InfoHub Logo

بۇگىنگىنىڭ بۇلدىرشىندەرى «جازدا اتاسىنىڭ اۋىلىنا بارعاندا، الدىنان ويناقتاپ شىعاتىن قوشاقاندى»، «ەلدىڭ جىرىن جىرلاعان، قايعىسىندا تولعاعان قارا دومبىرا  جايلى اندەردى مەنسىنبەيدى. بولاشاق جۇلدىزدارىمىزدىڭ سالعان  اندەرىنە كوز جۇگىرتەر بولساق، بەسىكتەن بەلى شىقپاي جاتىپ «قۇدايىم، ەندى ءبىزدى ايىرماشى، ماحاببات بار ەكەنىن مويىنداشى...» نەمەسە «ارمان-اي، تىم الىسقا اكەتتىڭ-اۋ سەن مەنى...» دەپ جاۋاپسىز ماحابباتتىڭ قۇربانىنداي ماحاببات ماشاقاتى تۋرالى   اندەردى تۇسىنبەسە دە  توگىلتە،  اسقاق داۋىسپەن شىرقاپ تۇرادى.  «مۇرتقا وكپەلەگەندە ساقال شىققانداي»  «شىمكەنتتىڭ سالقىن سىراسى...»  دەگەن سازگەر  ەرجان سەرىكبايەۆتىڭ ءانى بالدىرعانداردى   ىشىمدىك الەمىنە جەتەلەپ اكەتتى. مىنە، قازىرگى بالالاردىڭ  اۋزىنان تاستاماي ايتاتىن اندەرى وسىنداي. ارينە، تۋعان جەرگە، اتا-اناعا، ۇستازعا ارنالعان اندەردى اۋەلەتە ايتاتىن جەتكىنشەكتەرىمىزدە بار. سايىپ كەلگەندە، ولاردى كەزدەستىرۋ ساۋساقپەن سانارلىقتاي. بالدىرعانداردىڭ بالعىن   بالالىق تۋرالى اندەردەن اۋىلى نەگە الىس؟ دەگەن  سۇراققا جاۋاپ ىزدەستىرىپ كورىپ ەدىك... بالالار اندەرىنە قالام تەربەپ جۇرگەن اقىن، سازگەرلەرىمىز نەكەن-ساياق ەكەن...

ەندى مەكتەپ قابىرعاسىندا ايتىلىپ جۇرگەن اندەرگە كوز تاستاساق،

كۇندەي تازا كوڭىلى قارداي اپپاق پاراقتان،

ەڭ العاشقى ماحاببات باستالادى ساباقتان دەگەن بارىمىزگە تانىس جولداردان تۇراتىن ءاندى  ەستىگەندە ەلەڭ ەتە قالارىمىز جاسىرىن ەمەس... بالالىق شاقتىڭ ەستەلىگىندە قالاتىن ءسات ول – پەرىشتەدەي  بالا ماحاببات.  وسى ءان جونىندە الەۋمەتتىك جەلىدە وقۋشىلاردىڭ تاربيەسىنە كەرى ىقپال تيگىزىپ جاتقان جوق پا؟ دەپ  ساۋالناما جۇرگىزدىك، حالىقتىڭ كوپشىلىگى كەرى اسەرى جوق  دەپ تۇجىرىمدادى. البەتتە ، تالعامعا تالاس جوق! ماسەلەن، تانكايەۆا اراي بىلاي دەگەن بولاتىن. « ءسوزدىڭ ءتۇپ ماعىناسىندا مىندەتتى تۇردە پارتالاسىڭا نە سىنىپتاسىڭا عاشىق بولۋ كەرەك دەگەن ءسوز ەمەس قوي. مەنىڭشە، العاشقى ماحاببات 11 جىل بويى تابالدىرىعىن توزدىرعان مەكتەپ قابىرعاسىندا باستالادى دەگەنى كوبىنىڭ ەڭ پاك دەگەن سەزىمى وسى بالعىن كەزدەن باستالادى دەپ ويلايمىن. بالالار پسيحولوگياسىنا كەلەر بولساق، ولاردىڭ ساناسىن ونسىز دا تەلەديدار ۋلاپ جاتىر، اندەگى ءبىر ءسوز اسەر ەتەدى دەپ ويلامايمىن». وتاش گۇلبانۋ دا وسىنداي ويدا. « ەڭ العاشقى ماحاببات شىنىمەن پارتادان باستالادى. ءبىز قانشا جەردەن بىلىمگە نۇقسان كەلتىرەت دەسەك تە،  ول-زاڭدىلىق! ونى بالا ماحاببات، العاشقى ماحاببات دەسەك تە بولادى. ونىڭ ورنى ايىرىقشا» دەپ ءسوزىن اياقتادى. ال شاتتىق اتتى 10 سىنىپ وقۋشىسى « اسەر ەتەدى. وقۋشىلاردىڭ  سوڭعى نە العاشقى قوڭىراۋلارىندا وسى ءان ءجيى ايتىلادى. وقۋشىلارعا ءان اسەر ەتىپ، مەكتەپتە ءسوز بايلاسادى»  دەپ وي ءتۇيدى. ايگىلى اقىن، ءتىل جاناشىرى م.شاحانوۆتىڭ:

سەزدىرۋگە باتپادىم دا

بالا ماحابباتىمدى.

تەرەزەنىڭ جاقتاۋىنا،

ويىپ جازدىم اتىڭدى - دەگەن  قۇلاققا تانىس انىنە كەلەر بولساق،  بۇل انگە  كەڭەس ۇكىمەتى كەزىندە تىيىم سالىنىپتى دەسەدى. سەبەبى وسى ءاندى ەستىگەن وقۋشىلار تەرەزەنىڭ جاقتاۋىنا عاشىقتارىنىڭ ەسىمدەرىن ويىپ  جازۋدى ادەتكە اينالدىرىپ ، مەكتەپ تەرەزەلەرىن بۇلدىرگەن.

توقسان اۋىز ءسوزدىڭ توبىقتاي ءتۇيىنى، بالالار اندەرى كۇرمەۋى كوپ كۇردەلى ماسەلەلەردىڭ ءبىرى. بۇل تۋرالى بالاقايلاردى دا، اتا-انانى دا، سازگەر، اقىنداردى دا جازعىرا المايمىز. نەگىزگى قاتەلىك ءبارىنىڭ انگە دەگەن سالعىرت قاراۋىنان. ءاننىڭ ويناقىلىعىنا، تەز جاتتالۋىنا عانا ءۇڭىلىپ، تەرەڭ ماعىناسىن ەلەمەۋدىڭ سالدارىنان بولىپ تۇر. اقىندار، سازگەرلەر بالالارعا ارنالعان اندەردى دە كوپتەپ  جارىققا شىعارسا، شىعارىپ قانا قويماي، جاريالاسا يگى ەدى... ال اتا- انالار بالاسىنىڭ تالانتىنا تامسانىپ  قانا قويماي، ءاننىڭ سوزدەرىن دە نازاردان تىس قالدىرماعاندارى ابزال. سوندا عانا بالالار بالالىق شاق تۋرالى اندەردەن كەندە بولماس پا ەدى... 

---