InfoHub Logo

جازدىڭ تامىلجىعان ىستىق كۇندەرىنىڭ ءبىرى. اڭىزاقتان شولىركەگەن قۇرمانعازى ءبىر اۋىلعا كەزدەسىپ، اۋىل ورتاسىنان شەتكەرى، كوگالعا تىگىلگەن اقبوز ۇيگە قاراي اتىنىڭ تىزگىنىن بۇرادى. ءۇي سىرتىنا جاقىن كەلىپ، ىشكە دىبىس بەرەدى. ۇيدەن وسى اۋىلدىڭ تۇيەشىسى جيەنالى شىعىپ، قۇرمانعازىعا امانداسادى. قۇرمانعازى ونىڭ سوزىنەن بۇل ادىلەكە تورەنىڭ وتاۋى ەكەنىن بىلەدى دە:

— شولدەپ كەلە جاتىرمىن، سۋسىنداپ شىعۋعا رۇقسات بولار ما ەكەن؟ — دەيدى. سوندا جيەنالى:

— جارايدى، حانىمعا بارىپ ايتايىن، — دەپ ۇيگە قايتا كىرگەندە، توردە وتىرعان حانىم:

— ءۇيدىڭ قوجاسى جوق، تۇسۋگە بولمايدى! — دەيدى داۋىستاپ.

سىرتتا تۇرعان قۇرمانعازى بۇل ءسوزدى ەستىگەننەن كەيىن اۋىلدىڭ باتىس جاعىنا جاعالاي قونعان كەدەيدىڭ قاراشا ۇيلەرىنە قاراي جۇرە بەرەدى. ءبىر ءۇيدىڭ جانىنا كەلىپ، «وسى اۋىل ءۇيىنىڭ ءتورىن بەرمەسە دە، كولەڭكەسىن بەرەتىن شىعار» دەپ اتىنان ءتۇسىپ، كيىز ءۇيدىڭ كولەڭكەسىنە وتىرادى. ءۇي يەسى جارلى بولسا دا، ءوزىنىڭ شاماسىنا قاراي كۇيشىنى كۇتىپ الادى.

قۇرمانعازى ءبىراز تىنىستاپ، ەندى كەتپەكشى بولىپ سىرتقا شىققاندا بيە ساۋىنىنان قايتقان بايدىڭ قىز-كەلىندەرىن كورەدى. قولدارىندا ءبىر-بىر شەلەك تولى ءسۇت، كوبىگى بۇرقىراپ، تەڭسەلگەن جۇرىستەن جەرگە توگىلىپ كەلەدى. مۇنى كوزى شالعان قۇرمانعازى دومبىراسىن الىپ، ءبىر كۇيدى توگىلتە تارتىپ جىبەرەدى. دومبىرانىڭ بۇلبۇلداي سايراعان اسەم سازىن ءۇي يەسى دە، شۋىلداسىپ كەلە جاتقان قىز-كەلىنشەكتەر دە ۇيىپ تىڭداي قالادى. قۇرمانعازى كۇيىن بىتىرگەندە قاسىندا تۇرعان ءۇي يەسى:

— قوناعىم، بۇل تارتقانىڭىز قانداي كۇي؟ — دەپ سۇرايدى.

— وي، اعاتاي-اي! بۇلار بايلىققا بەلشەسىنەن باتىپ، ءيتى ماي جەمەي وتىرسا دا، سۇراعاندارعا ءسۇت تۇگىل، ءبىر جۇتىم سۋ دا بەرمەيدى. ولار ءسۇت پەن قىمىزدى ءسىز بەن ءبىز سەكىلدىلەردىڭ ىشكەنىنەن كورى، جەرگە توگىلگەنىن جاقسى كورەدى. اناۋ، ءسۇتتى جەرگە توگىپ كەلە جاتقان بايدىڭ اقىلسىز قىز-كەلىندەرىن مازاقتاپ، قايران قور بولعان قىمىزعا شىعارعان «كوبىك شاشقان» اتتى كۇيىم، — دەپتى قۇرمانعازى.

---