شىن حاكىم، ءسوزىڭ اسىل - باعا جەتپەس،
ءبىر ءسوزىڭ مىڭ جىل جۇرسە، ءدامى كەتپەسۋ
قارادان حاكىم بولعان سەندەي جاندى
دۇنيە قولىن جايىپ ەندى كۇتپەس.
سوزىڭە قۇلاق سالىپ، باعا بەرمەي،
قيسايىپ، قىڭىرايدى جۇرتتىڭ يتتەس!
بۇرتيىپ، تەرىس قاراپ: «اۋلاق ءجۇر!»- دەپ،
بولدى عوي جاقىن تۋعان ءبارى كەكتەس.
تىنىش ۇيىقتا قابىرىڭدە، ۋايىم جەمە،
«قور بولدى قايران ءسوزىم بوسقا!»- دەمە.
ارتىندا قازاقتىڭ جاس بالالارى
ءسوزىڭدى كوسەم قىلىپ، جۇرەر جونگە!
اي، جىل وتەر، دۇنيە كوشىن تارتار،
ءولتىرىپ تالاي جاندى، جۇگىن ارتار.
كوز اشىپ، جۇرتىڭ وياۋ بولعان سايىن،
حاكىم اتا، تىنىش بول، ءقادىرىڭ ارتار.
جۇرگەن جاننىڭ ارتىندا ءىزى قالار،
ەتىكشى ولسە، بالعا مەن ءبىزى قالار.
ءبىر باي ولسە، ءتورت تۇلىك مالى قالار،
جۇيرىك ەلسە، ارتىندا ءسوزى قالار!
سۇم دۇنيە سىلاڭ بەرىپ كوپتەن وتەر،
ساۋ قالعاننىڭ كوبىسى ەرتەڭ بىتەر.
توقتاماس دۇنيەنىڭ دوڭگەلەگى،
جۇيرىكتىڭ ايتقان ءسوزى كوپكە كەتەر.

---