. سۇم اجال اسقار تاۋداي اتامدى قاس-قاعىم ساتتە ارامىزدان الىپ كەتتى. توردەگى جانسىز بەينەڭىزگە كوز ءسۇزىپ، جانارداعى جاسقا ەرىك بەرەمىز. اتام ىلعي دا ومىردەن تۇيگەنىن مىسالدارمەن ورنەكتەپ، اتالىق اقىلىن ايتاتىن: «بۇل قۋ تىرلىكتە سان ءتۇرلى سىناق بولادى، سودان سۇرىنبەي ءوتۋ كەرەك… تىرلىكتە سان ءتۇرلى قيىندىق بار، ودان دا مۇدىرمەي وتە بىلگەن ءجون»، – دەپ قامقورلىعىن اقىلمەن جەتكىزەتىن. قازاق حالقىندا، «اكەڭ ولسە دە، اكەڭدى كورگەن ولمەسىن»، – دەگەن ۇلاعاتتى ءسوز بار. ءسىزدىڭ زامانداستارىڭىز، كوز كورگەن اقساقالدار ءسىز جايىندا، ءسىز سالعان سارا جولدى ءسوز ەتكەندە،وزىڭىزدەي قاريانىڭ نەمەرەسى بولعانىما ماقتانامىن. «جۇرتىڭا قالدى اسىل ءىس، جۇرتىنا بەردى ول پايداسىن. سوعادى جۇرەك اسىعىس: اتامنىڭ ءۇيى قايداسىڭ؟ اتامنىڭ ءۇيى قايداسىڭ؟» مۇقاعالي اقىننىڭ وسى ءبىر ولەڭ جولدارى اتامنىڭ اتاقونىسىن اڭساپ جەتكەن ۇرپاعىنىڭ ۇرانى ىسپەتتى. قاتال تاعدىر جون ارقاسىن تالاي وسقىلاعان قايسار اتام ەشبىر قيىندىقتان مويىماعان. ۇرپاق قامى ءۇشىن اۋىر تىرلىكتىڭ تىزگىنىن ۇستاپ، تىنىم تاپپاعان جان بولعان، وعان اجەمنىڭ اڭگىمەلەرى دالەل. كەيدە كوپشىلىك اراسىندا ادامدار: «كىمنىڭ نەمەرەسىسىڭ؟» دەگەندە مەن: «ناۆوي اتانىڭ نەمەرەسىمىن»، – دەپ ەرەكشە تەبىرەنە ايتامىن. سەبەبى، مەنىڭ اتام – قانداي ماقتاۋعا دا لايىق ادام.

 

---