InfoHub Logo

مەكتەپكە دەيىنگى ءبىلىم بەرۋ سالاسىندا سانيتاريالىق قاعيدالار مەن نورمالارعا جانە قۇرىلىس نورمالارى مەن قاعيدالارىنا وزگەرىستەر ەنگىزىلەدى، دەپ حابارلايدى ق ر ءبىلىم جانە عىلىم مينيسترلىگىنىڭ باسپا ءسوز قىزمەتى.

ق ر بعم تاراپىنان وسىنداي شەشىمنىڭ قابىلدانۋىن قازاقستاننىڭ مەكتەپكە دەيىنگى سالاسىنىڭ كوپتەگەن مەكەمەلەرى بىرنەشە جىلدان بەرى كۇتتى. ويتكەنى «بالالاردى مەكتەپكە دەيىنگى تاربيەلەۋ مەن وقىتۋ وبەكتىلەرىنە قويىلاتىن سانيتاريالىق-ەپيدەميولوگيالىق تالاپتاردىڭ» سانيتاريالىق ەرەجەلەرى مەن «مەكتەپكە دەيىنگى ءبىلىم بەرۋ وبەكتىلەرىنىڭ قۇرىلىس نورمالارى مەن قاعيدالارىنىڭ» قۇرىلىس ەرەجەلەرى قازىرگى زامان تالاپتارىنا جاۋاپ بەرە المايدى.

سوڭعى جىلدارى «بالاپان» باعدارلاماسى شەڭبەرىندە ەلىمىزدە مەملەكەتتىك-جەكەمەنشىك ارىپتەستىك (ءمجا) دامي ءتۇستى، كوپتەگەن جەكەمەنشىك بالاباقشالار، ونىڭ ىشىندە كوتتەدجدەردە، تۇرعىن ۇيلەردىڭ ءبىرىنشى قاباتتارىندا اشىلعان بالاباقشالار تيپتىك ۇلگىدە بولماعانىمەن، بالالاردى مەكتەپكە دەيىنگى وقىتۋ مەن تاربيەلەۋدەگى ءبىرقاتار ماسەلەلەردى شەشۋگە سەپتىگىن تيگىزدى. بۇل رەتتە قولدانىستاعى سانيتاريالىق جانە قۇرىلىس نورمالارى  تالاپتارىنىڭ سايكەسسىزدىگى مەكتەپكە دەيىنگى ۇيىمدار جەلىسىن ءارى دامىتۋعا كەدەرگى كەلتىردى.  

مەكتەپكە دەيىنگى ۇيىمداردىڭ سانيتاريالىق جانە قۇرىلىس نورمالارى مەن قاعيدالارىن قايتا تالداۋ قاجەتتىلىگى قوعامدا سان مارتە كوتەرىلىپ، وسى ماسەلە بويىنشا ق ر بعم-گە كوپتەگەن وتىنىشتەر كەلىپ تۇسكەن بولاتىن. مينيستر ەرلان ساعادييەۆتىڭ توراعالىعىمەن، ق ر بعم مەكتەپكە دەيىنگى جانە ورتا ءبىلىم دەپارتامەنتى، بالالاردىڭ قۇقىقتارىن قورعاۋ كوميتەتىنىڭ بالالاردىڭ قۇقىقتارى جانە حالىقارالىق ىنتىماقتاستىق باسقارمالارى، ق ر قۇرىلىس ىستەرى كوميتەتىنىڭ جوبالاۋ جۇمىستارى باسقارماسى، ق ر ۇەم تۇتىنۋشىلاردىڭ قۇقىقتارىن قورعاۋ كوميتەتىنىڭ سانيتاريالىق-گيگيەنالىق قاداعالاۋ باسقارماسى، «مەكتەپكە دەيىنگى بالالىق شاق» رەسپۋبليكالىق ورتالىعى باسشىلارىنىڭ، سونداي-اق مەكتەپ ديرەكتورلارى مەن مەكتەپكە دەيىنگى ۇيىمدار مەڭگەرۋشىلەرىنىڭ قاتىسۋىمەن ءبىرقاتار جۇمىس كوميسسيالارىنىڭ كەڭەستەرى ءوتتى.

ناتيجەسىندە مىناداي تولىقتىرۋلار مەن وزگەرىستەر قابىلداندى:

- ۇعىمدىق اپپاراتقا «قۋاتتىلىعى از عيمارات»، «ىڭعايلاستىرىلعان ءۇي-جاي» (بەيىمدەلگەن ءۇي-جاي) تەرميندەرىن ەنگىزۋ؛

- توپتاردى اعىمداعى جىلعى قىركۇيەك پەن كەلەسى جىلدىڭ قىركۇيەگى ارالىعىندا جيناقتاۋدى جۇزەگە اسىرۋ؛

- ءۇش جانە ودان كوپ كۇن قالعان بالالاردى قانداي دا ءبىر اۋرۋ بەلگىلەرى انىقتالعان جاعدايدا پەدياتر دارىگەرگە جىبەرەتىن مەكتەپكە دەيىنگى ۇيىمنىڭ مەديسينالىق قىزمەتكەرىنىڭ تەكسەرىپ-قاراۋىنان كەيىن قابىلداۋ؛

- كۇن رەجيمىن مەكتەپكە دەيىنگى ۇيىمنىڭ ازىرلەۋى، اتا-انالار كوميتەتىمەن كەلىسۋى جانە ونى مەكتەپكە دەيىنگى ۇيىم باسشىسىنىڭ بەكىتۋى؛

-  مەكتەپكە دەيىنگى ۇيىمدارداعى توپتاردىڭ تولىمدىلىق نورمالارىن بولدىرماۋ، مەكتەپكە دەيىنگى ۇيىمداردىڭ تولىمدىلىعىن جوبالىق قۋاتتىلىعىنان 20%-عا ارتىق قاراستىرۋ؛

- عيمارات الاڭى، شارۋاشىلىق اۋماق، ۋچاسكە، جابدىق بويىنشا نورمالاردى، مەكتەپكە دەيىنگى ۇيىمدى جوبالاۋ، سالۋ، رەكونسترۋكسيالاۋ، جوندەۋ، پايدالانۋعا بەرۋ، سۋمەن جابدىقتاۋ، كارىزدەندىرۋ، جىلىتۋ، جارىقتاندىرۋ، جەلدەتۋ، ميكروكليماتى بويىنشا تالاپتاردى سانيتاريالىق قاعيدالار مەن نورمالاردان الىپ تاستاپ، قۇرىلىس نورمالارى مەن قاعيدالارىنا ەنگىزۋ؛

- تولىق كۇن بولمايتىن مەكتەپكە دەيىنگى ۇيىمدار ءۇشىن بالا تاماعىن وزىمەن بىرگە كونتەينەردە اكەلۋدى، ال تولىق كۇن بولاتىندار ءۇشىن تاماقتاندىرۋ ۇيىمىمەن شارتقا وتىرۋدى قاراستىرۋ.

تالقىلاۋ قورىتىندىسى بويىنشا سانيتاريالىق قاعيدالار مەن نورمالارعا جانە قۇرىلىس نورمالارى مەن قاعيدالارىنا ەنگىزىلەتىن وزگەرىستەر مەن تولىقتىرۋلار قازاقستان رەسپۋبليكاسى ۇلتتىق ەكونوميكا مينيسترلىگىنە جىبەرىلەتىن بولادى.

---