قىزايلار ءۇشىن كۇرەسكەندە
نايمان ەلىنىڭ ءبىر اتاسى — قىزاي ەل-جۇرتىنا وكپەلەپ، جالايىر ىشىنە كوشىپ كەپتى. ونىڭ سەبەبى الامان اسىر توي ۇستىندە كوكپار تارتىپ جۇرگەن جىگىتتەردىڭ ءبىرى مەرت كەتىپ، ونىڭ ولىمىنە قىزاي ادامدارى جالالى بولىپ قالىپتى. قاسقايىپ كەپ ادەيى قاستاندىق جاساماعاندىقتان، ولار قۇن تولەۋدەن باس تارتىپ، سادىرلاردىڭ بىتپەس داۋىنا ۇشىراپتى. قىزايلار سويتسە دە، تەڭدىك بەرمەي، ۇدەرە كوشسە كەرەك.
«جاسىرىنعان جەرلەرىڭ جالايىر عوي، ولاردىڭ دا ساعىن سىندىرارمىز» دەپ تىستەنگەن سادىرلار ءبىر ۇلكەن ادامنىڭ اسىنا جالايىرلاردى ابدەن كەشتەتىپ شاقىرىپتى. جالايىرلار ات جاراتىپ، بالۋان ىرىكتەپ ۇلگەرمەگەن ەكەن، ەسكەلدى سوندا دا نارتاۋەكەلمەن ازا سالىپ، تارتىپ كەتىپتى. اتقوسشىسى تەپسە تەمىر ۇزەرلىكتەي، جاپ-جاس قارابەك دەگەن باتىر ەكەن، ەسەكەڭ:
— وسى سەنىڭ اتىڭ قالاي ەدى؟ — دەپتى.
— كىم ءبىلسىن، ايتەۋىر، يت قوسپاي-اق قاسقىر، قارساقتى سوعىپ الىپ ءجۇرمىن عوي، — دەيدى قارابەك.
ەسەكەڭ اتتى ەكى اينالىپ ءوتىپ، «قوس بايگەگە!» دەيدى. سونىمەن ات بايگەگە كەتەدى.
سودان كۇرەس باستالىپ، پالۋان ىزدەلىنەدى. ەلىنىڭ اتى اتالىپ جاتقان سوڭ، ەسەكەڭ قارابەككە قاراپ:
— قارا كۇشكە قالاي ەدىڭ؟ — دەيدى.
— قالاي دەيىن، ناسىباي ۋقالاعاندا قاراعاش، قايىڭداردى بۇراپ، شىرىنىن تامىزىپ ءجۇرمىن عوي، — دەدى قارابەك.
— كۇرەس! — دەيدى ەسەكەڭ.
اقىرىندا بايگەدەن قارابەكتىڭ جيرەن قاسقاسى كەلىپ، قارا نار، قالى كىلەمدى يەمدەنەدى. ءوزى الىسقان ادامىنىڭ اتان جىلىگىن ءۇزىپ، باس بايگەنى — توعىزدى الادى.
— بۇل سەندەردىڭ اتالارىڭنىڭ ءارۋاقتارى جەبەگەن سوڭ كەلگەن جەڭىستىك، — دەپ، ەسەكەڭ ەكى بايگەنىڭ دە شىپشىرعاسىن شى- عارماستان قىزاي باۋىرلارىنا اكەپ بەرىپتى.
You Might Also Like
-
بىردە قابىليسا، ەسكەلدى، بالپىق ۇشەۋى كەلە جاتىپ، ەسكەلدى قابىليسادان:
-
قىستىڭ قىسپاعىنان قىسىلىپ ارەڭ شىققان حالىق كۇننىڭ قىزارىپ باتىپ، ايدىڭ قورالانىپ تۋعانىنان-اق ىشتەرىن تارتىپ، ۇرەيلەنىپ جۇرگەندە، التىنەمەلدىڭ كۇنگەي، تەرىسكەيىن تۇگەلدەي شارپىپ سۆان رابداننىڭ ءبىر...
