InfoHub Logo

بۇگىن استانادا ق ر دەنساۋلىق ساقتاۋ جانە الەۋمەتتىك دامۋ ۆيسە-مينيسترى ەلجان ءبىرتانوۆتىڭ، JAMK جانە Lahti (فينليانديا) قولدانبالى عىلىمدار ۋنيۆەرسيتەتى باسقارماسى باسشىلارىنىڭ، قازاقستاننىڭ مەديسينالىق جوو مەن كوللەدجدەرى جەتەكشىلەرىنىڭ جانە ت.ب. قاتىسۋىمەن «مەديسينالىق قىزمەتتەر مەن مەديسينالىق ءبىلىم بەرۋدى جەتىلدىرۋ بويىنشا قازاقستان مەن فينليانديا ىنتىماقتاستىعى» اتتى دوڭگەلەك ستول ءوتتى، دەپ حابارلادى ۆەدومستۆونىڭ باسپا ءسوز قىزمەتى.

شاراعا قاتىسۋشىلار قازاقستان مەن فينليانديانىڭ جوعارعى بىلىكتى مەديسينالىق كادرلاردى دايىنداۋداعى، ولاردىڭ دەنساۋلىق ساقتاۋ سالاسىنداعى ءرولى، العاشقى مەديسينالىق-سانيتارلىق كومەك قىزمەتىن ءتيىمدى ءۇيىمداستىرۋ سالاسىنداعى ىنتىماقتاستىق ماسەلەلەرىن تالقىلادى.

ەلجان ءبىرتانوۆ حالىقارالىق ستاندارتتار نەگىزىندە مەديسينالىق كادرلاردى ونىڭ ىشىندە مەيىرگەرلىك ءىس ماماندارىن دايارلاۋ جۇيەسىن جەتىلدىرۋ - قازاقستان حالقىنا كورسەتىلەتىن مەديسينالىق كومەك ساپاسىن ارتتىرۋعا مۇمكىندىك بەرەتىنىن اتاپ ايتتى.

دوڭگەلەك ستول اياسىندا «ورتا مەديسينالىق قىزمەتكەرلەر مەن فارماسيەۆتەردى دايارلاۋ مەن قايتا دايىنداۋ رەسپۋبليكالىق كوللەدجى» رمقك ديرەكتورى نايليا رۋزدەنوۆا، استانا اكىمدىگىنىڭ «مەديسينالىق كوللەدج» مقكق ديرەكتورى اقبالا سارجانوۆا، JAMK قولدانبالى عىلىمدار ۋنيۆەرسيتەتى باسقارماسىنىڭ باسشىسى  ايلا پالونيەمي مەن Lahti قولدانبالى عىلىمدار ۋنيۆەرسيتەتى باسقارماسىنىڭ باسشىسى كاري سالمي دەنساۋلىق ساقتاۋ سالاسى مەن مەيىرگەرلىك ءىستى دامىتۋ بويىنشا ءوزارا تۇسىنىستىك پەن ستراتەگيالىق ىنتىماقتاستىق تۋرالى  مەموراندۋمعا قول قويدى.

اتالعان قۇجات تاراپتاردىڭ كەلەسى باعىتتار بويىنشا ىنتىماقتاستىعىن قاراستىرادى: مەديسينالىق ءبىلىم بەرۋ ۇيىمدارىنداعى مەنەدجمەنتتى جەتىلدىرۋ؛ ءبىلىم بەرۋ باعدارلامالارىنىڭ تيىمدىلىگى مەن پەداگوگ كادرلاردىڭ الەۋەتىن ارتتىرۋ جانە اقپاراتتىق، ماتەريالدىق-تەحنيكالىق رەسۋرستاردى جەتىلدىرۋ. 

بۇرىن حابارلانعانداي، قازاقستاننىڭ 10 مەديسينالىق كوللەدجى، ونىڭ ىشىندە 2016 جىلى 6، 2017 جىلى 4 وقۋ ورنى جوعارعى مەديسينالىق كوللەدج بولىپ قايتا قۇرىلادى. اتالعان وقۋ ورىندارىندا فين ساراپشىلارىنىڭ قاتىسۋىمەن ازىرلەنگەن «مەيىرگەرلىك ءىس» ماماندىعى بويىنشا قولدانبالى باكالاۆريات باعدارلاماسى ەنگىزىلمەك. 

