InfoHub Logo

باكەننىڭ كەيدە وتىرىك ايتا سالاتىن دا مىنەزى بار ەدى. ءبىراق باكەننىڭ بۇل مىنەزىنەن زيان كورىپ ءجۇرمىن دەگەن پەندە جوق. ونىڭ ۇستىنە باكەننىڭ بۇل سوزدەرىنىڭ ءوزى دە قيۋلاسپايتىن، جوباسى كەلمەيتىن سوزدەر ەدى. ونىسىن ىلە-شالا باكەننىڭ ءوزى دە مويىنداپ، "ايتا سالامىز عوي ءبىز دەگەن" دەپ ءوزى دە كۇلىپ وتىراتىنى بار. باكەن بۇل سوزدەردى بىرەۋگە زارداپ شەكتىرەيىنشى، سودان پايدا كورەيىنشى دەگەن ويمەن ايتپايدى. ءوزىنىڭ مىنەزى سول. دەگەنمەن باكەننىڭ وسىنداي اڭداۋسىز ايتىپ قالعان سوزىنەن بىردە باكەڭ زارداپ شەگىپ قالىپتى. باكەڭ دەگەن باكەندەرگە قاراعاندا جاسى ۇلكەن كىسى عوي. بىردە باكەڭ اياعىنا اۋلانىڭ ىشىنە ىلە شىققان سۇيرەتپەسىن كيىپ الىپ، ءۇيىنىڭ كوشە جاق بەتكەيىندەگى وتىرعىشتا دەمالىپ وتىرادى. ءدال وسى ساتتە كوشە بويىمەن تازا كيىمىن كيىپ العان، ەكى قولىن قالتاسىنا سالعان كۇيى باكەن كەلە جاتادى. باكەن جاسى ۇلكەن باكەڭدى كورىپ سالەم بەرۋ ءۇشىن بۇرىلادى. باكەڭنىڭ ءوزى بالىقتى جاقسى كورەتىن كىسى مە، الدە جۇرتتىڭ ءبارى دە بالىقتان جاسالعان تاعامعا كەت ءارى ەمەس پە، باكەڭ ءدال وسى تۇرعاندا بالىق تۋرالى ويلاپ وتىرسا كەرەك. باكەنگە سۇراقتى بەرىپ كەپ قالادى:

- باكەن، بالىق شىعىپ جاتقان جەردى بىلمەيسىڭ بە؟

وسى جەردە باكەن ءوزىنىڭ كانىگى مىنەزىنە كوشەدى.

- كانالدا سۋ تارتىلىپ قالىپتى عوي، - دەيدى باكەن. - جۇرت دەگەن بالىقتى شانىشقىمەن الىپ جاتىر.

مىنانى ەستىگەندە باكەڭنىڭ كوزى جايناپ كەتەدى:

- وندا بارايىق تا سول كانالعا! شانىشقىمدى الىپ شىعايىن!

باكەن ءىس وسىلاي ناسىرعا شاۋىپ كەتەر دەپ ويلاماعان ەدى. ەندى جاي عانا ايتا سالىپ ەدىم دەپ ايتا المايدى. سول جەردە باكەڭنىڭ جانىنان كەتكەنشە اسىعادى.

- مەن وندا ۇيگە بارىپ كيىمىمدى اۋىستىرىپ كەلەيىن دە، - دەيدى باكەن. - مىنا تازا كيىمىم ءبۇلىنىپ قالىپ جۇرەر.

- بار وندا، تەز بارىپ كەل! - دەيدى باكەڭ باكەندى اسىقتىرىپ. - مەن شانىشقىمدى دايىنداپ كۇتىپ وتىرا بەرەيىن.

باكەن سول كەتكەننەن مول كەتەدى. باكەڭ ونى ءارى كۇتىپ، بەرى كۇتىپ، اقىرى كەلمەگەن سوڭ، شانىشقىسىن الىپ، اۋىل سىرتىنداعى كانالعا اياعىنداعى سۇيرەتپەسىمەن-اق تارتىپ وتىرادى. كانال باسىنا كەلسە، بالىق اۋلاپ جۇرگەن ادام جوق. كانال دەگەن يەكتەن كەلىپ سۋعا تولىپ تۇر. ءدال سول ۋاقىتتا قاس قىلعانداي جاڭبىر جاۋىپ كەتەدى. ال جاڭبىر جاۋسا، كانالدىڭ باسى اياققا جەلىمدەي جابىساتىن ساز باتپاققا اينالادى. باكەڭنىڭ اياعىنداعى سۇيرەتپەسى ساز باتپاقتا قايتا-قايتا ءتۇسىپ قالىپ، ۇيىنە ارەڭ جەتىپتى. كەلگەنشە باكەندى تۇك قالدىرماي سىباپ كەلەدى. ەندى باكەڭ باكەنگە رەنجىپ جۇرەدى. باكەڭ باكەنگە رەنجىپ جۇرسە، باكەن: "اڭگىمە بولسىن دەپ ايتا سالعان سوزگە سەنە قالعانى نەسى؟ بالىق شىعىپ جاتسا، مەنىڭ ءوزىم سول جەردە وتىراتىن با ەدىم؟" - دەپ، كەرىسىنشە باكەڭە رەنجىپ جۇرگەن كورىنەدى. باكەننىڭ ءسوزىنىڭ دە قيسىنى بار. باكەننىڭ ءوزى دە بالىق دەسە، جانىن بەرەتىن جانداردىڭ ءبىرى عوي.

---