ءبىر ءان بار بۇگىنگى ۇرپاق ەستىمەگەن،
(سوناۋ ءبىر سوعىس جىلى ەستىگەن ەم)
ارەدىك، ەلدەقالاي ەسىمە السام،
قوس باسى، قويۋ قارا كەشتى كورەم.
شار تاستار، شالعىندى ساي «قاراعايلى»،
شۋلى وزەن شومىلدىرعان شاعالا - ايدى.
جوتەلىپ بۇلتتار كوشىپ وتەتۇعىن،
جەتەكتەپ جەتەگىندە قارا قايعى.
جەل تىنعان، جاپىراق تا سىلكىنبەگەن،
تاۋعا كەپ ءتۇن ۇييتىن كىلكىلدەگەن.
ءار جۇرەكتى سول ءبىر ءان مازالايتىن،
ءار كومەيدە سول ءبىر ءان بۇلكىلدەگەن.
قوس باسىندا قاۋىمنىڭ ءبارىسى دە،
قوسىلاتىن جاسى دا، كارىسى دە،
ءسىڭىر تىرسەك بىزدەر دە شىرقاۋشى ەدىك،
تۇسىنبەستەن سول ءاننىڭ مانىسىنە.
كۇندىزگى زور بەينەتتىڭ ءتۇنى كەلىپ،
ءار كەش سايىن ءان تىڭداپ ءجۇرىپ ەدىك.
كوز ۇيقىعا كەتكەنشە سول ءبىر اننەن
ساي-سالا تۇراتۇعىن كۇڭىرەنىپ.
جۇرەكتىڭ شىدىراۋىندا قوزدايتۇعىن،
شىبىنى بار كەۋدەنى قوزعايتۇعىن.
قاۋىم ايتقان سول ءاندى ەستىگەندە،
بوتالى ىنگەن بورىقتا بوزدايتۇعىن.
ءبىر ءان بار بۇگىنگى ۇرپاق ەستىمەگەن،
(سوناۋ ءبىر سوعىس جىلى ەستىگەن ەم).
سول ءبىر ءان كومەيىمە كەپتەلگەندە،
ءومىر دەيتىن كەرۋەن، كوشتى كورەم.

---