InfoHub Logo

قىزىلوردا مەديسينالىق جوعارى كوللەدجىنىڭ
مەيىرگەر ءىسى نەگىزدەرى ءپانىنىڭ وقىتۋشىسى
كەمەلبايەۆا گۋلايم ساپاربەكوۆنا

قوعامىمىزدىڭ قۇندىلىعى — «ادامي كاپيتاليزمدى» دامىتۋ دەنساۋلىقتى ساقتاۋ جانە مەديسينالىق ءبىلىم بەرۋ سالاسىنداعى رەفورمالارمەن تىعىز بايلانىستى. قازىرگى كەزەڭ قازاقستاندىقتاردىڭ دەنساۋلىعىن ساقتاۋعا جانە نىعايتۋعا جاۋاپتى مەديسينا قىزمەتكەرلەرىنە جاڭا مىندەتتەر جۇكتەيدى. ازاماتتاردىڭ دەنساۋلىعىن ساقتاۋ سالاسىنداعى مەملەكەت ساياساتىنىڭ نەگىزگى پرينسيپتەرى — مەديسينالىق كومەكتىڭ پروفيلاكتيكالىق باعىتتىلىعى، ونىڭ بارشاعا قولجەتىمدىلىگى جانە كومەك ساپاسىن كوتەرۋ ەكەنىن ەستە ساقتايتىن بولساق، وسى ماقساتتاردى ىسكە اسىرۋشى، نەگىزگى قوزعالتقىش كۇشى — مەيىرگەرلەر.

مەيىرگەر قىزمەتىندە ۇيىمداستىرۋشىلىق، عىلىمي-زەرتتەۋشىلىك جانە وقىتۋشىلىق مىندەتتەردى ورىنداۋ قاجەتتىلىگى قالىپتاستى. جەكە دارالىق پرينسيپ نەگىزىندە پاسيەنتتىڭ مەديسينالىق پروبلەماسىن شەشۋگە باعىتتالعان مەيىرگەردىڭ جاڭا مودەلى نەمەسە جاڭا كلاسى دۇنيەگە كەلدى. پاسيەنت كۇتىمىنىڭ ساپاسىن جاقسارتۋعا نەگىزدەلگەن ەڭبەكتى ۇيىمداستىرۋدىڭ تۇرلەرىن دامىتۋ — مەيىرگەرلىك تەكسەرۋ، مەيىرگەرلىك دياگنوز قويۋ، كۇتىم جانە باقىلاۋ جوسپارىن قۇرۋ، ناتيجەسىن باعالاۋ مەن وزگەرىس ەنگىزۋ. مەيىرگەر ىسىندە عىلىمي ىزدەنىس ءىس-شارالارى جۇرگىزىلە باستادى. شەتەلدىك جانە وتاندىق تاجىريبە نەگىزىندە مەيىرگەر ءىسى مەديسينانىڭ دەربەس ءبىر سالاسى بولىپ قالىپتاسۋدا.

قازىرگى ۋاقىتتا مەيىرگەر بەينەسى تۇبەگەيلى وزگەرگەن، عىلىمي تۇرعىدان جانە تاجىريبەدەن الساق قازىرگى مەيىرگەر ءوز بەتىنشە مەيىرگەرلىك شەشىم قابىلداپ، جوسپارلاپ، ناقتى مەيىرگەرلىك كۇتىم كورسەتەتىن، جاڭا تەحنولوگيالاردى مەڭگەرگەن، سونداي-اق ناۋقاستىڭ ەمىنە بايلانىستى مەيىرگەرلىك وي-پىكىرىن تولىق بىلدىرە الاتىن دارىگەردىڭ تەڭ قۇقىلى سەرىكتەسى رەتىندە قابىلدانادى. سوندىقتان بۇكىل الەمدە مەيىرگەر ءىسى ماماندارى تەك نەگىزگى تەحنيكالىق جانە مامانداندىرىلعان بىلىمىمەن توقتالماي، سونىمەن قاتار باكالاۆر، ماگيستراتۋرا جانە دوكتورانتۋرا دەڭگەيىندە ءبىلىمىن يگەرۋدە.

