اينۇردىڭ اي-جۋر پودكاسى
اينۇر اڭلاماسوۆا - جامبىل وبلىسىنىڭ تۋماسى. اينۇر قازىرگى تاڭدا قازۇۋ-دىڭ جۋرناليستيكا فاكۋلتەتىندە ءبىلىم الىپ جاتىر. اينۇردىڭ يۋتۋب جەلىسىندە جاس جۋرناليستەرگە ارناعان كانالى بار. جەكە كانالىندا جۋرناليستيكا تاڭداعان وقىرماندارعا پايدالى اقپاراتتار كوپ. تالانتتى اينۇر شالقار راديوسىنىڭ دا جۇرگىزۋشىسى. ەڭ ماڭىزدىسى سىزدەرگە اينۇردىڭ “اي-جۋر” پودكاسىنىڭ تاريحى جانە دە قالاي پايدا بولعانى قىزىقتى - دەپ، ويلايمىن. بۇگىن اينۇردى “اي-جۋر”پودكاسى جايلى جاقىن اڭگىمەگە تارتتىق.
- اينۇر ءسىز پودكاست دەگەندى قالاي تۇسىنەسىز؟ ءوز ويىڭىزدى تولىققاندى بولىسسەڭىز.
- پودكاست تارالۋ جولى RSS ارنا ارقىلى جۇزەگە اساتىن اۋديو نەمەسە ۆيدەو فورماتتاعى مەديا كونتەنت. مەنىڭ ويىمشا ءاربىر پودكاست بەلگىلى ءبىر سالاعا باعىتتالۋى كەرەك. سوندا عانا بەلگىلى ءبىر دەڭگەيدە اۋديتوريا جيناي الادى.
- اينۇر ءسىز “اي-جۋر”پودكاستىنىڭ اۆتورىسىز. جالپى وسى پودكاسىڭىزدى باستاۋعا قانداي جاعدايلار سەبەپ بولدى؟
- پودكاستينگ سوڭعى جىلدارى قارقىنمەن دامۋدا. ماسەلەن، يۋتۋبتاعى جوبالاردى الىپ قارايىق. ەكى نەمەسە بىرنەشە ادامنىڭ ميكروفون الدىنداعى اڭگىمەسى پودكاست اتالىپ ءجۇردى. باسىندا بىلاي ويلايتىنمىن. نەگە قاراپايىم سۇقباتتاسۋ، اڭگىمەلەسۋ پودكاست دەپ اتالادى؟ سوسىن ءوز بەتىمشە ىزدەنە باستادىم. پودكاستينگ جايىندا تولىعىراق ەلدار قۇدايبەرگەنوۆتىڭ سۇقباتتارىنان كوپ تۇسىنىك قالىپتاستىردىم. سايكەسىنشە مەن دە پودكاست اشۋعا قىزىعا باستادىم.
- “اي-جۋر”پودكاسى قانداي باعىتقا باعىتتالعان؟ قازىرگى تىڭدارماندارعا قانداي پايدالى اقپاراتتار بەرە الادى؟
- “اي-جۋر” پودكاستى جاستارعا ارنالعان كونتەنت ۇسىنادى. دارىندى زامانداستارىمنان، بىلىكتى ەكسپەرتتەردەن قازىرگى تاڭداعى اكتۋالدى تاقىرىپتار بويىنشا سۇقبات الامىن. سايكەسىنشە جۋرناليستيكاعا جاقىن باعىت. بولاشاق جۋرناليست، قاراپايىم ستۋدەنت رەتىندە ءوز پىكىرلەرىمدى، اپتالىق جازبالارىمدى ەپيزود رەتىندە ۇسىنامىن. جۋرناليستيكاعا ەندى قادام باسىپ كەلە جاتقان ىنى-سىڭىلىلەرىمە پايدالى كەڭەستەر بەرەمىن.
- جەكە پودكاسىڭىزدا قانشا ەپيزود بار؟ سىزگە ەڭ قىزىقتى ەپيزودىڭىز…
- پودكاسىمنىڭ 60-قا جۋىق ەپيزودى بار. بىرنەشە ايدارلار تۇراقتى شىعىپ وتىرادى. ماعان بارلىق ەپيزودتارىم ۇنايدى. اسىرەسە ءىلياس ەسەنبەرليننىڭ “عاشىقتار” رومانى جايلى تۇيگەن ويلارىمدى، ينسايتىمدى بولىسكەن ەپيزودىم ءساتتى شىققان. روماندى جاقسى تالداپ، ءتۇيىندى ويدى ءدوپ تاپتىم دەگەن ويدامىن.
