InfoHub Logo

دۇنيە ءجۇزى بويىنشا قالالاردىڭ اتقامىنەرلەرى ەكولوگيانى جاقسارتۋعا، كوشە كەپتەلىستەرىن ازايتۋعا قالالاردىڭ ورتالىعىندا تۇراتىنداردىڭ تىرشىلىگىن تىنىشىراق قىلۋعا تالپىنىپ ءجۇر. كەي قالالاردا ورتالىقتا كونە اۆتوكولىكتەردى جۇرگىزبەيدى، كەيبىرەۋلەرىندە كولىك تۇراعىنىڭ باعاسىن كوتەرەدى، ءۇشىنشى بىرەۋلەرىندە قوعامدىق كولىكتەن باسقا كەز كەلگەن كولىكتى كىرگىزبەيدى.

پاريج

2018 جىلعى زەرتتەۋلەر ءپاريجدىڭ (ماسكەۋ جانە لوندونمەن قاتار) اۋاسى ەڭ لاستانعان قالالاردىڭ ۇشتىگىنە ەنگەنىن كورسەتتى. قالا اكىمى بۇل رەيتينگكە جانە باسقا دا ەكولوگيالىق دەرەكتەرگە ەكى ماڭىزدى شەشىم شىعارۋ ارقىلى جاۋاپ قاتتى.  

ەندى 1997 جىلعا دەيىن شىققان كولىكتەر قالا ورتالىعىنا كىرە المايدى، ال ءار ايدىڭ ءبىرىنشى جەكسەنبىسى كۇنى كولىكتەرسىز كۇن بولىپ جاريانىپ وتىر — تاڭعى 10-نان باستاپ كەشكى 6-عا دەيىن فرانسيا استاناسىنىڭ ورتالىعىنا اۆتوكولىكتەردىڭ كوپشىلىگىنە كىرۋگە تىيىم سالىنعان. بۇنىڭ ورتالىق اۋدانداردىڭ تۇرعىندارىنىڭ كولىكتەرىنە، تاكسي مەن قوعامدىق كولىككە قاتىسى جوق — ولارعا ورتالىققا كولىكپەن كىرۋگە بولادى، ءبىراق ءجۇرۋ جىلدامدىعى 20 كم/ساعاتتان اسپاۋى ءتيىس.

مەحيكو

مەكسيكا استاناسى ەڭ لاستانعان قالالاردىڭ قاتارىنان سانالادى، ءبىراق قالا بيلىگى 2008 جىلدان بەرى ەكولوگيانى جاقسارتۋعا كۇش سالىپ كەلەدى. 2008 جىلدان باستاپ اۆتوكولىك قوزعالىسىن سەنبى كۇندەرى اناعۇرلىم شەكتەپ تاستادى، بۇل كولىكتەردەن شىعاتىن زياندى گازداردى 15% ازايتۋى ءتيىس بولعان. 2017 جىلى جاسالعان زەرتتەۋلەر جاعدايدىڭ ايتارلىقتاي جاقسارا قويماعانىن كورسەتتى.  

تۇرعىندار جەكە كولىكتەن باس تارتپاعان جانە تاكسي مەن كارشەرينگ قىزمەتىنە كوپتەپ جۇگىنگەن. بۇل جاعدايدى تالداپ شىققان ساراپشىلار شىنىمەن-اق تۇرعىنداردىڭ جەكە كولىكتەردەن باس تارتىپ، قوعامدىق كولىكپەن جۇرە باستاۋى قيىن ەكەنىن ايتادى — بۇلاي ەتۋدى ولار مەكسيكالىقتاردىڭ وزىندىك ەرەكشەلىگى دەپ بىلەدى.  

كوپەنگاگەن

كوپەنگاگەن — اۆتوكولىكتەردىڭ ادام باسىنا شاققانداعى سانى ەۋروپاداعى ەڭ از بولاتىن قالالاردىڭ ءبىرى. بار گاپ قالادا ۆەلوجولداردى عانا سالىپ قويماي، ماشينالار جۇرۋىنە تىيىم سالىنعان ۆەلوماگيسترالداردى سالۋ ارقىلى ۆەلوسيپەدشىلەردى قولداۋداعى بەلسەندىلىكتە.  

بۇعان قوسا، ءقازىردىڭ وزىندە دات ەلىنىڭ استاناسىن دامىتۋ جوسپارى بار. ول جوسپارعا سايكەس 2030 جىلى بەنزينمەن جانە ديزەلمەن جۇرەتىن ماشينالاردى، ال 2035 جىلدان باستاپ گيبريد ماشينالاردى ساتۋعا تىيىم سالىنۋى مۇمكىن.    

بريۋسسەل

2030 جىلعا قاراي بۇل قالادا ديزەلمەن جۇرەتىن ماشينالارگا تىيىم سالۋدى كوزدەپ وتىر، ال قازىرشە قالا بيلىگى اۋانى لاستاۋشى ەسكى كولىكتەرمەن جۇرەتىن اۆتوكولىكتەلەردىڭ يەلەرىنە شۇيلىگە باستادى.

استانادا جۇزدەگەن باقىلاۋ كامەرالارىن ورناتتى، ەندى سولار ارقىلى بۇنداي ماشينالاردىڭ قاي جەردە جۇرەتىنىن، سونىمەن قاتار ول كولىكتەردىڭ يەلەرى قايدا تۇراتىنىن انىقتاۋعا تىرىسىپ باعۋدا. بۇنداي كولىكتەردىڭ يەلەرىنە قوسىمشا سالىق تولەتپەكشى.  

بوگوتا

كولۋمبيا استاناسىندا اۆتوكولىكتەردىڭ سانىن شەكتەۋشى باعدارلاما 1974 جىلدان بەرى قولدانىستا ءجۇر.

45 جىلعا دەرلىك ۋاقىتتان بەرى ءار جەكسەنبى كۇنى تاڭعى 7-دەن كۇندىزگى 2-گە دەيىن قالا كوشەلەرىمەن اۆتوكولىكتەردىڭ جۇرۋىنە تىيىم سالىنعان. وسىنداي باعدارلامانىڭ جۇزەگە اسۋى ارقاسىندا ءار اپتا سايىن ۇزىندىعى شامامەن 120 كم بولاتىن قالا كوشەلەرى جابىلىپ، ول كوشەلەرمەن استانا حالقىنىڭ تورتتەن ءبىرى جاياۋ جۇرەدى — بۇل شامامەن 1،7 ملن ادام.

---