بالاباقشاعا بولىنەتىن قاراجات ونى تاڭداعان اتا-انانىڭ سانىنا بايلانىستى بولادى
وقۋ-اعارتۋ ءمينيسترى اسحات ايماعامبەتوۆ بالاباقشالارعا قويىلاتىن تالاپتار تۋرالى جاڭا بۇيرىقتى ءتۇسىندىردى.
بۇل جايىندا مينيستر Facebook پاراقشاسىندا جازدى.
ونىڭ ايتۋىنشا، مەملەكەتتىك تاپسىرىس الاتىن بالاباقشالارعا قويىلاتىن تالاپتاردى كۇشەيتەتىن بۇيرىق شىققان.
ەندى مەملەكەتتىك تاپسىرىس بالالارعا قولايلى جانە ءقاۋىپسىز جاعداي جاساۋعا باعىتتالعان جاڭا ەرەجەلەر بويىنشا ورنالاستىرىلادى.
اسحات ايماعامبەتوۆ بۇيرىقتىڭ نەگىزگى تارماقتارىنا توقتالىپ ءوتتى.
1. مەملەكەتتىك تاپسىرىس العىسى كەلەتىن بارلىق بالاباقشاعا قوسىمشا تالاپتار ەنگىزىلدى.
ونىڭ ىشىندە:
— ورتكە جانە تەرروريزمگە قارسى قاۋىپسىزدىكتى قامتاماسىز ەتۋ ءۇشىن جاعداي جاساۋ. سونداي-اق دابىل تۇيمەسى مەن ىشكى داۋىستىق ەسكەرتۋ جۇيەسى بولۋى قاجەت.
— مىندەتتى تۇردە بەينەكامەرا ورناتۋ.
— ەرەكشە ءبىلىم بەرۋ قاجەتتىلىگى بار بالالار ءۇشىن ارنايى جاعداي جاساۋ.
— بالاباقشا عيماراتتارى مەن ءۇي-جايلارىنىڭ سانيتارلىق نورمالارعا سايكەستىگى.
— بالالارعا قولايلى پاندىك دامىتۋ ورتاسىن قالىپتاستىرۋ ءۇشىن بالاباقشالاردى قاجەتتى قۇرال-جابدىقتارمەن جانە جيھازدارمەن جابدىقتاۋ.
— مەديسينالىق كومەك كورسەتۋمەن قامتاماسىز ەتۋ.
2. مەكتەپكە دەيىنگى ۇيىمداردىڭ پەداگوگتەرىنە قويىلاتىن تالاپتار كۇشەيتىلدى. تاربيەشىلەردىڭ بالالارمەن جۇمىس ىستەۋى ءۇشىن ءتيىستى بىلىكتىلىگى جانە/نەمەسە ءبىلىمى بولۋى قاجەت.
3. مەملەكەتتىك تاپسىرىستى ورنالاستىرۋ تەتىگى وزگەرتىلدى. بۇرىن ءبىلىم باسقارمالارى مەملەكەتتىك تاپسىرىستى ورنالاستىرعان كەزدە بەلگىلى ءبىر بالاباقشاعا ناقتى ورىن سانىن كورسەتسە (مىسالى، «بالبوبەك» - 100، «ەركەتاي» - 100 ورىن)، ەندى بارلىق تالاپقا سايكەس كەلەتىن بالاباقشالار مەملەكەتتىك تاپسىرىس الاتىن ۇيىمداردىڭ جالپى تىزبەسىنە ەنگىزىلەدى.
سودان كەيىن اتا-انالاردىڭ وزدەرى بالاباقشاعا جولداما العان كەزدە وسى تىزىمنەن ناقتى بالاباقشانى تاڭداي الادى. ياعني قانشا اتا-انا بالاباقشانى تاڭداسا، سول ورىندارعا سايكەس قارجىلاندىرۋ بالاباقشاعا تۇسەدى.
4. مەملەكەتتىك تاپسىرىستى الۋ ءۇشىن قۇجاتتار سانى قىسقارتىلدى. ەگەر بۇرىن جەكەمەنشىك مەكتەپكە دەيىنگى ۇيىمدار كوپ قۇجاتتى ۇسىنۋ قاجەت بولسا، ەندى ءتىزىم 4 قۇجاتقا دەيىن قىسقارتىلدى. قالعان قۇجاتتار اقپارات جۇيەلەرىنەن الىنادى.
5. ەلەكتروندى تۇبىرتەكتەر ەنگىزىلەدى. بۇل شارا «جالعان ورىنعا» اينالعان تاۋەكەلدەردى ازايتۋعا كومەكتەسەدى. ياعني مەكتەپكە دەيىنگى ۇيىم قارجىلاندىرۋ الىپ، ءبىراق بالالاردىڭ مالىمدەلگەن سانى سايكەس كەلمەگەن جاعدايدا.
6. ەندى ءبىلىم باسقارمالارىنا مەملەكەتتىك تاپسىرىستى ورنالاستىرۋ تىزبەسىنە ەنگىزۋ تۋرالى شەشىم قابىلداعانعا دەيىن بالاباقشالاردىڭ جۇمىسىمەن، جاعدايىمەن تانىسۋ قۇقىعى بەرىلدى. سونداي-اق سىبايلاس جەمقورلىق تاۋەكەلدەرىنىڭ الدىن الۋ ماقساتىندا مۇنداي مونيتورينگ مىندەتتى تۇردە بالاباقشالار قاۋىمداستىعى وكىلدەرىنىڭ قاتىسۋىمەن جۇرگىزىلۋى كەرەك.
7. ءراسىمنىڭ اشىقتىعى ءۇشىن وتىنىمدەر مەن بارلىق قۇجاتتى كوميسسيا مىندەتتى تۇردە بەينە جانە اۋديوجازبامەن قارايدى.
«سونىمەن بىرگە مەملەكەتتىك تاپسىرىستى الۋ ءۇشىن بەرىلگەن وتىنىمدەر مەن قۇجاتتاردى ەندى ءبىلىم ءبولىمى سايتقا ورنالاستىرۋى ءتيىس. قوعام ۇسىنىلعان قۇجاتتاردى كورە الۋى ءۇشىن جانە سونىڭ نەگىزىندە وسى مەكتەپكە دەيىنگى ۇيىمدار مەملەكەتتىك تاپسىرىس الۋشىلار تىزىمىنە ەنگىزىلگەن. بۇل شارا سىبايلاس جەمقورلىق تاۋەكەلدەرىن ازايتىپ، مەملەكەتتىك تاپسىرىستى ورنالاستىرۋدىڭ اشىقتىعىن قامتاماسىز ەتۋى كەرەك» دەيدى مينيستر.
You Might Also Like
-
ق ر وقۋ-اعارتۋ ءمينيسترى اسحات ايماعامبەتوۆ مەكتەپتەردى كۇزەتۋ ءۇشىن ارنايى وقۋ-جاتتىعۋ وتكىزۋدى ۇسىندى. ونىڭ پايىمىنشا، مەكتەپتەردەگى مامانداندىرىلعان كۇزەت قىزمەتكەرلەرىنىڭ جۇمىسى كوڭىل كونشىتپەيدى.
-
بيسميللا، ولەڭ باسى توي باستالىق، بۇل تويدى اسىقپاستان جاي باستالىق. سارسەنبى ءساتتى كۇنى توي جاساپسىز، بۇل تويىڭ قۇتتى بولسىن، دەي باستالىق. بۇل تويعا جەكجات، تۋىس كەلىپ جاتىر، اق باتاسىن جۇبا...
