InfoHub Logo

بيىل قىزىلوردا وبلىسىندا 6570 وقۋشى  مەكتەپ بىتىرگەلى وتىر. ونىڭ 4574ء-ى، ياعني 70 پايىزى ۇلتتىق ءبىرىڭعاي تەست تاپسىرادى.

بۇل تۋرالى بۇگىن اپپارات ماجىلىسىندە ايتىلدى، دەپ حابارلادى وبلىستىق اكىمدىكتىڭ باسپا ءسوز قىزمەتىنەن.

سىناق تاپسىرۋعا نيەت بىلدىرگەندەردىڭ باسىم بولىگى جاراتىلىستانۋ-ماتەماتيكالىق باعىت بويىنشا ماماندىقتاردى تاڭداۋدا. ايتا كەتەيىك، 37 مەكتەپ ءبىتىرۋشى رەسەي، گرۋزيا، قازاقستان، وڭتۇستىك كورەيا مەملەكەتتەرىندە حالىقارالىق عىلىمي جوبانى قورعاۋ ارقىلى   مەملەكەتتىك وقۋ گرانتتارىن الدىن الا جەڭىپ الدى. بۇل مەكتەپ بىتىرۋشىلەر مينيسترلىكتىڭ بۇيرىعى نەگىزىندە ۇبت-دەن بوساتىلاتىن بولادى.

وبلىستا 9 ۇبت وتكىزۋ پۋنكتى جۇمىس جاسايدى. جەتەۋى اۋدان ورتالىقتارىندا، ەكەۋى قىزىلوردا قالاسىندا ورنالاسقان. ولاردىڭ بارلىعى دا ەرەجە تالاپتارىنا سايكەس جابدىقتالۋدا. مەكتەپ بىتىرۋشىلەر اي سايىن 2-3 رەتتەن ۇبت وتكىزۋ پۋنكتىندە جانە مەكتەپتىڭ بازاسىندا ايىنا 4 رەتتەن سىناما تەست تاپسىرۋدا. سىناما تەست قورىتىندىلارى اتا-انالارمەن بىرگە تالدانىپ، تومەن بولعان جاعدايدا دايىندىقتى كۇشەيتۋ، جاقسارتۋ شارالارى قاراستىرىلىپ كەلەدى. بۇگىنگى كۇنگى سىناما تەست بويىنشا وبلىستىڭ ورتاشا بالى 88،3ء-تى قۇراپ وتىر. «التىن بەلگىگە» - 352، «ۇزدىك اتتەستاتقا» 135 وقۋشى ۇمىتكەر.

ارال اۋدانىنداعى «قامباش»، جاڭاقورعان اۋدانىنداعى  «تالدىسۋ» قوسىمشا ءبىلىم بەرۋ ورتالىقتارى مەن سىرداريا اۋدانىنداعى «جالىن»، جاڭاقورعان اۋدانىنىڭ «تاۋ سامالى» وقۋشىلار تىنىعۋ لاگەرىنىڭ بازاسىندا 3108 تۇلەك دايىندىق كۋرسىنان ءوتتى. وعان 76 ملن 756 مىڭ تەڭگە قارجى قاراستىرىلعان. مەكتەپ بىتىرۋشىلەردىڭ از قامتىلعان وتباسى بالالارى ءۇشىن سىناما تەست كىتاپشالارىن ساتىپ الۋلارىنا جەرگىلىكتى بيۋدجەت ەسەبىنەن  22 ملن تەڭگە ءبولىندى.

- مەن سوڭعى ءبىر اپتا ىشىندە بارلىق اۋدانداردا بولىپ، ۇستازدار مەن مەكتەپ ءبىتىرۋشى تۇلەكتەرمەن كەزدەسىپ، پىكىرلەستىم. وقۋشىلاردىڭ كوڭىل-كۇيى كوتەرىڭكى. ەندىگى ماقسات - جاۋاپتى مەكەمەلەر بالالاردى تاسىمالداۋ، تاماقتاندىرۋ مەن قاۋىپسىزدىك جانە تەست تاپسىراتىن ورىنداردىڭ 100 پايىز دايىندىعىن قامتاماسىز ەتۋ. سونىمەن قاتار، پسيحولوگتار تۇلەكتەرمەن جۇمىستى كۇشەيتۋى ءتيىس، - دەدى وبلىس اكىمى قىرىمبەك كوشەربايەۆ.

---