ءبىلىم مينيسترلىگى باستاۋىش سىنىپ وقۋلىقتارىنداعى ولقىلىقتارعا قاتىستى ساۋالعا رەسمي جاۋاپ بەردى
بالاسى 1-سىنىپتا وقيتىن سالتانات تاجييەۆا بەينەجازبا ارقىلى دايارلىق توبىنا ارنالعان «قورشاعان ورتامەن تانىستىرۋ، ەكولوگيا نەگىزدەرى» وقۋلىعى مەن 1-سىنىپ وقۋشىلارىنا ارنالعان «جاراتىلىستانۋ» وقۋ قۇرالىنىڭ مازمۇنىنا قاتىستى سىن-ەسكەرتپەلەرىن جولداعان بولاتىن.
وسىعان وراي وقۋلىق اۆتورلارى ءبىلىم جانە عىلىم ءمينيسترى ەرلان ساعادييەۆتىڭ تاپسىرۋىمەن رەسمي جاۋاپ دايىندادى. رەسمي جاۋاپ اتالعان ۆەدومستۆونىڭ فەيسبۋكتەگى رەسمي پاراقشاسىندا جاريا ەتىلدى.
بەينەجازباداعى ساۋالدارعا جاۋاپ بەرگەن باستاۋىش سىنىپ ءمۇعالىمى جانە وقۋ باعدارلاماسىن جاساۋشى بايتەنوۆا قالامقاس قادىربەك قىزىنىڭ ايتۋىنشا، بۇگىنگى تاڭدا بالالاردى وقۋ مەن جازۋعا عانا ەمەس، سونىمەن قاتار مەكتەپتە العان تەوريالىق ءبىلىمىن ءىس جۇزىندە پايدالانا بىلۋگە دە ۇيرەتۋ اسا ماڭىزدى. جاڭا وقۋلىقتاردىڭ كوزدەگەن ماقساتى دا وسى. ماسەلەن، «جاراتىلىستانۋ» پانىندە حيميا، فيزيكا، بيولوگيا سياقتى كۇردەلى پاندەردىڭ ماتەريالدارى بەرىلەدى. جاراتىلىستانۋ باعىتىنداعى جاڭا وقۋلىقتا وسى ماتەريالداردىڭ بارلىعى بالالارعا تۇسىنىكتى جانە قاراپايىم تىلمەن باياندالعان. ول ءۇشىن وقۋلىقتى دايارلاۋ ىسىنە باستاۋىش سىنىپتارعا ساباق بەرىپ جۇرگەن تاجىريبەلى مۇعالىمدەر قاتىستىرىلعان.
ماسەلەن، قالامقاس قادىربەك قىزىنىڭ ايتۋىنشا، سالتانات تاجييەۆانىڭ بەينەجازباسىنداعى «تراەكتوريا» ۇعىمىنىڭ ماعىناسىن كىشكەنتاي بالالارعا ءتۇسىندىرۋدىڭ تۇك تە قيىندىعى جوق. ءمۇعالىم ساباقتى باستاماي تۇرىپ بالالاردان «تراەكتوريا» دەگەننىڭ نە ەكەنىن سۇرايدى. سودان كەيىن پەداگوگ بالالارمەن بىرگە ەكسپەريمەنت جاسايدى: ءىشى تولتىرىلعان (ۇن نەمەسە قۇرعاق قۇرىلىس قوسپاسى سالىنعان) تاباقشاعا ۇقسايتىن تاقتادان ەرمەكسازدان جاسالعان دوڭگەلەك پەن ويىنشىق كولىكتى قاتار جىبەرەدى. وسىدان كەيىن بالالاردان تاقتادا نە قالعانىن سۇرايدى. بالالار، البەتتە، جازىقتىقتا كولىكتىڭ دە، دوڭگەلەكتىڭ دە ءىزى قالعانىن ايتادى. بالالارعا وسى ىزدەردىڭ زاتتىڭ قوزعالىسى كەزىندەگى تراەكتوريا ەكەنىن ءتۇسىندىرۋ ءمۇعالىمنىڭ مىندەتى. سونداي-اق، ەكسپەريمەنت ارقىلى بالالارمەن بىرگە كولبەۋ جازىقتىقتا ەكى كولىكتىڭ قايسىسى ۇزاققا باراتىنىن بىلۋگە بولادى (قالامقاس قادىربەك قىزى مۇنى وقۋلىقتىڭ كومەگىمەن كورسەتەدى). سونىمەن بىرگە، ونىڭ نەگە بايلانىستى ەكەنىن دە تۇسىندىرەدى (كولىكتىڭ سالماعى، كولەمى، تاعى باسقا ەرەكشەلىكتەرى).
وسىلايشا، باستاۋىش سىنىپتىڭ بالالارى كۇردەلى دە قىزىقتى تۇسىنىكتەرمەن تانىس بولىپ، جوعارى سىنىپتارعا دايىندىقپەن جەتەدى. بۇل بالالاردىڭ كىشكەنتاي كەزىنەن اسا ماڭىزدى عىلىمداردىڭ تەرميندەرىن جانە ەرەكشەلىكتەرىن بىلۋىنە دە جول اشادى.
سالتانات حانىم بالالاردىڭ پورتفوليوسى دا مۇعالىمدەردىڭ كوپ ۋاقىتىن الادى دەگەن پىكىردە. الايدا، پورتفوليو كەرەك جانە ونىڭ بولۋى بالا ءۇشىن ماڭىزدى. ولاردى پاراقتاي وتىرىپ، اتا-انا بالالارىنىڭ جاڭا وقۋ باعدارلاماسىن قانشالىقتى يگەرىپ جاتقانىن، جەتىستىكتەرىن قاداعالاپ وتىرادى.
بارلىق وقۋلىقتار مەن جۇمىس داپتەرلەرىنىڭ سالماعى جەڭىل جانە بۇگىنگى تەحنيكالىق، گيگيەنالىق تالاپتارعا تولىعىمەن ساي كەلەدى. سوندىقتان دا اپتاسىنا 5 كۇندىك ساباقتارىنا اپاراتىن وقۋلىقتاردىڭ ءوزى دە بالاعا ەشقانداي اۋىرلىق تا، قيىندىق تا تۋدىرمايدى.
قالامقاس قادىربەك قىزى بارشا باستاۋىش سىنىپ مۇعالىمدەرى مەن ءبىلىم بەرۋ سالاسىنىڭ قىزمەتكەرلەرى اتىنان وقۋ پروسەسىنە بەي-جاي قارامايتىن، ءجىتى قاداعالاپ وتىراتىن اتا-انالارعا العىس بىلدىرەدى. وقۋشىلاردىڭ زامانىنا ساي ساپالى ءبىلىم الىپ، ءححى عاسىردىڭ تالاپتارىنا ساي كەلۋى ءۇشىن بالا، اتا-انا جانە ۇستاز ءوزارا بىرلىكتە ارەكەت ەتۋى كەرەك. سوندا عانا ويداعىداي ناتيجەگە جەتۋگە بولادى.
You Might Also Like
-
تاقىرىبى: نۇرسۇلتان ءابىش ۇلى نازاربايەۆ - قازاقستان رەسپۋبليكاسىنىڭ ءبىرىنشى پرەزيدەنتى
