بەسىككە بولەنگەن ءسابي
بالا اۋەلدە سابيلەرگە ارنالعان توسەككە جاتقىزىلعان ەدى. سونان سوڭ ءبىر كۇنى: "وسى بالا تىم ەركىنسىپ بارا جاتىر. بۇل ۇلكەيگەن سايىن ايتقانىمىزدى قىلمايتىن بولادى ءالى. مۇنى بەسىككە بولەپ تاستاۋ كەرەك" دەگەن داۋىس ەستىلدى.
بالانىڭ جۇرەگى زىرق ەتە قالدى.
"مەنى جازالاعالى جاتىر، - دەدى بالا. - ءوزىم دە تىم ەركىنسىپ كەتىپ ەدىم. بەسىك دەگەندەرى قانداي بولادى ەكەن؟"
سول كۇنى ۇيگە بەسىك الىپ كەلىندى.
"بەسىك دەگەندەرى وسى ەكەن عوي، - دەدى بالا بەسىككە قاراپ جاتىپ. - مىنا كەمپىرى كىم تاعى؟!"
"جاتپايمىن بەسىكتەرىڭە! - دەدى بالا ىشىنەن ايقاي سالىپ. - كونبەيمىن بۇعاۋلارىڭا! شەكتەمەڭدەر ەركىندىگىمدى!"
"مىنا كەمپىردىڭ بالەسىن-اي! - دەدى بالا. الدى دا بەسىككە بولەپ تاستادى. اجە دەپ وسىلاردى ايتادى ەكەن عوي. ال ويناپ كور اجەلەرمەن. ەرەگىسسە، الادى دا بەسىككە بولەي سالادى".
"ءىشىنىڭ جىپ-جىلىسىن-اي! - دەدى بالا، - كىشكەنە مىزعىپ السام با ەكەن؟ قارا شالداردىڭ ويلاپ تاپقانى-داعى. قارا شالداردىڭ ويلاپ تاۋىپ جۇرگەنى. وسى بەسىكتى قالاي تالدان ءيىپ جاساساق، ۇرپاعىمىزدى دا تاربيەمىزگە سولاي ءيىپ كوندىرىپ وتىرامىز دەگەندەرى. بەتىڭمەن جىبەرمەيمىن دەپ بەسىگىڭنەن سەس كورسەتكەندەگىسى".
"بولەپ بەردىم، - دەگەن كەمپىردىڭ داۋىسى شىقتى. - ءوزىڭ تەربەت".
"شەشەمە بەرىپ جاتىر، - دەدى بالا. - دۇرىس قوي ەندى. بالانى كىم تاپسا، سول تەربەتسىن دەگەنى. كارى كىسى شارشايدى عوي".
"الەمنىڭ تۇتقاسى دەپ جۇرگەندەرىڭ وسى، شىراعىم، - دەدى تاعى دا كەمپىردىڭ داۋىسى. - الەمنىڭ بۇدان ارتىق تۇتقاسى دەگەن بولمايدى. الەمنىڭ تۇتقاسى دەپ جۇرگەندەرىڭ، سول - ءسابيىڭنىڭ بەسىگى".
"دۇرىس ايتادى، - دەدى بالا. - الەمنىڭ تۇتقاسى دەگەن - ءبىزبىز! بىزدەن ماڭىزدى كىم بار؟! - دەپ شىرەندى ءسابي".
بالا كوزىن اشىپ الدى.
"اۋ، مىنا كىسى ءان سالىپ جاتىر عوي! مەنىڭ شەشەم ءان سالادى ەكەن عوي، ءوزى؟! اۋ، شەشە، ايتقان سوڭ ءجونى ءتۇزۋ ءان ايتساڭىزشى. ءسىز قازىرگى قازاق ەستراداسىنىڭ رەپەرتۋارىنا ءتۇسىپ كەتتىڭىز عوي. ايتقان سوڭ باعزىنىڭ اندەرىن نەگە ايتپايسىز؟ حالىقتىڭ اندەرىنە سالساڭىزشى. اقىرى قول-اياعىمدى تاس قىلىپ بەسىككە بولەپ تاستاعان ەكەنسىڭدەر".
"وسى اكەم ءان سالا الا ما ەكەن؟ - دەپ ويلادى بالا. - شىنىندا دا اكەم ءان سالا ما ەكەن؟ ءوزى توبەمنەن ءتونىپ قاراپ تۇرادى. ساۋساقتارىن جىبىرلاتادى. مەنى سوعان كۇلەدى دەپ ويلاي ما؟ ويناتقانسىماعى-داعى".
"كۇيتاباقتى وزگەرتىپ جاتىر، - دەدى بالا. - شەشەم كۇيتاباقتى اۋىستىرىپ جاتىر. حالىقتىڭ انىنە سالىپ جاتىر".
بولمەدەن جاس كەلىنشەكتىڭ ءان سالعان داۋىسى ەستىلدى.
تالدان تاياق جاس بالا تايانبايدى،
بالا بۇركىت تۇلكىدەن ايانبايدى.
ۋگاي-اي...
بالا بىرتە-بىرتە ماۋجىراپ ۇيىقتاپ بارا جاتتى.
You Might Also Like
