بوكەن جارعاق (ءىى نۇسقا)
باياعىدا ءبىر ەلگە وبا تاراپ، ونىڭ ۇستىنە اق سۇيەك جۇت بولىپ، ەل تۇگەل قىرىلىپ، تەك ءبىر جىگىت قارىنداسىمەن عانا امان قالعان ەكەن. جىگىت اڭ اۋلاپ، قارىنداسى ەكەۋى اڭنىڭ تەرىسىن كيىپ، ەتىن ازىق ەتىپ كۇنەلتىپ ءجۇرىپتى.
شىلىڭگىر شىلدەنىڭ ءبىر كۇنىندە ىستىقتاماس ءۇشىن بوكەن تەرىسىنەن كيگەن كيىمنىڭ ءجۇنىن سىرتىنا قاراتىپ كيىپ العان جىگىت كۇندەگى بوكەن اۋلايتىن بوكەن جالاققا تارتىپتى. ول بوكەن جالاقتىڭ ماڭىنا تاياپ بارىپ بوكەن اڭدىپ بۇك ءتۇسىپ جاتادى.
وسى كەزدە تاعى ءبىر اڭشى جىگىت بوكەن اۋلاماق بولىپ وسى ماڭايعا كەلەدى دە، بۇك ءتۇسىپ جاتقان بوكەندى كورىپ اتىپ قالادى. اڭشى جىگىت ونى باۋىزداپ الماق بولىپ جۇگىرىپ جەتىپ كەلسە، بوكەن ەمەس ءبىر جىگىتتىڭ جايراپ جاتقانىن كورەدى. وقىس جازاعا جانى اشىپ كەتكەن جىگىت مۇڭايىپ ويعا كەتەدى.
«بۇل جىگىت تە مەن سەكىلدى جالعىز با ەكەن، الدە سەرىگى بارما ەكەن؟ ەگەر سەرىگى بولسا ىزدەپ كەلەر» دەپ توسىپ وتىرادى. ەرتەڭىندە ءبىر قىز كەلىپ جىگىتتىڭ ولىگىن كورىپ زار ەڭىرەپ جىلايدى. مۇنى انادايدان كورىپ وتىرعان جىگىت قىزدىڭ جانىنا كەلىپ:
— اعاڭدى بوكەن دەپ مەن اتىپ ەدىم، ادەيى اتقام جوق. مەن دە جالعىزبىن، ادام بالاسىن كورمەي دالادا جۇرگەنىمە تالاي جىل بولدى. ادام ەكەنىن بىلسەم، بۇيتەر مە ەدىم! اعاڭنىڭ ولىمىنە مەن دە ارماندا قالىپ بارماعىمدى شاينادىم. باقيعا جول العان ورالمايدى. اعاڭ ءۇشىن كەگىمدى الام دەسەڭ، مىنە قۇرال، مەنى ات تا كەگىڭدى ال. مەن دە ونىڭ سوڭىنان كەتەيىن، بۇل وكىنىشتىڭ كۋاسى بولىپ ارتىمىزدا سەن قال! — دەپ جىگىت قولىنداعى قارۋىن ۇسىنادى.
كوپ جىلاپ ءىشى-باۋىرى ەزىلگەن قىز، اقىلى ساباسىنا تۇسكەن سوڭ جىگىتتى ولتىرۋگە قيمايدى دا، جىگىتپەن بىرگە ءومىر ءسۇرۋدى ءجون كورەدى جانە جىگىتكە: «مەنىڭ وكسىك اتقان زارىمدى تاريحقا قالدىرار ونەرىڭ بار ما؟» دەيدى. جىگىت: «بار» دەيدى دە ۇزاق تولعانىپ العان سوڭ، دومبىراعا قىزدىڭ وقىس ولگەن اعاسىن جوقتاپ زارلاپ جىلاعان قاسىرەتىن «اتتەڭ، بوكەن جارعاق-اي! اتتەڭ، بوكەن جارعاق-اي!» دەگەن كۇيگە اينالدىرىپ شەرتەدى ەكەن.
حالىق كۇيى «بوكەن جارعاق» وسىلاي شىعىپتى.
You Might Also Like
-
ورمانبەت بي ولگەن كۇن، ون سان نوعاي بۇلگەن كۇن. ايقاي، ايقاي، ايقاي كۇن، ايقايلاپ جاۋعا تيگەن كۇن.
-
ءبىلىم بەرۋ جۇيەسىندە كوپتەگەن وزگەرىستەر بولۋدا، ءبىراق جالعىز وزگەرمەس دۇنيە، ۇستاز – وقۋشىلار الدىندا ءبىلىم بەرۋدىڭ ناعىز شەبەرى. ناعىز شەبەر ءوزىنىڭ كۇشتى جاقتارىنا سەنەدى، ءبىلىم بەرۋ جۇيەسى...
