InfoHub Logo

تاۋەلسىزدىكتىڭ قارلىعاشى سانالاتىن «زامان-قازاقستان» گازەتى-تۇركيا مەن قازاقستان اراسىنداعى اقپاراتتىق قۇرال كوزىنە اينالعان، ەكى ەل اراسىنا رۋحاني، مادەني كوپىر ورناتقان باسىلىم. گازەت وقىرماندارعا الەۋمەتتىك-ەكونوميكالىق، قوعامدىق-ساياسي اقپاراتتار ۇسىنادى. وسىدان جيىرما توعىز جىل الدىن ەكى الپاۋىت مەملەكەتتىڭ باسشىلارى وسىنداي يگى باستامانىڭ جۇزەگە اسقانى ءۇشىن ءبىر-بىرىن قۇتتىقتاپ، اق جارما تىلەكتەرىن جولداعان بولاتىن. «تۇركياداعى ءمان-جايدى جان-جاقتى تانىپ، قازاق جۇرتىنا جەتكىزە بىلسە، قازاقستاندا بولىپ جاتقان وڭ وزگەرىستەرمەن دەر كەزىندە ءبىزدى حاباردار ەتىپ وتىرسا، نۇر ۇستىنە نۇر دەپ بىلەر ەدىم. «زامان-قازاقستان» وسى ماقساتتى ۇستانار دەگەن بەرىك سەنىممەن ءساتتى قادام تىلەپ، قۋانا قۇتتىقتايمىن»،-دەپ سول كەزەڭدەگى ەل پرەزيدەنتى تۇرعىت ءوزال جۇرەكجاردى لەبىزىن بىلدىرگەن بولاتىن.

مىنە، سول ۋاقىتتان بەرى ارادان وتىزعا جۋىق جىل ءوتتى. از ۋاقىت بولسا دا گازەت ءوزىنىڭ داڭعىل جولىنان جاڭىلماي، ەكى ەل اراسىندا اقپاراتتىق بايلانىس ورناتا ءبىلدى. گازەتتىڭ العاشقى رەداكتورلىق قىزمەتىن ابىرويمەن اتقارىپ شىققان  قالتاي مۇحامەتجان باسىلىمنىڭ ەل اراسىنا كەڭ تارالىپ، حالىقتىڭ كوزايىمىنا  اينالۋىنا سۇبەلى ۇلەس قوستى. ۇلت مۇددەسىن العاشقى شەپكە قويعان حالىقارالىق باسىلىمدا ءقازىر جاڭا ايدارلار جارىق كورىپ، وقىرمان نازارىنا كوكەيكەستى ماسەلەلەردى ۇسىنىپ وتىر. سولاردىڭ ءبىرى-«اكىم بول، حالىققا جاقىن بول» ايدارى. وسىنىڭ ارقاسىندا قاراپايىم حالىق تاراپىناپ كەلگەن ساۋالدارعا جاۋاپ بەرە وتىرىپ، كۇرمەۋى شەشىلمەگەن تىڭ ماسەلەردىڭ شەشىمىن تابۋعا ىقپال ەتەدى.

