InfoHub Logo

ءوزىن - ءوزى تانۋ 4 سىنىپ
تاقىرىبى: باتىلدىق پەن وجەتتىك
ماقساتى:
وقۋشىلاردىڭ «حالىق»، «وتان»، «ماحاببات» قۇندىلىقتاردى تۋرالى تۇسىنىكتەرىن كەڭەيتۋ؛
مىندەتتەرى:
- باتىلدىق، وجەتتىك ۇعىمدارى تۋرالى تۇسىنىك بەرۋ؛
- شەشىم قابىلداي ءبىلۋ ىسكەرلىكتەرىن دامىتۋ؛
- باتىلدىققا، وجەتتىككە، وتانسۇيگىشتىككە تاربيەلەۋ.
كورنەكى قۇرالدار: وقۋلىق، ءۇنتاسپا
شاتتىق شەڭبەرى
بالالار مۇعالىممەن بىرگە شاتتىق شەڭبەرىن قۇرىپ تۇرادى.
كوڭىلدى ءان شىرقايدى.

بالدىرعاندار ءانى
ءسوزىن جازعان و. اۋباكىروۆ
ءانىن جازعان ش. قالداياقوۆ
قۋانىشقا بولەنگەن ءار كۇنىمىز،
باقىتتىمىز، بالالار، بارلىعىمىز.
قايىرماسى:
ءومىر تىم جايدارى،
قىزىقتىڭ قاينارى،
باقشامىز جاينادى.

ءبىز - وتاننىڭ بالدىرعان ۇلدارىمىز،
ادەپتىلىك، باتىلدىق - ۇرانىمىز.
قايىرماسى
ماتىنمەن جۇمىس
ساباق تاقىرىبىنىڭ ءمانىن ءتۇسىندىرۋ ماقساتىندا اڭگىمەلەۋ جۇرگىزۋ.
بالالاردىڭ وزدىگىمەن ءماتىندى ءتۇسىنىپ وقىپ شىعىپ، پىكىرلەرىن تىڭداۋ.
«قويشى قاھارمان» ەرتەگىسى.
بالالاردىڭ پىكىرىن ءبىلۋ ماقساتىندا سۇراقتار قويۋ:
* قاھارمان باتىردىڭ ەرجۇرەك باتىرلىعىن قانداي ءىس - ارەكەتىنەن بايقادىڭدار؟
* قاھارمان باتىردىڭ تاعى قانداي جاقسى قاسيەتتەرى تۋرالى ايتا الاسىڭدار؟
* وزدەرىڭنىڭ بويلارىڭدا باتىلدىق بار دەپ ويلايسىڭدار ما؟ نەلىكتەن؟
* باتىلدىق، وجەتتىك كورسەتكەن كەزدەرىڭ بولدى ما؟
* باتىل بولۋ ءۇشىن نە ىستەۋ كەرەك دەپ ويلايسىڭدار؟

دايەكسوز
بالالاردىڭ جاۋاپتارى دايەكسوزدىڭ تۇسىندىرىلۋىمەن جانە جاتتىعۋ جۇمىسىنىڭ ورىندالۋىمەن تۇيىندەلەدى.
- بويىندا باتىلدىعى بار ادام باتىر بولا الادى. ال باتىل بولۋ ءۇشىن وجەت، ءتوزىمدى، شىدامدى، سابىرلى، اتا - اناسىن، ەلىن، جەرىن سۇيەتىن، قورقۋدى بىلمەيتىن ادام بولۋ كەرەك. ونداي ادام باتىر بولا الادى. سوندىقتان دا حالىق «باتىل بولماي، باتىر بولمايدى» دەپ تەگىن ايتپاعان.

جاڭا اقپارات «جاقسى ءسوز ادامداردى قۋانىشقا بولەيدى. ولاردىڭ قارىم - قاتىناسىن جاقسارتۋعا ىقپال ەتەدى. ادامدار ءبىر - بىرىمەن جاقسى سويلەسۋ ارقىلى سىيلاستىققا، دوستىققا قول جەتكىزەدى.»