ارينە، بۇگىنگى كۇنى مەيىرگەرلەر دايىنداۋ ىسىنە جاڭا، جوعارى تالاپتار قويىلۋدا. جاڭا مودەلدەگى مەيىرگەردىڭ ءرولى مىناداي جەتى باعىتتا انىقتالىپ وتىر.

— ەمدەلۋشىنىڭ كۇتىمىن ۇيىمداستىرۋشى مەيىرگەر؛

— ەمدەلۋشىنىڭ كۇتىمىن ورىنداۋشى مەيىرگەر؛

— ەمدەلۋشىنىڭ ىقىلاسىن قورعاۋشى (ادۆوكات)؛

— پەداگوگ (كونسۋلتانت) مەيىرگەر؛

— زەرتتەۋشى مەيىرگەر؛

— ليدەر (كوشباسشى) مەيىرگەر؛

— مەديسينالىق بريگادانىڭ بەلسەندى مۇشەسى رەتىندەگى مەيىرگەر.

دۇنيەجۇزىلىك قوعامداستىقتا مەيىرگەرلەردىڭ بۇل رولدەرى مامان رەتىندە قىزمەت ەتۋدە. ال ءبىزدىڭ قوعامىمىزعا مەيىرگەرلەردىڭ وسى قىزمەت تۇرلەرى بىرتىندەپ ەنىپ كەلۋدە.

قازاقستاننىڭ بولون پروسەسىنە ەنۋى مەيىرگەرلىك ىستەگى ءبىلىمنىڭ، كاسىبي ستاندارتتاردىڭ، بىلىكتىلەردىڭ ەۆروپالىق دەرەكتەرگە سايكەس بولۋىن قاجەت ەتەدى.

قازاقستان رەسپۋبليكاسىنداعى 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىن جۇزەگە اسىرۋ اياسىندا دەنساۋلىق ساقتاۋ جانە الەۋمەتتىك دامۋ مينيسترلىگىنىڭ قىزمەتكەرلەرى فينليانديانىڭ JAMK جانە Lahti قولدانبالى عىلىمدار ۋنيۆەسيتەتىندەگى ارىپتەستەرىمەن بىرلەسىپ، مەيىرگەرلەرگە ءبىلىم بەرۋ جۇيەسىن جەتىلدىرۋ جونىندە «جول كارتاسىن» جاسادى.

وسىعان وراي فين جانە وتاندىق ماماندار ءۇشىن «مەيىرگەر ءىسى» ماماندىعى بويىنشا قولدانبالى باكالاۆرياتتىڭ ءبىلىم بەرۋ ستاندارتى قۇرىلدى.  

مۇنداعى باستى ماقسات مەديسينالىق قىزمەت كورسەتۋدە مەيىرگەرلەردىڭ ءرولىن كوتەرىپ، ولاردىڭ جاۋاپكەرشىلىگىن ارتتىرۋ. سونىمەن بىرگە، مەيىرگەرلەردىڭ قىزمەت ىستەۋ دەربەستىگى مەن وكىلەتتىگى كەڭەيەدى. جاسىرارى جوق، دارىگەرگە كۇن سايىن ءبىر سۇراقپەن كەلەتىن ناۋقاستار بارشىلىق. دارى-دارمەك الۋ نەمەسە ساراپتاما قورىتىندىسىن ءبىلۋ ءۇشىن دە كەلىپ جاتادى. ەندى مۇنداي ماسەلەلەردىڭ بارلىعىن مەيىرگەرلەر شەشەدى. قاجەت جاعدايدا عانا دارىگەرلەر قارايدى. بۇل مەديسينا ماماندارىن باسقا قىرىنان تانۋعا مۇمكىندىك بەرەدى. كلينيكالىق تۇرعىدا ويلاۋ قابىلەتى بولسىن، جوسپار قۇرۋدا بولسىن جان-جاقتى دۇنيەنى مەڭگەرە ءبىلۋى ءتيىس. وسىلايشا دەنساۋلىق ساقتاۋ سالاسىندا مەيىرگەرلەردىڭ  جاڭا ۇلگىسى قالىپتاسۋدا.

---