د.نازاربايەۆا بەس كۇندىك وقۋ اپتاسىن ەنگىزۋگە قاتىستى تۇسىنىكتەمە بەردى
ق ر پرەمەر-مينيسترىنىڭ ورىنباسارى داريعا نازاربايەۆا ءبىرىنشى سىنىپ وقۋشىلارى ءۇشىن بەس كۇندىك وقۋ اپتاسىن ەنگىزۋگە قاتىستى تۇسىنىكتەمە بەردى.
«مەملەكەت باسشىسى اتاپ وتكەندەي، بەس كۇندىك وقۋ اپتاسى بيىل ءبىرىنشى سىنىپ وقۋشىلارى ءۇشىن ەنگىزىلەدى. سەبەبى، ءبىرىنشى سىنىپ ورەندەرى «نازاربايەۆ زياتكەرلىك مەكتەپتەرى» اق تاراپىنان جازىلعان وقۋلىقتارمەن العاش رەت مەكتەپكە بارادى. بۇل مەكتەپتەر كوپ جىلدان بەرى ءبىلىم نارىعىندا قىزمەت ەتۋدە جانە وزدەرىن جاقسى جاعىنان تانىتتى. ولار وتە مىقتى تۇلەكتەردى دايىنداپ شىعارۋدا»،-دەدى د.نازاربايەۆا بۇگىن استاناداعى № 81 «Astana English School» مامانداندىرىلعان گيمنازياسى مۇعالىمدەرىمەن جانە وقۋشىلارىمەن كەزدەسۋ بارىسىندا.
وسى رەتتە ۆيسە-پرەمەر اتالعان وقۋلىقتار بىرتىندەپ قازاقستاننىڭ بارشا مەكتەپتەرىنە ەنگىزىلەتىندىگىن اتاپ ءوتتى.
«ءبىرىنشى سىنىپ وقۋشىلارىنا ارنالعان بۇل وقۋلىقتار فۋنكسيونالدىق ساۋاتتىلىقتى دامىتۋدى، ينتەگراسيالانعان پاندەردى قاراستىرادى. وسىنىڭ ەسەبىنەن جالپى وقۋ جۇكتەمەسى ازايادى. بۇل وقۋلىقتاردىڭ ارقاسىندا وقۋشىلار 1 قىركۇيەكتەن باستاپ اپتاسىنا بەس كۇن وقيتىن بولادى»،-دەدى ول.
سونىمەن قاتار ۇكىمەت باسشىسىنىڭ ورىنباسارى 2017-2018 وقۋ جىلىندا بەس كۇندىك وقۋ اپتاسى وزگە سىنىپتاردا ەنگىزىلە باستايتىندىعىن جەتكىزدى. سول ۋاقىتقا دەيىن «نازاربايەۆ زياتكەرلىك مەكتەپتەرى» قاجەتتى وقۋلىقتاردى دايارلايتىن بولادى.
اۆتور: رۋسلان عابباسوۆ
You Might Also Like
-
ق ر پرەمەر-مينيسترىنىڭ ورىنباسارى داريعا نازاربايەۆانىڭ بولجامىنشا، قازاقستاننىڭ ەڭبەك نارىعىندا ءىت سالاسىنىڭ ماماندارىنا سۇرانىس ارتادى. بۇل تۋرالى بۇگىن ۆيسە-پرەمەر استانا اكىمدىگىنىڭ كاسىبي-تەحن...