جاتتىعۋ
وقۋشىلارعا تاريحتاعى باتىرلاردى ەسكە ءتۇسىرۋ ۇسىنىلدى. ولاردىڭ بويىنداعى قاسيەتتەردى ەسكە تۇسىرە وتىرىپ، باتىلدىق ۇعىمىنا توپتاستىرۋ جاسايدى.
كۇتىلەتىن جاۋاپتار: وجەت ادام، قورىقپايتىن، ءتوزىمدى، سابىرلى، دەنساۋلىعى مىقتى، شىنىققان، وتانىن سۇيەتىن، قايسار جانە ت. ب.

سەرگىتۋ ءساتى
ادام بويىنا باتىلدىقتىڭ قالىپتاسۋىنا جانە جاتتىعۋلارىنىڭ دا اسەرى بار ەكەندىگى ەسكە ءتۇسىرىلىپ، بالالاردىڭ دەنەسى سەرگىتىلەدى جانە ويىن ۇيىمداستىرىلادى.
شىنىعامىز جاستاي ءبىز، (ورىندارىنان تۇرادى)
جاتتىعۋدى باستايمىز. (قولدارىن بۇيىرلەرىنە قويادى)
ءبىر، ەكى، ءۇش، (قولدارىن العا، جوعارى، جانىنا سوزادى)
ءبىر، ەكى، ءۇش، (قولدارىن العا، جوعارى، جانىنا سوزادى)
بويعا جيناپ كۇش. (قولدارىن ىشكە بۇگەدى)

ويىن
بالالار جارتى شەڭبەر قۇرىپ تۇرادى. ورتاعا ۇزىندىعى 2 - 3 مەتر بولاتىن ءتۇزۋ سىزىق سىزىلادى. مەجە بەلگىلەنەدى. ورتاعا ءبىر ويىنشىدان شىعادى. ويىنشىنى ويىن باسقارۋشى ورنىندا تۇرىپ اينالدىرادى. بىرنەشە رەت اينالعاننان كەيىن سىزىلعان سىزىقتىڭ بويىمەن ەكى قولىن جايىپ ءتۇپ - ءتۇزۋ ءجۇرۋ كەرەك. كىم مەجەگە سىزىقتىڭ بويىنان اۋىتقىماي ءتۇزۋ ءجۇرىپ جەتسە، سول باتىل، جەڭىمپاز اتانادى. جەڭىمپازداردى ماراپاتتايدى، قول شاپالاقتاپ قوشەمەتتەۋ.
تاپسىرما
«ومىردە ەرلىككە ورىن جەتەدى» تاقىرىبىندا اڭگىمەلەۋ.
داپتەرمەن جۇمىس
وقۋشىلاردىڭ ساباقتا العان بىلىمدەرى پىسىقتالادى.
1 - تاپسىرما.
داپتەردە بەرىلگەن ءسوزجۇمباقتى شەشۋ.
2 - تاپسىرما: حالقىمىزدىڭ باتىر، وجەت ازاماتتارىنىڭ ءبىرى تۋرالى شاعىن اڭگىمە جازۋ.
قورىتىندىلاۋ
- باتىلدىق - ادام بويىنداعى جاقسى قاسيەتتەردىڭ ءبىرى. ادام باتىل بولۋ ءۇشىن بالا كۇنىنەن دەنەسىن شىنىقتىرىپ، سالاۋاتتى ءومىر ءسۇرۋ كەرەك. حالىق باتىرلارىنىڭ ءومىرىن ماقتانىش، ۇلگى تۇتا بىلەيىك.
جۇرەكتەن جۇرەككە
بالالار ءبىر – بىرىنە جىلى لەبىزدەرىن بىلدىرەدى:
- ءبىر - ءبىرىمىزدى قيىن ساتتەردە قولداي بىلەيىك.
- دەنىمىز ساۋ بولسىن.
- بويىمىزعا باتىلدىقتى، باتىرلىقتى دارىتا بىلەيىك جانە ت. ب.
ولەڭ وقىتۋ

باتىر اتا
ءو. تۇرمانجانوۆ
«باتىر!» دەگەن بارشا سۇيگەن جاقسى ءسوز،
التىن تۋى سياقتى ول عاسىردىڭ.
باتىر اتا: « باتىر بول!»- دەپ ۇراندار!
ەستىڭدەر جاس جەتكىنشەك قىراندار!
باتىر بولىپ، تۋعان جەردى قورعاۋدى -
«شىن باقىت!»- دەپ تىلەك ەتىپ سۇراڭدار.