InfoHub Logo

كىشى ءجۇزدىڭ ەلى ون ەكى اتادان تۇرادى. ونى ون ەكى اتا باي ۇلى دەپ اتايدى. ون ەكى اتا رۋلى ەلدىڭ ءبىرى ەسەنتەمىر رۋىنان قۇرالعان ەل. ەسەنتەمىر رۋىنىڭ ىشىندە اتاقتى بوكەن بي بولىپتى. ەل اۋزىنداعى اڭگىمەگە قاراعاندا، بوكەن بي XVIII عاسىردا قازىرگى گۋريەۆ وبلىسىنىڭ جەرىندە ءومىر سۇرگەن ادام. ونىڭ شارۋاسى شاعىن ادام بولۋ كەرەك. شارۋاسىنىڭ شاعىندىعىنان با، الدە كوڭىلىنىڭ جاراتقانى ما، ءومىر بويى استىنا مىنگەنى
وگىز بولىپتى. استىڭىزعا ات نەگە مىنبەيسىز دەگەندەرگە، اتقا مىنسەم، كوڭىلىم ءوسىپ تاكاپپار بولىپ كەتەمىن دەپ سىلتاۋ ايتاتىن سەكىلدى. كوك وگىزدى ءمىنىپ بۇكىل بايۇلىن ارالايدى، بيلىك ايتادى. كىشى ءجۇزدىڭ ەلىندە ونىڭ الدىنا شىققان، سوزىنە شەك كەلتىرگەن ەشكىم بولمايدى.

بوكەن بي جاز ايىنىڭ ىشىندە وگىز ءمىنىپ، ەل ارالاپ جۇرگەندە، ءبىر اۋىلدىڭ شەتىندە ويناپ جۇرگەن ءبىر توپ بالاعا كەزدەسەدى. ول داتتىڭ اۋىلى بولادى. بالالار جولاۋشى بوكەن بيگە سالەم بەرمەيدى. سوندا بوكەن بي تۇرىپ، بالالارعا سىن تاعىپ بىلاي دەيدى:

— بالالار، امان با؟ نەگە سالەم بەرمەيسىڭدەر، ۇلكەن كىسىگە سالەم بەرۋ جول ەمەس پە؟ — دەسە، توپ بالانىڭ ىشىنەن ءبىر بالا تۇرىپ:

— اتا، بىزدەردىڭ ءبارىمىزدىڭ جاسىمىزدى قوسسا، ءبىز سىزدەن ۇلكەنبىز، ءسىز نەگە سالەم بەرمەدىڭىز؟ — دەپتى. ول بالا سىرىم ەكەن. بوكەن بي سوزدەن قالادى. ءوزىن جەڭىلدىم دەپ ەسەپتەيدى. ۇندەمەي، جايىمەن وگىزىنەن ءتۇسىپ، دارەت ەتەدى. بوكەن بي دارەت ەتىپ وتىرعاندا، وگىزى شىبىنداپ، ءمۇيىزىن شايقاپ ءجۇرىپ كەتىپتى. سول كەزدە بوكەن بي وتىرىپ: «بالالار، انا وگىز شىبىنداپ ءجۇرىپ كەتتى عوي، ۇستاڭدارشى؟!» — دەپ سۇرايدى. ءبىر بالا وگىزدى ۇستايىن دەپ ۇمتىلسا، بالا سىرىم ونى كىدىرتىپ جىبەرمەيدى، وگىز شىبىنداپ ۇزاپ كەتەدى.

بوكەن بي تۇرىپ كەلىپ، تاعى دا سىن تاعىپ:

— بالالار! انا وگىزدى نەگە ۇستامادىڭدار، ۇزاپ كەتتى عوي، — دەسە، سىرىم تۇرىپ:

— اتا! بۇكىل ون ەكى اتا بايۇلىنا ءتىلىڭىزدى الدىرعاندا، استىڭىزداعى ءمىنىپ جۇرگەن جالعىز وگىزىڭىزگە ءتىل الدىرا الماعانىڭىزعا ارلانىپ ۇستامادىق، — دەپتى. بوكەن بي سوزدەن جەڭىلگەنىن سەزىپ ۇندەمەپتى. سىرىم بالا كۇنىنەن سوزگە شەبەر، ۇتىپ سويلەيدى ەكەن دەسەدى. ول اۋىل داتتىڭ اۋىلى ەكەن.

وقۋعا كەڭەس بەرەمىز:

جىلقىنىڭ تورىسى كوپ پە، توبەلى كوپ پە؟ (ءى نۇسقا)

سىرىمنىڭ نۇرالى حاندى شابۋى (ءىى نۇسقا)

بايماعامبەت سۇلتان مەن سىرىم باتىر

---