InfoHub Logo

ارقادا التىنبەك دەگەن باتىردىڭ اسى بولىپ ءۇش ءجۇزدىڭ بالاسىنا تۇگەل ساۋىن ايتىپتى. اسقا جورا-جولداستارىمەن وتەگەن دە كەلەدى. ول الدىمەن «حانعا سالەم بەرەيىن» دەپ ابىلاي وتىرعان ۇيگە بۇرىلادى. حان التى قانات اق ۇيدە توقسان توعىز بيمەن اڭگىمە-دۇكەن قۇرىپ وتىر ەكەن. ءۇي سىرتىنان ات ۇستىندە تۇرىپ تىڭداسا، ابىلاي:

— بيلەرىم، دۇنيەدەگى قازىنا نە؟ — دەپ سۇراپتى.

بيلەردىڭ بىرەۋى: «قازىنا — قوراداعى قوي، ورىستەگى جىلقى» دەسە، ەندى بىرەۋلەرى: «التىن، كۇمىس، اسىل تاس — تاۋسىلماس قازىنا» دەيدى.

ابىلاي بيلەردىڭ سوزىنە رازى بولماي، باسىن شايقايدى.

بيلەر ابىلايعا: «تاقسىر، ءسوزىڭىزدىڭ جاۋابىن تابا المادىق، شەشۋىن ءوزىڭىز ايتىڭىز»، — دەيدى.

وسى كەزدە وتەگەن ات ۇستىندە تۇرىپ:

— ۋا، سويلەس، — دەيدى.

— سويلەسەڭ، سويلە، — دەپ شۋىلدايدى ۇيدە وتىرعان بيلەر. سوندا وتەگەن:

— اۋزىن بۋعان توقسان توعىز وگىز جوعالتىپ ءجۇرمىن، — دەپتى.

ابىلاي وتەگەن باتىردىڭ داۋسىنان تانىپ:

— مىناۋ ۇلى جۇزدەگى وتەگەن باتىر عوي. اتتان ءتۇسىرىپ، ۇيگە كىرگىزىڭدەر، — دەيدى دە بيلەرگە: — شۋىلداماي تىنىش وتىرىڭدار، ونىڭ اۋزىن بۋعان توقسان توعىز وگىز دەگەنى — سەندەرسىڭدەر. جاڭاعى دۇنيەدەگى قازىنا نە دەگەن ءسوزدىڭ شەشۋىن ەندى وتەگەننەن سۇرايىق، — دەيدى.

وتەگەن ۇيگە كىرگەن سوڭ ابىلاي وڭ جاعىنان ورىن بەرەدى دە:

— باتىر، ەستىگەن ءسوزىڭنىڭ شەشۋىن ءوزىڭ ايتشى، — دەيدى. وتەگەن سوندا ويلى كوزبەن وتىرعان توپتى شولىپ شىعىپ:

— قوي جيناساڭ، قورادا، ءۇي جيناساڭ، تۇيەدە، تۇيە جيناساڭ، قيادا قالادى. جىلقى جيناساڭ، دابىلمەن ايداۋعا كەتەدى، ىسقىرسا، جاۋدىكى بولدى. دۇنيەدەگى تاۋسىلماس قازىنا حالىق بولادى، — دەگەن ەكەن.

وسىنى ايتىپ بولعان سوڭ وتەگەن باسىنداعى بوركىن شەشىپ، قاسىنا قويادى. ابىلاي دا بوركىن الىپ، وتەگەننىڭ بوركىنىڭ ۇستىنە كيگىزىپ قويادى. بورىككە بورىك كيىلگەن سوڭ، وتەگەن باتىر ەكى بورىكتى قاباتتاپ ۇستاپ:

— كورىقپا، بوركىم، قورىقپا! ءىشى جوق دەپ، ىشتەپ بەردى. تىسى جوق دەپ، تىستاپ بەردى بۇل حانىڭ. حان بەرگەنىن قايتىپ السا، بولادى، قارا بەرگەنىن قايتىپ السا، بالا بولادى، — دەپ ەكى بورىكتى قاباتتاپ باسىنا كيىپ الىپتى.

---