گازەت 2017 جىلى ءوزىنىڭ 25 جىلدىق مەرەيتويىن تويلايدى. الايدا، ارادان ءبىر جىل وتە سالىسىمەن گازەتكە وزگەشە رەڭك كىرەدى، اتاۋىنا وزگەرىس ەنەدى. كوزى قاراقتى وقىرماننىڭ جۇرەك تۇكپىرىنەن ورىن العان «زامان-قازاقستان» ەندى «قازاقستان ءداۋىرى» اتتى جاڭا اتاۋعا يە بولادى. بۇگىندە بۇل باسىلىم «حالىقارالىق گازەت» دەگەن اتاۋىن جوعالتپاي، ۇدەدەن شىعىپ كەلەدى. اقپارات، ساياسات، رۋحانيات، قوعام، سالاۋاتتى ءومىر، سۇقبات سىندى بولىمدەرى ارقىلى گازەتكە جاڭا لەپ اكەلدى. گازەتتىڭ 9 ءساۋىر كۇنگى نومىرىندە قىزىلوردا قالاسى، وقۋشىلار مەن جاسوسپىرىمدەر ءۇيىنىڭ «جاس قالامگەر» ۇيىرمەسىنىڭ جەتەكشىسى انار كاراجانوۆا ەسىمدى وقىرماننىڭ «ۇلتتىق ونەر-اتا ءداستۇر مۇراسى» اتتى ماقالاسىندا سىر ەلىنىڭ شەبەرلەرىنىڭ ءمارت مىنەزى مەن ۇلت ونەرىنە دەگەن شىنايى ماحابباتىنا ءتانتى بولامىز. سونىمەن قاتار، گازەتتەن ءتىل جاناشىرلارىنىڭ ءبىرسىپىرا ماقالالارىنا كوزىمىز تۇسەدى. ەرتاي ايعالي ۇلىنىڭ 22 ءساۋىر كۇنى جارىق كورگەن ماقالاسىندا بۇگىنگى قازاق تەليەۆيزياسىنىڭ جاي-كۇيىنەن حاباردار بولامىز. وسىدان بىرنەشە جىلدار بۇرىن ەلىمىزدە جيىرما ءتورت ساعات بويى مەملەكەتتىك تىلدە اقپارات تاراتاتىن ارنالار جوقتىڭ قاسى ەدى. مۇنى كورشىلەس ەلدەر  ەستىگەندە جاعاسىن ۇستاپ، ەلىمىزگە ايانىشپەن قارايتىن. وسىعان قاراماستان ءبىراز ۋاقىتتان كەيىن «قازاقستان» ۇلتتىق ارناسى تاۋلىك بويىنا قازاق تىلىندە اقپارات تاراتا باستادى، سونىمەن ەلىمىزدەگى ەڭ ءىرى ارنا تازا قازاق تىلىنە كوشتى.  اۆتور ماقالانىڭ نەگىزگى ارقاۋى ەتىپ «بالاپان» تەلەارناسىن الادى. ءيا، بۇل ارنا بالالار  اراسىنا كەش كەلدى، ءبىراق بالالار اۋديتورياسىندا وسىنداي ارنانىڭ بولۋى كوڭىل قۋانتادى. ماقالانىڭ نەگىزگى ايتار ويى-بۇل ارنانىڭ ماقتاۋىن اسىرۋ ەمەس، كەرىسىنشە بالالاردى زەرىكتىرىپ الاتىن كەيبىر كەلەڭسىز تۇستارىن تالداۋ. قاراپايىم ومىردەگى ءوز ارەكەتتەرىمەن سالالاستىرا وتىرىپ، ارنانىڭ جالىقتىرارلىق كونتەنتى بار ەكەنىن اتاپ وتەدى. ماسەلەن، كىشكەنتاي كەيىپكەرلەر وزدەرىنىڭ ءىس-قيمىل، قوزعالىستارىمەن، شەبەرلىكتەرىمەن بالالاردى وزىنە تارتا بەرمەيدى. جاساندى كورىنىستەر كوبىرەك. «مۇنداي شالا جانسار دۇنيەلەر وتە كوپ. ءححى عاسىردا نەبىر زاماناۋي دۇنيەلەردى اكەلۋگە تەحنولوگيالىق مۇمكىندىكتەر زور عوي. نەگە سولاردى پايدالانبايمىز؟»،-دەپ ءوز وكىنىشىن بىلدىرەدى. راسىندا، ۇلت بولاشاعى وسى تەلەارنالاردا جاسالاتىنىن ەسكەرسەك، قازاق تەليەۆيزياسىنىڭ ءالى دە بولسىن اتتەگەن-اي دەيتىن تۇستارىن اڭعارامىز. اۆتور ءسوز سوڭىندا: «بۇلاق كورسەڭ، كوزىن اش» دەگەن حالقىمىزدىڭ تاماشا ءتامسىلى بار. ەندەشە ءبارىمىز جابىلىپ «بالاپاندى» كوركەيتەيىك، ونىڭ دەڭگەيىن وسىرۋگە، جەتىمدىك كورمەۋىنە بار كۇشىمىزدى سالايىق!»،-دەپ قورىتىندىلايدى.

مىنە، «زامان-قازاقستان» گازەتىنىڭ بۇگىنگى جاڭا تولقىنى وقىرمانعا وسىناۋ تاعىلىمى مەن وزەكتىلىگى ۇشتاسقان تىڭ اقپاراتتاردى ۇسىنىپ وتىر...

التىناي باۋىرجان قىزى

---