ق ر دەنساۋلىق ساقتاۋ جانە الەۋمەتتىك دامۋ مينيسترلىگى (ءارى قاراي - ق ر ءدسادم) «مەيىرگەرلىك ءىس» ماماندىعى بويىنشا قولدانبالى باكالاۆرياتتى ەنگىزۋ بويىنشا جوبانى جۇزەگە اسىرۋدى 2014 جىلى ەكسپەريمەنتالدى تارتىپتە 6 مەملەكەتتىك مەديسينالىق كوللەدج بازاسىندا (استانا قالاسىنىڭ مەديسينالىق كوللەدجى، كوكشەتاۋ مەديسينالىق كوللەدجى، قىزىلوردا مەديسينالىق كوللەدجى، پاۆلودار مەديسينالىق كوللەدجى، رەسپۋبليكالىق ورتا مەديسينالىق جانە فارماسيەۆتيكا قىزمەتكەرلەرىن دايىنداۋ مەن قايتا دايارلاۋ كوللەدجى، باتىس قازاقستان مەديسينالىق كوللەدجى) باستادى. 

ق ر دەنساۋلىق ساقتاۋ سالاسىن دامىتۋدىڭ 2016-2019 ارنالعان «دەنساۋلىق» مەملەكەتتىك باعدارلاماسىن جۇزەگە اسىرۋ اياسىندا ق ر ءدسادم ماماندارى JAMK جانە Lahti (فينليانديا) قولدانبالى عىلىمدار ۋنيۆەرسيتەتتەرىنىڭ ارىپتەستەرىمەن بىرلەسە وتىرىپ قر-داعى مەيىرگەرلىك ءبىلىم بەرۋ جۇيەسىن جەتىلدىرۋدىڭ 2016-2019 جىلدارعا ارنالعان جول كارتاسىن جاسادى.

قولدانبالى باكالاۆريات باعدارلاماسى ەۋروپالىق ديرەكتيۆالارعا ساي دۋالدى ءبىلىم بەرۋ قاعيدالارىن قاراستىرادى. ونىڭ ىشىندە وقۋ ساعاتتارىنىڭ 60-70%-دان كەم ەمەس (وقۋ مەرزىمى 3،5 جىل) كولەمىندە بىلىكتى تالىمگەردىىڭ باسشىلىعىمەن ەمحانالىق بازادا وندىرىستىك پراكتيكانى جۇزەگە اسىرۋ دا بار. اتالعان باعدارلاما ەۋرووداق ەلدەرىندە كەڭىنەن تارالعان، سونىمەن قاتار، پراكتيكالىق ازىرلىگى باسىم جوعارى بىلىكتى مەيىرگەرلەردى دايىنداۋعا باعىتتالعان.

«مەيىرگەرلىك ءىس» ماماندىعى بويىنشا قولدانبالى باكالاۆريات جوعارعى مەديسينالىق كوللەدج تۇلەكتەرى اۋرۋلاردى دارىگەرگە دەيىنگى تەكسەرۋ، الدىن الا دياگنوز قويۋ، بەيىندى ماماندارىنا كونسۋلتاسياعا باعىتتاۋ، بالالار جانە ەرەسەك تۇرعىندار پاتروناجى، دارىگەردىڭ باقىلاۋىمەن دارىلىك تاعايىنداۋلاردى جازۋ سىندى  مەيىرگەرلىك قابىلداۋ ءۇشىن كاسىبي ماشىقتاردى يگەرىپ شىگادى.

بيىل فين جانە وتاندىق ماماندار «مەيىرگەرلىك ءىس» ماماندىعى بويىنشا قولدانبالى باكالاۆرياتتىڭ بىرىكتىرىلگەن باعدارلاماسىن ازىرلەدى. اتالعان باعدارلاما بويىنشا بۇدان بۇرىن ءبىلىم العان مەيىرگەرلەر ءبىر جارىم جىلدىڭ ىشىندە قوسىمشا وقۋ ارقىلى ءوز كاسىبي ماشىقتارىن دامىتا الادى.

بىرىكتىرىلگەن باعدارلاما بويىنشا وقىتۋ ەكسپەريمەنتالدى تارتىپتە جوعارىدا اتالعان 6 مەديسينالىق كوللەدجدە 2016 جىلعى قىركۇيەك ايىنان باستالدى. باعدارلاما بويىنشا 150 ادام (ءاربىر كوللەدجدە 25 ورىننان) تەگىن وقىتىلماق.

ەستەرىڭىزگە سالا كەتەيىك، قازىرگى تاڭدا قازاقستاندا 26 مەملەكەتتىك جانە 37 جەكە مەديسينالىق كوللەدج بار. ولار جىل سايىن ورتا ەسەپپەن 12 مىڭ ورتا بۋىن مەدقىزمەتكەر دايىندايدى. بۇگىندە ورتا مەدپەرسونال سالا قىزمەتكەرلەرىنىڭ ەڭ كوپ ساناتىن قۇرايدى، ورادىڭ سانى شامامەن 160 مىڭ مامان.

---