InfoHub Logo

سىرداريانىڭ ءبىر قويناۋى، كوك شالعىندى كولدىڭ جيەگى. ورىستەگەن قوي، كۇيەزدەگەن جىلقى، جەلىدە جاتقان قۇلىن... جۇمىرتقاداي بەس اق ءۇي قاتارىن ءتىزىپ بۇلار تۇر. ورتاداعى ۇلكەن ۇيدەن كۇمپىلدەتە پىسكەن سارى سابانىڭ گۇرسىلى شىعىپ جاتىر.

بەس اق ءۇيدىڭ تىگىلگەن جەرى سىرداريانىڭ ءبىر الابى، قاتتى كولدىڭ جاعاسى. ءۇي كىمدىكى. مال كىمدىكى. بۇل ءالى وقۋشىعا بەلگىسىز.

...ەكى جۇك ماشينا تولا ادامدى مىنگىزىپ الىپ قۇيىنداتىپ كەلە جاتىر، بەت الىسى بەس اق ءۇي.

— قايدا باراسىڭدار؟ — دەسەڭ، بىرەۋى: بايعا! بىرەۋى: مايعا! بىرەۋى: قىمىزعا! — دەسىپ كۇلىسەدى. انىعىنا كەلگەندە:

— بوراشوۆتىكىنە بارامىز. سارى قىمىز، پىسكەن قوزىنىڭ مي پالاۋىن اساعالى كەلەمىز! — دەدى ورتاداعى ۇزىن بويلى، اتجاقتى كەلگەن ءبىر جىگىت.

پلوتيناعا كەلگەن سىرت قوناقتىڭ بۇل اۋىلعا سوقپاي كەتەتىنى از. ويتكەنى پلوتينا باسشىلارى ءوز سىيلىقتارى بولماعان سوڭ بوراشوۆتىكىنە الا جونەيتىن ادەتى بولعان. ونىڭ ۇستىنە پلوتينا باسشىلارىنىڭ اپارعان قوناعىن بوراشوۆ تا سەرپىن كورگەن ەمەس، ويتكەنى ونىڭ پلوتيناعا قايتكەندە مىقتاپ جايلاسۋدىڭ قامىندا جۇرگەن كەزى. سوندىقتان دا قىنجىلماي سىيلاۋىندا ونىڭ ىشتەي ەسەبى بار.

سونىمەن جيىرما-وتىز كىسى بوراشوۆتىڭ ۇيىندە ەكى كۇندەي قوناق بولدى. سابا-سابا قىمىز، مايا-مايا باۋىرساق سارى مايلى داستارحان اعىل-تەگىل بولدى دا جاتتى. سۇبەلەرى جەتە قارىس بولعان توقتىلار ءبىر ەمەس، ەكى رەت سويىلدى. قوناقتار ەكى كۇندى ارتىنا سالىپ ارەڭ اتتاندى. بۇعان بىر-ەكى جىل بولىپ قالدى.

بوراشوۆتىكىنە بارامىز، 15 گەكتار پىشەندىك جەردى بوراشوۆتىڭ مالىنا دەپ شاۋىپ بەرىپ ەدىك، ەندى سونى پلوتينانىڭ وگىزىمەن تاسىعالى كەلەمىز... — دەستى. سونىڭ ارقاسىندا بوراشوۆتىڭ مالى كۇيلى، ءشوبى جۇعىمدى، سوعىمى سەمىز، ەتى مايلى بولدى... قوناق كەلىپ جاتىر، كەتىپ جاتىر. ءبىراق، پايدالى ادامدار بولماسا، تەگىن ەت، تەگىن قىمىز نەگە بەرىلسىن؟ پايداسىز، كەزدەيسوق ادامدارعا بوراشوۆتار جۇرە سويلەيدى. شەكەسىنەن قارايدى، سەنگەندەرى كۇشتى سەكىلدى.

تاعى ءبىر توپ كىسىلەر كەلە جاتتى.

— قايدا باراسىز؟ — دەگەنگە:

— بوراشوۆتىكىنە بارامىز، پلوتينانىڭ دايىن كەسەگى مەن قىشىنان سىڭعىرلاعان ەكى بولمەلى ءۇي سالدىرىپتى. سوعان قۇتتى بولسىن ايتقالى بارامىز، — دەسەدى. بۇل بوراشوۆتاردىڭ سوڭعى تاپقان تابىسىنىڭ ءبىر ۇشقىنى بولاتىن-دى.

وسى سەكىلدى شىم-شىتىرىق شىتىرماننان قۇتىلۋدىڭ ارەكەتىنە كىرىسكەن بوراشوۆتار بىرتە-بىرتە پلوتينادان اۋىسىپ كولحوزعا بارۋعا جان سالا كىرىستى. اۋدان دا مۇنى سىرتقا سەرىككەن جوق، كولحوزعا ۇسىندى. يانۆاردىڭ 28 كۇنى تاعى دا بىر-ەكى ادام شابۋىلداپ كەلە جاتتى. بۇلارعا:

— قايدا باراسىز؟ — دەگەنگە:

— بوراشوۆتىكىنە بارامىز. ونى كولحوز پرەدسەداتەلى ەتىپ سايلاپتى. سوعان ءشۇيىنشى سۇراي بارامىز، — دەستى.

ارادا تورت-بەس كۇن وتكەن جوق. جازىلعان سيا كەپكەن دە جوق، تاعى دا بىرەۋلەر شاۋىپ كەلە جاتتى.

— قايدا باراسىز؟ — دەگەنگە:

— بوراشوۆتىكىنە بارامىز. اۋدان جيىلىس وتكىزىپ، بوراشوۆتى كولحوز پرەدسەداتەلدىگىنەن جۇلىپ تاستادى. سونى ايتقالى كەلەمىز، — دەستى.

مىنە، بوراشوۆتاردىڭ ۇيىنە بارعاندار مەن كەلگەندەردىڭ بىر-ەكى جىلعى شابۋىلىنىڭ ۇزىن ىرعا، قىسقاشا تاريحى وسىنداي. بۇلاردىڭ بۇكپەلى بۇلعاق، مال جيناپ، ءۇي تىگۋى، بارماق باسپاي، كوز قىسپاي بىلتىر مەنەن بيىل ەمەس، ارىدەن باستالادى.

اسىرەسە، كەيىنگى سوققى (كولحوز پرەدسەداتەلدىگىنە وتكىزىپ تۇرىپ، الىپ تاستاۋ) بوراشوۆتارعا وڭاي تيگەن جوق. قىمىزدىڭ كۇشى، ەتتىڭ مايلىسىنا سىيىنۋعا ۇيرەنگەن ادەتىمەن شابۋىلداسا دا وندىرگەنى از. دەگەنمەن بوراشوۆتار ءالى مۇقايتىن دا ەمەس. جەڭ ۇشىنان جەلپىندىرەتىندەرى دە بار بولۋى داۋسىز. ءبىرلى - جارىمدا بارا جاتقاندارعا:

— قايدا باراسىز؟ — دەسەڭ:

— بوراشوۆتىكىنە بارامىز، — دەسەدى ءالى كۇنگە.

وسى "بوراشوۆتىكىنە بارامىز"... تيىلماي، بوراشوۆتار سياقتىلاردىڭ بۇلدىرگىش تامىرى قيىلمايدى. ول ءۇشىن كەرەگى: ايلاشىل الاياقتاردى ارامىزدان الاستاپ، قىلمىستارىنىڭ بەتىن قاتتىراق اشۋ.

---