بايگەتورى
قاناتتىڭ قۋانىشىندا شەك جوق. ەرتەڭ اتاسى ەكەۋى مال بازارىنا بارماق. اتاسىنىڭ ايتۋىنشا، قاناتقا ات ساتىپ اپەرەدى. بىلتىردان بەرى ءمىنىپ جۇرگەن تايى — بيىل قۇنان. ايتسە دە، قانات:
— اتا، ات الىپ بەرىڭىزشى!— دەپ قوياردا-قويماي وتىنە بەردى.
— بالام-اۋ، اتتى نە قىلاسىڭ؟ مىنا قوڭىر قۇنان دا ءبىر وزىڭە جەتپەي مە؟— دەدى اتاسى ماقتاۋىن جەتكىزىپ.
— دۇرىس قوي، اتا، ايتقانىڭىزدىڭ ءبارى راس. ءبىراق مەن بيىل بايگەگە شاپسام دەپ ەدىم.
— ە، سولاي دە. مەن سەنى ءالى كىشكەنتاي ما دەسەم، بايگەگە شابار بالانىڭ ءسوزىن ايتتىڭ-اۋ،— دەدى اتاسى.
قانات اتاسىنىڭ كوكەيدە جۇرگەن ويىن ايتقانىنا شىن قۋاندى.
— ماقۇل ما، اتا؟
— بولدى، بالام. سەن مەنى كوندىردىڭ. بايگەگە قوسىلام دەسەڭ، جولىڭدى توسىپ نە بار. ايتقانىڭ بولسىن.
تاڭ اعارا قانات پەن اتاسى اۋدان ورتالىعىنداعى مال بازارىنا كەلدى. ءتورت تۇلىك مالدىڭ ءبارى وسىندا ەكەن. وڭ شەتتە — سيىرلار، سول شەتتە — قويلار، ورتادا — ەشكىلەر، ىشكەرىرەكتە — جىلقىلار. ءۇيىر-ۇيىر بولماسا دا، ارقانعا بايلانىپ، كىسىنەسىپ، شۇرقىراسىپ تۇر.
اتاسى مەن قانات بىردەن اتتارعا كوز سالدى. سۇلىكتەي قارا، كوكتەڭبىل، بوز، قارا، قوڭىر، اق، شۇبار اتتاردان كوز سۇرىنەدى.
— بالام، الاتىن اتىڭدى ءوزىڭ تاڭدا!— دەدى اتاسى قاناتقا. سىناعانى ەمەس، ەرىكتى نەمەرەسىنىڭ وزىنە بەردى. قانات اۋىلداعى اتتاردىڭ، قۇنان مەن تايلاردىڭ قايسىسى مىقتى، اۋىزعا ىلىنەرى بار ما، ءبارىن دەرلىك اتاسىنا ايتىپ جۇرەدى.
اتاسى دا اۋىل-ايماقتاعى اتتاردان تۇگەل حاباردار. قاناتتىڭ ايتىپ، ماقتاعان اتتارىنا باسىن يزەپ وتىردى. ونىسى — قاناتپەن كەلىسكەن بەلگىسى.
— اتا،— دەدى قانات بازار ىشىندەگى اتتاردى تۇگەل ارالاپ بولعان سوڭ.— سىزگە قايسىسى ۇنادى؟
— اناۋ كوكتەڭبىل.
— ءيا. ول ات جاقسى، اتا. ءتورت اياعى ۇزىن، تابانى قورعاسىنداي مىعىم، مويىنى وزىنە جاراسىپ تۇر. ءبىراق مەن ءوزىم اتتىڭ بىرەۋىن تاڭداپ قويدىم، اتا.
— شىن ايتاسىڭ با؟ كانەكي، كورسەتشى. باعانادان بەرى نەگە ايتپادىڭ؟
— اتتاردى تۇگەل كورەيىك دەپ ەدىم.
اتاسى قانات تاڭداعان اتتىڭ جانىنا كەلدى. كادىمگى تورى ات. بولىمدى، ارقا تۇسى ەسىك پەن توردەي، ەكى اياعىنىڭ ورتاسىنا ءبىر كىسى ەمىن-ەركىن سياتىنداي جارامدى جانۋار ەكەن.
اتاسى مەن قانات اتتىڭ باسى مەن اياعىنا، وڭى مەن سولىنا، قاپتالىنا قاراپ، كوزدەن وتكىزدى. ات ەكەۋىنە دە جاقتى. 7587585ۇناتقاندارى سونشا، تاباندا ساۋداسىن كەلتىرىپ، ساتىپ الدى.
كۇزگە سالىم القاپتار ەگىستەن بوساعان كەزدە اۋىل بالالارى باستارى قوسىلىپ، تاي جارىسىن وتكىزە باستادى. وعان باستاماشىل بولىپ جۇرگەن وزدەرى. كوپشىلىگى ءار ءۇيدىڭ ءبىر-بىر ەركەلەرى.
قارا كۇزدە اۋىل ماڭىندا جىلداعىداي ات بايگەسى ءوتتى. قاناتتىڭ ەسىل-دەرتى وسى جارىسقا ات قوسۋ بولاتىن. ول ارمانىنا دا جەتتى. تورى اتتىڭ بابىندا بولعانى قانداي جاقسى بولعان. ويلاماعان جەردەن توپ جارىپ، مارەگە ءبىرىنشى كەلدى. سودان بەرى قاناتتىڭ اتى بايگەتورى دەگەن اتقا يە بولدى.
— بايگەتورى قالاي، بابىندا ما؟— دەگەن ءوز دوستارىنا قانات:
— ءيا، بابىندا،— دەپ جاۋاپ قاتادى.
— كەلىپ كورىڭدەرشى ودان دا،— دەيدى اتاسى قاناتتىڭ دوستارىن جىبەرگىسى كەلمەي. سولاي دەيدى دە، اتاسى ءوزىنىڭ جاستىق شاعىن ەسكە العانداي، ولارعا قىزىعا قاراپ قالادى.
— اينالايىندار اشەيىن، جاپ-جاس بولسا دا، اتتىڭ ءقادىرىن ءبىلىپ، تانىپ، ءوسىپ كەلەدى. قالايشا ريزا بولماسسىڭ،— دەپ وزىمەن-وزى كوڭىلى تاسىپ تۇرادى.
You Might Also Like
-
— جانىبەك، سەنى ەرمەك شاقىرىپ تۇر، — دەدى كورشى ءۇيدىڭ بالاسى دارمەن قاقپا سىرتىنان داۋىستاپ.
-
— اكە، اكە! كەتپەشى! — مەن ارقا-باسىم سۋىق تەرگە مالىنىپ، ءوز داۋسىمنان ءوزىم شوشىنا وياندىم.
