باتپاققا پىسكەن بالىقتار
… تۇسكە تاياۋ سانسىزباي اعاي تۇستىك ازىرلىگىنە كىرىسۋدى ەسكەرتتى. ۇل بالالارعا قولايلى جەردەن وشاق قازىپ، وتىن جيۋدى تاپسىردى دا، ءوزى قارماعىن الىپ وزەنگە قاراي كەتتى. دايىن بولعان وشاققا قازان اسىپ، سۋ تولتىرعان قىزدار، ىلە ارشىعان كوكونىستەرىن اكەپ سالا باستادى. ءبىز جەكسەنبى كۇنى تاۋ اراسىندا سەرۋەن قۇرىپ جۇرگەن بولاتىنبىز.
ءبىرازدان كەيىن اعاي قايتىپ كەلدى. قولىندا ءتورت بالىق. قارماعىن قويا سالدى دا، دەرەۋ تازالاۋعا كىرىستى. بۇل كەزدە قازانداعى سۋ دا قايناي باستاعان ەدى.
ۇزاماي اعاي تاپ-تۇيناقتاي تازالانعان بالىقتاردىڭ ىشىنە قازانداعى پىسكەن كارتوپ، ءسابىز، پياز، سارىمساقتاردى سالۋعا كىرىستى. ءبىز تاڭىرقاپ قاراپ تۇرمىز. ارتىنشا اعاي بالىقتاردى فولگا قاعازىنا ورادى. ءسويتتى دە، ولاردى سىرتىنان قالىڭ ەتىپ ساز بالشىقپەن سىلاپ، وشاقتاعى قىزىل شوققا كومدى.
از-كەمنەن كەيىن قوز استىنداعى كۇلدى-كومەش كومبەنى قازىپ الدى. بىلقىلداعان بالشىق الدەقاشان تاس كەسەككە اينالىپتى. سانسىزباي اعاي ەندى كەپكەن قابىرشىقتاردى ۋاتىپ، ارشي باستادى. ىشىندەگى بالىقتىڭ بىلقىپ پىسكەنى كورىنىپ تۇر. ءيىسى مۇرىن جارادى. قاراپ تۇرىپ سىلەكەيىمىز شۇبىردى.
تاڭسىق ءدامدى ورتاعا الىپ، اۋىز تيۋگە كىرىستىك. ءيىسى مۇرىن جارعان تاماشا تاعامنىڭ ءدامى دە ءتىل ءۇيىرگەندەي ەكەن.
ءبىز سانسىزباي اعايدىڭ ونەرىنە ءتانتى بولىپ، قول سوقتىق.
You Might Also Like
-
ماقساتتىڭ اتاسى جىلقى باعادى. ونى ءاردايىم كۇتىپ، باپتايدى. كوكتەم، جاز، كۇز جانە قىس مەزگىلدەرىندە اتاسى ماقساتتى وزىمەن بىرگە ەرتىپ، جىلقىلاردى كورىپ قايتادى. اتاسىنىڭ اتتارى ونشا كوپ ەمەس.
-
— سەن وتىرىك ايتىپ تۇرسىڭ، جاقسى بالا سويتە مە ەكەن،— دەدى ءىنىم كوزىمە كوزىن قاداپ تۇرىپ.
