InfoHub Logo

ءبىلىم بەرۋ جۇيەسىندە كوپتەگەن وزگەرىستەر بولۋدا، ءبىراق جالعىز وزگەرمەس دۇنيە، ۇستاز – وقۋشىلار الدىندا ءبىلىم بەرۋدىڭ ناعىز شەبەرى. ناعىز شەبەر ءوزىنىڭ كۇشتى جاقتارىنا سەنەدى، ءبىلىم بەرۋ جۇيەسىنىڭ العا جىلجۋىنا ات سالىسادى جانە ونى وقۋشىلارىنا ۇيرەتەدى. بۇگىنگى تاڭدا قوعام مۇعالىمگە جاڭا تالاپتار قويادى. بۇگىنگى تاڭدا مەملەكەت حالىقارالىق ستاندارتتارعا سايكەس كەلەتىن ءبىلىم ساپاسىنىڭ الدىڭعى قاتارىنا شىعۋ ءۇشىن قولدان كەلگەننىڭ ءبارىن جاساۋدا. ۇستاز مارتەبەسىن كوتەرۋ ءۇشىن جۇيەلى باستامالار جۇزەگە اسىرىلۋدا، ونىڭ وتە قيىن جانە جاۋاپتى جۇمىس ءۇشىن ەڭبەك اقىسىن كوتەرۋدە. قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ ءبىر سوزىندە «ادامداعى ەڭ جاقسى نارسە – ۇستازدان» دەگەن ەدى. تۇڭعىش مەملەكەت باسشىسىنىڭ مۇنداي جوعارى سەنىمى بىزگە ۇستازدارعا ۇلكەن جاۋاپكەرشىلىك جۇكتەيدى جانە ويىمىزدا «مەن زاماناۋي ۇستاز بولۋ ءۇشىن نە ىستەدىم؟» دەگەن سۇراق تۋىنداتادى.

وقۋشى ءۇشىن بارلىعى مەكتەپ تابالدىرىعىنان باستالادى، ال مەكتەپ ۇستازدان باستاۋ الادى. ءبىلىم جۇيەسىنە قانداي وزگەرىستەر ەنگىزىلسە دە، قانداي قۇرال – جابدىقتار قولدانىسقا كىرسە دە، ۇستاز مەكتەپتىڭ وزگەرمەس قازىعى.

كۇندە تاڭەرتەڭ مەن وزىمە سۇراق قويامىن: بۇگىنگى جاڭا كۇن نە اكەلەدى؟ ءبىز ۇستازدار بارلىعىنا دايىن بولۋىمىز كەرەك: ناۋقاس بالا، اشۋلانعان اتا – انا، سىنىپتاعى جانجال، وقۋشىلاردىڭ قۋانىشى مەن رەنىشى، جەتىستىكتەرى. كەيدە وقۋشىلار جانىما ءۇنسىز كەلىپ تۇرعاننىڭ وزىندە، ولاردىڭ الدىنداعى ۇلكەن جاۋاپكەرشىلىگىمدى سەزىنەمىن.

زاماناۋي ۇستاز قانداي بولۋ كەرەك؟ ول – كوپ ءبىلىمدى جانە كەڭ جۇرەكتى ادام. ۇستاز بالالار پسيحولوگياسىن جەتىك مەڭگەرىپ، بالانىڭ ءاربىر جاعدايىن ءتۇسىنىپ، قيىن ساتتە بالا جۇرەگىنەن ورىن الۋى كەرەك. جانە ءار وقۋشىنىڭ اتا – اناسىمەن تىعىز بايلانىستا بولىپ، كەز – كەلگەن ماسەلەنى وڭىنان شەشە ءبىلۋى قاجەت. ءوزارا تۇسىنىستىك پەن ىنتىماقتاستىققا دەيىن، ءمۇعالىم     اتا – انانى جانە وقۋشىنى زەرتتەپ، ورتاق ويعا كەلۋى كەرەك جانە ءتىل تابىسا الۋى قاجەت.

مەنىڭ زاماناۋي ۇستاز بولۋداعى ءۇش ۇستانىمىم، ولار: وقۋشىلارعا دەگەن سۇيىسپەنشىلىك جانە ولاردىڭ مۇمكىندىكتەرىنە شەكسىز سەنۋ، جۇمىس ىستەۋدىڭ ءتيىمدى ادىستەرىن ۇنەمى ىزدەۋ، بالالارمەن جانە ولاردىڭ اتا – انالارىمەن ىنتىماقتاستىق. جۇمىس اتقارۋ بارىسىنداعى تاعى ءبىر باستى ۇستانىمىم «سۋىق قاباق تانىتپاي، ۇنەمى كۇلىمدەۋ»، ولاي بولماسا بالالارمەن جۇمىس جاساۋ مۇمكىن بولمايدى. ۇستاز بالا جۇرەگىنە جول تابۋ ءۇشىن، ونى وزىنە تارتىپ، ۇنەمى جىلۋ شاشىپ، وقۋشى وزىنە سەنىم ارتا الاتىنداي تۇلعا بولۋى كەرەك.

قازىرگى دامىعان زاماندا وقۋشىعا سوعان ساي ءبىلىم بەرىپ، باسەكەگە قابىلەتتى، ءومىر سۇرۋدە ءوز ءبىلىمىن ءتيىمدى قولدانا الاتىنداي، جەكە مامان يەسى، جەكە تۇلعا بولىپ قالىپتاسۋىن قامتاماسىز ەتۋ ۇستازداردىڭ باستى مىندەتى دەپ بىلەمىن. ەلىمىزدىڭ ەڭ اسىل قازىناسى وسكەلەڭ ۇرپاقتى دامىتا تاربيەلەۋدە، جاڭاشىل زاماناۋي ۇستاز رەتىندە ءوز ۇلەسىمدى قوسىپ جاتقانىما قۋانامىن.

اقتوبە وبىلىسى حرومتاۋ اۋدانى

«اباي نەگىزگى مەكتەبى» كمم-نىڭ

دەنە شىنىقتىرۋ ءپانىنىڭ ءمۇعالىمى

مولشىلىق كەنجەبەك مولشىلىق ۇلى

---