InfoHub Logo

قازاقتار استى ءدام دەپ اتايدى. حالىق اراسىندا بىرەۋدى ەسكە العاندا: «دامدەس بولىپ ەدىك. ۇيىنەن ءدام تاتىپ ەدىك»، - دەپ، رەنجىگەندە، وكپەلەگەندە: «ءدام-تۇزىم اتسىن! ءدام-تۇزىما سالدىم»، - دەپ ايتقان سوزدەرىنىڭ ۇلت ۇعىمىندا وزىندىك ورنى بار. ويتكەنى ءار قازاق وزدەرىنىڭ جاقىندارى مەن تۋىس-جەكجاتتتارىنا عانا ەمەس، ەل سىيلاعان قۇرمەتتى ازاماتتارىنا، ءقادىرلى اقساقالدارىنا، انالارىنا ءوز ۇيىنەن ءدام تاتىرۋدى ۇلكەن مۇرات، پارىز دەپ ساناعان. ول جولدان كۇنى بۇگىنگە دەيىن تانعان جوق. تەك تانىستار ەمەس، ۇيگە كەلگەن كەز-كەلگەن جولاۋشى، بەيتانىس كىسىگە دە ءدام تاتىرماي جىبەرمەگەن، سەبەبى ۇلت ۇعىمىندا دامدە كيە، قادىر-قاسيەت، ىرىس، بەرەكە-بىرلىك، تىرلىك بار دەگەن تەرەڭ تۇسىنىك تىم ەرتەدەن-اق قالىپتاسقان.

ءدام تاتىرۋدىڭ قوعامدىق، الەۋمەتتىك ىستەردە ماڭىزى زور بولعان. ەڭ الدىمەن، ادەيى شاقىرىپ، داستارقانىنان ءدام تاتىرۋ – اتا سالت، قازاقى ادەپ، جول جورالعى. ەكىنشىدەن، ول – سىيلاۋدىڭ، قۇرمەتتەۋدىڭ، كوڭىل ءبىلدىرۋدىڭ ايعاعى. ۇشىنشىدەن، قاي جەردە بولماسىن، قاي ۋاقىتتا بولماسىن، سىيلاس، قامقور، تىلەكتەس بولا ءجۇرۋدىڭ كىلتى. ەل ءداستۇرى بويىنشا دامدەس بولعان ادامدار بىر-بىرىنە قيانات جاسامايدى، جوعالعانىن ىزدەسەدى، تابىسىنا قۋانىپ، قايعىسىنا ورتاقتاسادى.

بۇل – عاسىرلار بويى ساناعا سىڭگەن ساليقالى سالت. دەمەك، ءدام تاتىرۋ، ءدام تاتۋ – ادامگەرشىلىك، دوستىق، بىرلىك بەلگىسى. بۇل جاقسى ءۇردىس حالىقپەن بىرگە جاسايدى.

 

---