InfoHub Logo

بەجەڭنىڭ اينەپ، زاينەپ دەگەن ەكى قىزى بولعان ەكەن. اراسى ءبىر جاسار تەتەلەس وسكەن ەكى بالا بەجەڭ ۇيىندە بولسا، قاسىنان شىقپاي ەركەلەپ، اكەلەرىنەن ەكى ەلى ايىرىلمايتىن بولىپتى. ەكى بالاسىنىڭ مەيىرى بەجەڭە اۋعان ەكەن دە، بەجەڭنىڭ جانى وسى ەكى بالاسىنىڭ ۇستىندە ەكەن.

بەلگىلى ءبىر جىلى بەجەڭ ساپارعا شىعادى. بىردە دەم الىپ جاتىپ ۇيىقتاپ كەتەدى دە ءتۇس كورەدى. تۇسىندە ءوز ءۇيىنىڭ تورىندە وتىرسا، ۇيىندە باققان ەكى كەپتەر بار ەكەن، ءبىر قارشىعا كيىز ءۇيدىڭ شاڭىراعىنان ۇشىپ كىرەدى دە، الگى ەكى كەپتەردى تەڭ ءىلىپ الىپ، ەسىكتەن شىعىپ كەتەدى. بەجەڭ ورنىنان تۇرىپ كەپتەردى اراشالاپ الىپ قالايىن دەپ قوزعالعاندا ءوزى ويانىپ كەتەدى. وسىدان كەيىن كوڭىلى قوبالجىپ، ۇيىنە قايتقىسى كەلىپ، جۇمىسىن تەز ءبىتىرىپ ۇيىنە قايتادى. بەجەڭ كەلگەنشە ەكى بالاسى جۇقپالى قىزىلشا اۋرۋىنا شالدىعىپ، ەكەۋى دە ءبىر كۇندە تەڭ قايتىس بولادى. بالالاردى ەندى عانا وڭ جاققا جاتقىزىپ بولعان كەزدە، بەجەڭ دە ۇيىنە كەلىپ تۇسەدى. بالالارىنىڭ ەجەلگى داعدىسى بويىن شا الدىنان جۇگىرىپ شىقپاعانىنان كۇماندانادى. بەجەڭ ۇيىنە كىرۋمەن زارلى كورىس باستالادى دا، شاڭىراقتان ءولىم شىققانى ءمالىم بولادى. بەجەڭ تاعات قىلا الماي وڭ جاقتاعى شىمىلدىقتى اشىپ قاراسا، ەكى بالا قاتار جاتقان. ول شىداپ تۇرا الماي ەكى بالاسىن قۇشاقتاپ باۋىرىنا باسىپ، «قوس جانارىم، ەكەۋىم»، «ەكەۋىم، ەكەۋىم» دەپ ەگىلە ەڭىرەيدى. ءۇي تولى ادام بىرگە جىلاپ، بۇكىل ءۇي كۇڭىرەنەدى. قاتارعا قوسىلىپ، كوزگە كورىنىپ قالعان ەكى بىردەي بالانىڭ ءبىر كۇندە تەڭ قايتىس بولىپ، وڭ جاقتا سۇلاپ جاتۋى بەجەڭدى اۋىر قايعى تەڭىزىنە باتىرادى. قوس بالاپانىن ولىمگە قيماعان ول، قاراشا ايىندا كيىز ءۇيدىڭ ىرگەسىن تۇرگىزىپ تاستاپ، بالالارىن شىعارتپايدى. ءوزى دە ءنار تاتپايدى. اقىرى قۇلبەك باستاعان ەل اقساقالدارى كەلىپ بەجەڭە جۇباتۋ ايتىپ، يلاندىرىپ بالالاردى قويدىرعان ەكەن. بالالارىنىڭ ولىمىنە قاتتى قايعىرىپ نازالانعا بەجەڭ «قوس جانارىم، ەكەۋىم»، «ەكەۋىم، ەكەۋىم» اتتى قايعى-قاسىرەت كە تولى زارلى كۇيدى شەرتىپ، شەرىن، مۇڭىن تارقاتادى ەكەن.

---