InfoHub Logo

ءايمي كەرەيدىڭ شەرۋشى رۋىنان تۋعان بىرەۋدىڭ جالعىز ۇلىنا ايتتىرعان نايمان رۋىنىڭ قىزى ەكەن. قالىڭ مالى بەرىلىپ بولىپ العالى وتىرعاندا، باقىتقا قارسى كۇيەۋ جىگىت قايتىس بولادى. جىگىتتىڭ جىلى وتكەننەن كەيىن «قىزعا بىرەۋلەر قۇدالاسقالى جاتىپتى» دەگەن حابار كەرەي جاعىنىڭ قۇلاعىنا تيەدى. كەرەي جاق الاتىن جىگىتىن قوسىپ، قىز جاققا ادام جىبەرەدى. ءبىراق قىز بارعان جىگىتتى جاراتپايدى. قۇدا جاق: «قالىڭ مالدى قايتارامىز» دەپ جات نيەت بىلدىرەدى. جىگىت جاق بۇل اقۋالدى ورىس جەرىندە سەزدە جۇرگەن بەيسەنبىگە حابارلايدى. سول ءداۋىردىڭ ەرەجەسىندە قىزدى ايتتىرعان جىگىت ولسە، قىز سول ەلدەگى ءوزىنىڭ تاڭداعان جىگىتىنە بارادى. ەگەر ول جىگىت الماسا، ياكي الۋعا جاعدايى جار بەرمەسە، قالىڭ مال سالاۋات بولادى. قىزدىڭ تالابىنا لايىقتى جىگىت شىقپاسا، قىز جاق قالىڭ مالىن قايتارىپ بەرىپ، قىزدىڭ باس ەركىندىگىن الادى ەكەن.

بەجەڭ قايتار جولدا كەلىپ قۇدالارمەن سويلەسسە، ولار قالىڭ مالدى قايتارامىزدان باسقانى ايتپايدى. بەيسەنبى: «قالىڭ مال قايتارۋ قاشپاس، مەن قىز لەبىزىن ءوز قۇلاعىممەن ەستىسەم، — دەپ ءايميدى شاقىرتىپ الىپ، — قۇدالاسقان جىگىتىڭ باقىتقا قارسى قايتىس بولدى. بۇل — تاعدىردىڭ ءىسى. اتامىز قازاقتا «جەسىر ەردەن كەتسە دە، ەلدەن كەتپەيدى» دەگەن سالت بار. مىنا جىگىتتەردەن كوڭىلىڭ سۇيگەنىن تاڭدا، كوڭىلىڭ تولماسا، بۇكىل كەرەيدى تاڭداۋىڭا دا بولادى»، — دەيدى.

ات-اتاعى ەلگە ايگىلى بەيسەنبىنى ءايمي دە سىرتتاي ءبىلۋشى ەدى. بۇل رەت بەيسەنبىنىڭ كوز تارتارلىق تۇلعاسى مەن كوڭىل تولارلىق كەلبەتىن كورگەندە ءايميدىڭ ىشتەي عاشىقتىق سەزىمى قوزعالىپ، بەيسەنبىگە: «كەرەيدەن ءوزىم تاڭداعان جىگىتىمە بارۋىما بولا ما؟» — دەپ سۇرايدى. بەيسەنبى: «ەل سالعان جول، جالعاسىپ كەلە جاتقان سالت قوي، نەگە بولمايدى؟ بولادى!» — دەيدى.

وجەت ءايمي: «ونداي بولسا، مەن ءوزىڭدى تاڭدايمىن، باسقاڭا بارمايمىن»، — دەيدى. بەيسەنبى ءبىر جاعىنان ءوزى ايتقان سوزىنەن بۇلتارا المايدى، ەندى ءبىر جاعىنان ءايمي سىندى سىمباتتى، سۇلۋ، وجەت ارۋدى ءوزى دە شىن جۇرەگىنەن سۇيەدى. وسىلايشا، ءايمي ءوزىنىڭ تاماشا مىنەز-قۇلقى، ۇنامدى ىس-ارەكەتى، اق جارقىن، مەيماندوس، ساۋىقشىل ەرەكشەلىگى جانە زەيىندى زەردەلىلىگىمەن جۇرتقا دا، بەيسەنبىگە دە ۇنايدى. بەجەڭنىڭ اقىلىنا  قوسىپ، داۋ-شارلارعا بيلىك ايتۋ، ەلدى بەرەكە-بىرلىككە شاقىرۋ ءىس تەرىنە دە ارالاسادى. ەل الدىندا زور بەدەلگە يە بولادى. تۇسەتىن تۇسەل، كەلەتىن قوناق ءايمي وتاۋىنا اۋادى. ءايميدىڭ وسىنداي ىس-ارەكەتىنە سۇيىنگەن بەجەڭ ءوزىنىڭ كوڭىل-كۇي، وي-ورنەگىن «ءايمي» اتتى كۇي قىلىپ قالدىرادى.

---