InfoHub Logo

قىستىڭ قىسپاعىنان قىسىلىپ ارەڭ شىققان حالىق كۇننىڭ قىزارىپ باتىپ، ايدىڭ قورالانىپ تۋعانىنان-اق ىشتەرىن تارتىپ، ۇرەيلەنىپ جۇرگەندە، التىنەمەلدىڭ كۇنگەي، تەرىسكەيىن تۇگەلدەي شارپىپ سۆان رابداننىڭ ءبىر تۇمەن قولى لاپ قويادى. بۇل كەزدە ءبىر جاماندىقتى ىشتەرى كۇنىلگەرى سەزگەن جالايىر ەلى قامىستان سال بۋىپ، ىلە-داريادان باتىسقا قاراي ءوتىپ جاتسا كەرەك. بۇل ماڭعا قاراي جوڭكىلگەن ويراتتاردىڭ جاقسى جاراقتانعان قولىنا لاۋزان-شونا دەگەن قولباسشىلىق جاساپتى. ول «قاشقان ەلگە قاتىن دا باتىر» دەگەندى مالدانىپ، ءتورت تۇلىكتەرىنىڭ تەڭ جارىمىنان استامىن تاستاي كوشىپ بارا جاتقان جۇرتتىڭ سوڭىنان قاشقا دەگەن زايساندى سالىپتى.

قاشقا العاشقىدا ازداعان عانا قولىن ۇرىسقا كىرگىزەدى دە، ىلەنىڭ وڭ جاعاسىنداعى توسقاۋىلعا قويىلعان جالايىرلاردىڭ جاساقتارىنان كۇيرەي جەڭىلەدى. مۇنى ەستىگەن لاۋزان-شونا كەلەسى كۇنگە ءامىر بەرىپ: «الدىمەن باتىرلارىن جەكپە-جەككە شاقىرعان بولىپ، كۇشىن انىقتاڭدار»، — دەيدى.

قولباسشى ايتسا، قولدامايتىن كىم بار؟ كەلەسى كۇنى ىلە بويىنىڭ ءبىر تاقىرىندا جەكپە-جەك سوعىسى وتەدى. ويراتتاردان شىققان جەتى باتىر جەر قۇشادى. ءبارىن مەرت قىلعان استىندا كوك بۋرىل بەستىسى بار وتىزداردىڭ ىشىندەگى جىگىت بولسا كەرەك. كۇن ۇياسىنا قونىپ بارا جاتقاندا ىزاعا بۋلىققان قاشقانىڭ ءوزى شىعىپتى جەكپە-جەككە. ءبىراق ول ورنىنان وق بويى قوزعالا بەرىپ-اق اتىنان اۋىپ تۇسەدى.

باس قولباسشى الگىنى وزىنە شاقىرىپ الىپ، نە بولعانىن سۇراعاندا:

— بىلمەيمىن، ەسىم اۋدى ما، الدە جىن سوقتى ما، ورنىمنان قوزعالعاندا، الدىمداعى نايزا جالعىز ەدى، «ەسكەلدى! ەسكەلدى!» دەگەن ەسىم جاڭعىرىعىپ كەتكەن كەزدە، كەۋدەمە ءجۇز نايزا قادالعانداي بولىپ، قالاي ۇشىپ تۇسكەنىمدى بىلمەي قالدىم،— دەپتى قاشقا.

سول قاشقا جوڭعارلار جورىعىنىڭ سوڭىنا دەيىن قارۋ كوتەرۋگە جاراماي، اقىرى جالايىر ەلىن ىزدەپ كەلىپ، ەسكەلدى باتىردىڭ ەسىگىندە كوز جۇمىپتى دەيدى ءبىر اڭىز.

---