InfoHub Logo

كونسەرتكە بيلەت تابا الماعاندىعى ءۇشىن، سۇيىكتىسىنىڭ سونشاما رەنجىگەنى جىگىتتىڭ جانىنا باتتى. "وسى كونسەرتكە بارامىن دەپ، نەشە كۇننەن بەرى ءۇمىت ەتىپ ەدىم... ساعان سەنگەندىگىم وسى ما؟.." - دەپ، قىزىنىڭ اشۋ شاقىرعاندىعىنا دا، وزىنە رەنجىپ ۇرىسقاندىعىنا دا جىگىت ءلام-ميم دەي المادى. راس، كىنالى ەدى. ءۇش كۇندىك كونسەرتتىڭ بىردە-بىرىنە دە بيلەت تابا العان جوق. بيلەت جوق ەدى. كۇنىبۇرىن ساتىلىپ كەتكەن. قولدان-قولعا تيگىزبەگەن.

بارىنەن دە بۇرىن جىگىتكە سۇيىكتىسىنىڭ ءدال ءقازىر وسىعان بولا جىلاعاندىعى قيىن ءتيدى. نە دەپ جۇباتارىن بىلمەدى. سويتسە دە، ءوزىن ءبىرجاعىنان جابىرلەنگەن جانداي سەزىنىپ وتىر. قولىنان كەلگەننىڭ ءبارىن جاسادى عوي. كونسەرتتىڭ بيلەتى ونسىز دا قىمبات ەدى. سونىڭ وزىندە دە، ەگەر بيلەت قولدا ساتىلىپ جاتسا، بىرنەشە ەسە باعاسىنا دا ساتىپ الۋعا كەلىسەر ەدى. باعانا عانا سونداي باعاعا ساتىپ جاتىر ەكەن دەپ جۇگىرگەن قالىڭ دۇرمەكتىڭ اراسىندا ءوزى دە بولماپ پا ەدى. ءبىراق جىم-جىلاس. بيلەت جوق.

ەندى مىنە وسى ءۇشىن سۇيىكتىسى جىلاپ وتىر. جىگىتتىڭ جانىنا باتىپ وتىرعانى دا وسىنىسى بولدى. ەشۋاقىتتا مۇنداي مىنەز كورسەتپەگەن ەدى. "ەركە عوي، - دەپ جىميدى جىگىت. - بىرەۋدىڭ ەركە-توتايى. تىم قىمبات كيىنەدى. قىمبات مەكتەپتەن وتكەن. بىرنەشە شەت ءتىلىن مەڭگەرگەن. سونىسىنا قاراپ ءباسىن ارتتىرادى-داعى". باعانا عانا ءوزى ساتىپ اپەرگەن باعالى زاتتارىن وزىنە قاراي لاقتىرىپ: "وسىنىڭ بارلىعىنىڭ ماعان كەرەگى نە؟! وسىلار وسى كونسەرتتىڭ ءبىر بيلەتىنە دە تاتيدى ما؟!" دەگەنى قيىن بولدى. ونى ءوزى دە بىلەدى.

"وسى كونسەرتى بولعالى جاتقان انشىلەردىڭ ءباسى نەگە تىم جوعارى؟" دەپ ويلادى جىگىت.

كەشكى قاراڭعىلىق ءتۇسىپ، كوز بايلانا باستادى. ەكى عاشىق بىر-بىرىنە توڭ-تەرىس قالىپتا وتىر. قىز ماناعىداي ەمەس، جىلاۋىن قويىپتى. ءبىراق جىگىتىنە ارقاسىن بەرگەن كۇيى ءۇنسىز وتىر. ماعان ءالى دە وكپەلى دەپ ويلادى جىگىت. قىزىنا بىردەڭە دەپ سويلەۋدەن جاسقاندى. ءوزىنىڭ اشۋى باسىلار ءساتىن كۇتتى.

بۇل كەزدە كونسەرت باستالىپ جاتىر ەدى. كونسەرت ءوتىپ جاتقان ساراي جاقتان شۇعىلا ساۋلە توگىلەدى. "وسى سارايدى نەگە وسىنداي قىلىپ سالدى ەكەن؟ - دەپ ويلادى جىگىت. - قالانىڭ قاي بۇرىشىنان كوز سالساڭ دا، وسى سارايدان شۇعىلا ساۋلە توگىلىپ تۇرادى. ءوزىن وسى انشىلەر ءۇشىن عانا ارنايى سالىپتى دەيدى".

ارادا تىم-تىرىس تىنىشتىق ورناپ تۇر ەدى. جىگىت كەنەت قالعىپ كەتىپ بارا جاتقانداي بولىپ، سەلك ەتە ءتۇسىپ، كوزىن اشىپ الدى... وسى ءسات ءوزىنىڭ ۇيىندە، ءوزىنىڭ توسەگىندە جاتقاندىعىن ءبىر-اق اڭعاردى. ماناعىسىنىڭ ءبارى ءتۇس ەكەن. كورگەن ءتۇسىن ويلانىپ ءبىراز جاتتى. سونان سوڭ  تەلەفونىنا قول سوزدى. سۇيىكتىسىنە قوڭىراۋ شالماق بولدى. ءوزىنىڭ كورگەن ءتۇسىن ايتقىسى كەلدى. تەلەفوندى ىلە-شالا كوتەرگەن قىزعا جىگىت:

- تۇسىمدە ءوزىمىزدىڭ ءداستۇرلى باعىتتاعى ءان سالاتىن انشىلەردىڭ كونسەرتىنە الىپ بارمادىڭ دەپ، قيعىلىق مىنەز تانىتىپ جاتىر ەكەنسىڭ، - دەپ كۇلدى. - ءتىپتى وسىعان بولا سەنەن اجىراپ قالامىن با دەپ قورىققانىم.

قىز جىگىتتىڭ سوزىنە سىڭعىرلاي كۇلدى.

- بۇل مۇمكىن بولا قويار ما ەكەن؟ - دەدى قىز كۇلىپ. - مەنىڭ تالعامىم تەك شەتەل ەسترادا جۇلدىزدارىنىڭ كونسەرتىن عانا قالايدى عوي.

- ءوزىم دە سولاي ويلاپ ەدىم، - دەدى جىگىت. - ءبىراق ناق وسىنداي جاعداي سەنىڭ باسىڭدا الداعى ۋاقىتتا قايتالانىپ قالماسىنا كىم كەپىل؟ ادام ءتۇستى بەكەر كورمەيدى عوي.

- مۇمكىن! - دەدى قىز ويناقىلانىپ. - ءدال سولاي دەپ قيعىلىق مىنەز تانىتىپ جاتۋىم دا عاجاپ ەمەس. سوندىقتان دا بارىنە دە دايىن بول، جىگىتىم!

جىگىت كۇلدى:

- نەسى بار، سەن ءۇشىن بارىنە دە دايىنبىز عوي!

---