InfoHub Logo

قورقىت ولىمگە بويۇسىنباي، اجالدان قۇتىلماقشى بولىپ، قاشىپ دۇنيە ءجۇزىن كەزەدى. قايسى جەرگە بارسا دا، الدىنان قازىلىپ جاتقان كور شىعا بەرەدى. اقىرى ولىمنەن قۇتىلماسىن بىلگەن قورقىت اتا سىرداريانىڭ اعىن سۋىنىڭ ۇستىنە كىلەم جايىپ جىبەرىپ، قارىنداسىن قاسىنا الىپ، سول كىلەمنىڭ ۇستىندە وتىرىپ ەلمەن، جەرىمەن، قارىنداسىمەن جانە ءوزىنىڭ ومىرىمەن قوشتاسقان زارلى كۇيلەرىن تارتادى. وزەن بويىندا وتىرعان ەلدەردىڭ قوبىزدىڭ زارلى داۋىسىن ەستىگەندەرى شىداپ تۇرا الماي، وزەننىڭ ەكى جاعالاۋىنا توپىلا جينالىپ، ەمىرەنە تىڭداسادى.

وزەن جاعالاۋىنان سىرتقارى تۇستىك جەردە وتىرعان كوشپەلى ەلدەردىڭ دە كەشقۇرىم قوبىز داۋسىن ەستىگەن قىرىق قىزدارى جاقىن جەردە شىعار دەپ قىزىققاننان جۇگىرە-جۇگىرە جەتە الماي، وتىز توعىز قىزدىڭ وكپەلەرى ءوشىپ، جولدا ولەدى. ولاردىڭ ىشىنەن جۇگىرە الماي جايىمەن جۇرگەن ءبىر اقساق قىز عانا سىردىڭ جاعاسىنا جەتىپ، قورقىتتى كورىپ ولەدى. سول اقساق قىزدىڭ مولاسى — قورقىت اتانىڭ قويىلعان جەرىنىڭ تۋرا سول توستىگىندە اراسى ءبىر شاقىرىمداعى جەردەگى شىڭنىڭ باسىنا ورناتىلعان مۇنارا. وسى كەزدە دە جۇرتتىڭ ءبارى ونى «اقساق قىزدىڭ بەلگىسى» دەپ اتايدى.

قورقىت اتانىڭ ۇستىندە وتىرىپ قوبىز تارتقان كىلەمىن سىردىڭ اعىسى يىنگە سوقتىرىپ توقتاتقان جەرىندە قازۋلى كور الدىندا دايىن ەكەن. ازىرەيىل جان العىش تا جەتىپ كەلەدى. سول ساتتە قورقىت تىلسىممەن ءوزىن كوبەيتىپ، قىرىق قورقىت ەتىپ كورسەتەدى. ولاردىڭ قايسىسى قورقىت ەكەنىن ايىرا الماي ساسقان «جان العىشقا» سول كەزدە قۇدىرەت پارمان ەتەدى: «قىرقىنىڭ قايسىسى بۇرىن كىرپىگىن قاقسا، سونىڭ جانىن ال! — دەيدى. جانى بار قورقىت كىرپىگىن قاققان كەزدە جانى الىنىپتى. سول جەردەگى دايىن كورىنە قورقىت اتا قويىلادى. وسىلاي دەپ بىلەتىن جۇرتتىڭ كوپشىلىگى وسى كەزگە شەيىن قورقىت اتانىڭ سول ورنىن قادىرلەپ، قۇرمەت تۇتادى.

---