- ءسىز “اي-جۋر”پودكاسىنان بولەك، قانداي پودكاستتار تىڭدايسىز؟ ول پودكاست سىزگە نەسىمەن ەرەكشە؟
- مەن بارلىق ەپيزودتارىن جىبەرمەي تىڭدايتىن پودكاست – الماس مارات ۇلىنىڭ “ايقاپ” پودكاستى. وتە شىنايى پودكاست. سىني ويلاۋعا ۇيرەتەدى دەپ ايتا الامىن. اينەل اميرحاننىڭ “Oy-detox” پودكاستىن دا تىڭدايمىن. اينەل حانىمنىڭ كەيىپكەرلەرى وتە ەرەكشە. اسىرەسە ايگەرىم بەگىمبەت حانىممەن قۇرعان فوتوجۋرناليستيكا جايىنداعى ەپيزودى قاتتى ۇنادى. پودكاستينگتەگى ۇستازىم دەپ ەلدار قۇدايبەرگەنوۆتى ايتا الامىن. سوندىقتان وسى سالا بويىنشا ءبىلىمىمدى “QazPodcast” پودكاستىن تىڭداۋ ارقىلى ارتتىرامىن.
- ءاربىر سالادا بەلگىلى قيىنشىلىقتار بولادى، ادامزات بالاسى سول قيىنشىلىعىنان ساباق الىپ، ودان ءارى دامي تۇسەدى. ”اي-جۋر”پودكاسىندا ەپيزودتاردى جاريالاۋدا قانداي قيىنشىلىقتار بولدى؟
- ارينە كەدەرگىلەر بولىپ تۇرادى. اپتالىق جازبالاردى جازعاندا ولاردى وڭدەپ، ءارقايسىسىن قوسۋ كوپ ۋاقىتتى الادى. كەيدە سۇقباتتاسقىم كەلگەن كەيىپكەرلەر جاۋاپ بەرمەي قالعان كەزدەر بولدى. سايتتىڭ الگوريتمدەرى وزگەرىپ، ۋاقىتشا جۇمىس جاساماي قالعان كەزدە ەپيزودتارىمدى جۇكتەي الماي قينالعانمىن.
- ”اي-جۋر”پودكاسىن بولاشاقتا قانداي باعىتتا جۇرگىزەسىز؟ جالپى بەلگىلى باعىتتا جۇرگىزۋ ويىڭىزدا بار ما؟
- مەنىڭ ويىمشا پودكاست قازىرگى باعىتىن ساقتايدى. مۇمكىن جاڭا ايدارلار قوسىلادى. جالپى جۋرناليستيكانىڭ توڭىرەگىندە ماتەريالدار جاريالانادى دەپ ويلايمىن.
- جاسوسپىرىمدەر قازىرگى تاڭدا پودكاست اشۋ ءۇشىن قانداي قاعيدالاردى ۇستانعان ءجون؟
- پودكاستينگكە قىزىعۋشىلىق تانىتاتىندار ەڭ الدىمەن بۇل سالانى زەرتتەۋى كەرەك. سودان سوڭ “مەن نە تۋرالى ايتامىن؟”، “مەنى كىم تىڭدايدى؟” دەگەن سۇراقتارعا جاۋاپ تابۋ كەرەك.
- بولاشاق جانە قازىرگى پودكاست جۇرگىزۋشىلەرگە ماڭىزدى ءۇش كەڭەسىڭىزبەن بولىسسەڭىز؟
- مەنىڭ ويىمشا ءبىرىنشى – دارا بولۋ كەرەك. ءسىزدىڭ ءۇنىڭىز، ءسىزدىڭ اقپاراتىڭىز، ءسىز تاڭداعان كەيىپكەر، ءسىزدىڭ باعىتىڭىز. ەكىنشى – تۇراقتىلىق. اشقان، باستاعان، يدەيادان شىنايى تۇردە جۇزەگە اسقان دۇنيە ورتا جولدا قالىپ كەتپەۋ كەرەك. سوندا عانا شىن ناتيجە، ءوسۋ پايدا بولادى. ءۇشىنشى – ساپا جانە ساۋات. ءسىز قانداي ءونىم ۇسىنساڭىز دا ساپالى تۇردە ۇسىنۋىڭىز كەرەك. اقپاراتتار شىنايى، ساۋاتتى جەتكىزىلۋى كەرەك دەپ سانايمىن.
- سۇقباتىڭىزعا كوپ راقمەت!
You Might Also Like
-
ىمىرت ۇيىرىلە بەرە ۇزىن بويلى، اق ساقالدى، ءىرى دەنەلى كىسى بىرنەشە جولداسىمەن اتتان تۇسەدى. الدىنان شىققان بايبىشەسىنە:
-
ابىلاي حان زامانىندا شانىشقىلى بەردىقوجا باتىردى جەرگە تالاسىپ، كەكتەسىپ ءجۇرىپ، رۋى ازدىعىنان وشتەسكەن دۇشپان، وسىپ-ونگەن رۋ تۋعانى كوپتىگىنەن ۇستاپ الىپ ولتىرەيىن دەپ جاتقان ەكەن:
