InfoHub Logo

ق ر وقۋ-اعارتۋ ءمينيسترى اسحات ايماعامبەتوۆ مەكتەپتەردى كۇزەتۋ ءۇشىن ارنايى وقۋ-جاتتىعۋ وتكىزۋدى ۇسىندى. ونىڭ پايىمىنشا، مەكتەپتەردەگى مامانداندىرىلعان كۇزەت قىزمەتكەرلەرىنىڭ جۇمىسى كوڭىل كونشىتپەيدى.

ەڭ الدىمەن مينيستر قىزمەتكەرلەردىڭ ءجيى اۋىساتىنىن، ءتىپتى كۇن سايىن اۋىساتىنىن اتاپ ءوتتى، بۇل مەكتەپتەردەگى بالالاردىڭ قاۋىپسىزدىگىن قامتاماسىز ەتۋگە تەرىس اسەر ەتەدى.

وعان قوسا، كۇزەتشىلەر بالالاردىڭ مىنەز-قۇلقى مەن مەكتەپ ءتارتىبىن ءبىلۋى كەرەك.

«ءبىز مەكتەپتەردە مامانداندىرىلعان كۇزەت اگەنتتىكتەرى بولۋى كەرەك دەگەن شەشىم قابىلداعاندا نەگىزىنەن ءتيىستى قارسىلىق كورسەتە المايتىن نەمەسە قاۋىپسىزدىكتىڭ ءتيىستى دەڭگەيىن قامتاماسىز ەتە المايتىن ۆاحتەرلاردىڭ ورنىنا وسى تالاپتارعا ساي كەلەتىن ماماندار كەلگەنىن قالادىق. ءبىراق ءقازىر كەيبىر فاكتىلەر مامانداندىرىلعان كۇزەت اگەنتتىكتەرى ارقىلى كەلگەن قىزمەتكەرلەردىڭ بىزبەن بۇرىن جۇمىس ىستەگەن ارىپتەستەرىنەن ەش ايىرماشىلىعى جوق ەكەنىن كورسەتتى. ءبىز ءۇشىن ءبىرىنشى كەزەكتەگى ماسەلە – قاۋىپسىزدىكتى قامتاماسىز ەتۋ. سوندىقتان، ءبىلىم باسقارماسى شارتتار جاساسقاندا تالاپتار مەن كونكۋرستىق قۇجاتتامادا وسى جايتتاردى ەسكەرىپ، قاۋىپسىزدىك كومپانيالارىنان بارلىق قاجەتتى داعدىلار مەن قۇزىرەتتەردى تالاپ ەتۋى كەرەك. وسىنىڭ ءبارىن بايقاۋ وتكىزۋ كەزىندە تالاپقا ساي كەلتىرۋ كەرەك»، - دەدى مينيستر اپپاراتتىق جينالىستا.

مينيستر مەكتەپتەردىڭ كەز كەلگەن وقىس جاعدايلارعا دايىن بولۋى كەرەكتىگىن، ولارعا ارەكەت ەتۋ الگوريتمىن ىشكى ىستەر مينيسترلىگىمەن، توتەنشە جاعدايلار مينيسترلىگىمەن جانە باسقا دا مۇددەلى ورگاندارمەن بىرگە جاڭارتۋ قاجەتتىگىن ايتتى.

«ەگەر مۇنداي مۇمكىندىك بولسا، ولارمەن ءتيىستى جاتتىعۋ وتكىزۋ كەرەك. بالالارىمىزدىڭ قاۋىپسىزدىگىن قامتاماسىز ەتۋ ءۇشىن جان-جاقتى شارا قابىلداۋ قاجەت»، - دەدى وقۋ-اعارتۋ ءمينيسترى.

---