ايرىقشا روبوت كەدەرگىلەردەن ءوتۋدى ۇيرەندى
Boston Dynamics ەكى اياقپەن تىك ءجۇرىپ، كەدەرگىلەردەن وتە الاتىن گۋمانويد روبوتتاردى دامىتۋمەن اينالىسىپ كەلەدى. كومپانيا Atlas اتتى جاڭا بۋىن روبوتتارىن جانە الەمدى تاڭ قالدىرعان وزگە ۇلگىلەردى جاساپ شىعارعانىمەن اتاقتى بولدى.
Atlas روبوتتارىنىڭ نەسى ەرەكشە؟
روبوت – ادامنىڭ كوشىرمەسى
بويى – 188 سم
سالماعى – 150 كگ
يىعىنىڭ ەنى 76 سم
28 گيدراۆليكالىق جەتەكپەن جابدىقتالعان
Atlas روبوتى بەدەرلى جەرلەردە قوزعالىپ، كەدەرگىلەردەن نىق وتە الاتىن قابىلەتكە يە. ۆيدەودا روبوت قوراپتاردى ءبىر ورىننان ءبىر ورىنعا اۋىستىرىپ جاتقانى انىق كورىنەدى. قوراپتى ودان الىپ كەتسە، ول سونىڭ ارتىنان ەرەدى. الدىڭعى ۇلگىلەردە مۇنداي سەنىمدىلىك بولماعان. ارينە، سانا تۋرالى ايتۋعا ءالى ەرتە، سوندا دا ىلگەرىلەۋ بارى بايقالادى. Atlas اياعىمەن نىق تۇرادى جانە قۇلاپ قالسا، ءوزى كوتەرىلە الادى.
سىناقتان وتكىزۋ كەزىندە روبوت ءبىر اياعىمەن تۇرىپ، تەپە-تەڭدىك پەن تۇراقتىلىعىن كورسەتتى. سىناق جاساۋشىلار Atlas-تى 20 كيلوگرامدىق كىر تاسىمەن يتەرسە دە، قۇلاتا المادى. ول بەدەرلى، كەدەرگىلى جەرلەرمەن قالاي سەنىمدى قوزعالىپ كەلە جاتقانىنا جانە اياقتان شالىپ قۇلاتسا، ورنىنان قالاي كوتەرىلەتىنىنە نازار اۋدارىڭىزدارشى. ءقازىر ينجەنەرلەر وسى ۇلگىنى سىيىمدىلىعى جوعارى قۋاتتاندىرۋ كوزىمەن جابدىقتاۋدى ويلاستىرىپ جاتىر. قۋاتتاندىرۋ كوزى بولماسا، روبوت قۋاتتاندىرۋ كابەلدەرىنە تاۋەلدى.
ازىرلەۋشىدەردىڭ باستى مىندەتى –Atlas-تى جەتىلدىرىپ، قۇتقارۋ وپەراسيالارىنا قاتىسا الاتىن ۇلگى جاساپ شىعارۋ. روبوتتىڭ ادامعا قاراعان سانداعان ارتىقشىلىقتارى بار. ول وتتان، حيميالىق ۋلى زاتتاردان قورىقپايدى، ادامدى ولتىرەتىن اۋرۋلاردان قاۋىپتەنبەيدى. ينجەنەرلەردىڭ ايتۋىنشا، جاعدايدىڭ وزگەرۋىن باقىلاپ، سوعان ساي دۇرىس شەشىم قابىلداي الاتىن ۇلگى جاسالماقشى. اسكەريلەر دە «اتلاسقا» قىزىعۋشىلىق تانىتىپ، كەلەشەكتە ونى اسكەري قيمىلدار جۇرگىزۋ بارىسىندا قولدانعىسى كەلەدى.
Boston Dynamicsء-تىڭ وزگە دە جەتىستىكتەرى
Big Dogاتتى ءتورت اياقتى روبوت 2005 جىلى پايدا بولدى. روبوت ءتورت اياقتاپ ءبىرشاما جاقسى جىلدامدىقپەن قوزعالىپ جۇرە الادى. جوتا، توبەگە شىعۋ ول ءۇشىن قيىن ەمەس. روبوت الىستان، ادامنىڭ قاتىسۋىمەن نەمەسە ءوز بويىنداعى بورت كومپيۋتەرىنەن باسقارىلادى. كومپيۋتەر اۋارايى جانە كليمات جاعدايلارى مەن جولىندا كەزدەسەتىن كەدەرگىلەردى ساراپتاۋعا قابىلەتتى.
PetMan – كومپانيانىڭ باستى جەتىستىگى –تۋرا ادام سياقتى جۇرەتىن روبوت. PetManساعاتىنا 5،5 شاقىرىم جىلدامدىقپەن قوزعالادى، بۇل ەرەسەك ادامنىڭ ورتاشا جىلدامدىعىمەن بارا-بار. ۇلگى ءتىپتى قاراپايىم ادام سياقتى، وكشەسىن باسىپ جۇرە الادى.
Little Dog Big Dog نەگىزىندە جاسالعان، ءبىراق فۋنكسيونالى مەن مۇمكىندىكتەرى مولىراق. روبوت قوپارۋ-جارۋ جۇمىستارىن اتقارا الادى، ءىز كەسۋ، بارلاۋ فۋنكسياسىن ورىندايدى جانە ساپەر بولىپ جۇمىس ىستەي الادى.
قازىرگى تاڭدا كومپانيا جاڭا ۇلگىلەر ازىرلەۋ ۇستىندە ەكەنى بەلگىلى. ارينە، باستى ءۇمىت «Atlas» روبوتىنا جۇكتەلمەك. ول مۇلدە باسقاشا ەتىپ تۇرلەندىرىلىپ، كوبىرەك فۋنكسيونال قوسىلماق. جاقىن ارادا كومپانيا كەلەشەكتىڭ روبوتتارىنىڭ جاڭا مۇمكىندىكتەرىن كورسەتۋگە ۋادە بەرىپ وتىر.
You Might Also Like
-
قازاق ءتىلدى ەمەس مەكتەپتەردە قازاق ءتىلىن وقىتۋدىڭ جاڭا باعدارلاماسى شەت تىلدەرىن وقىتۋدىڭ نەگىزگى قاعيدالارىنان تۇرادى.
-
سانانىڭ ەرەكشە كۇيى – گيپنوز تۋرالى ادامدار ەجەلدەن-اق بىلگەن. سول كەزدىڭ وزىندە-اق وسى قۇبىلىس تۋرالى اڭىزدار كوپ ايتىلاتىن، ويتكەنى گيپنوز تەحنيكاسىن تاڭداۋلىلار عانا مەڭگەرگەن.
