InfoHub Logo

استانا. 15 قاڭتار. مەملەكەت باسشىسى «قازاقستان رەسپۋبليكاسىنداعى كاسiپتiك جانە وزگە دە مەرەكەلەر تۋرالى» قازاقستان رەسپۋبليكاسى پرەزيدەنتiنiڭ 1998 جىلعى 20 قاڭتارداعى № 3827 جارلىعىنا وزگەرىس پەن تولىقتىرۋ ەنگىزۋ تۋرالى» جارلىققا قول قويدى. سوعان وراي 1 ناۋرىز – العىس ايتۋ، ال ءساۋىر ايىنىڭ ءبىرىنشى جەكسەنبىسى – گەولوگ كۇنى بولىپ جاريالاندى. بۇل تۋرالى اقوردانىڭ باسپا ءسوز قىزمەتىنە سىلتەمە جاساعان egemen.kz ءتىلشىسى حابارلادى.

ەلباسى 2015 جىلدىڭ ءساۋىر ايىندا قازاقستان حالقى اسسامبلەياسىنىڭ XXII سەسسياسىندا سويلەگەن سوزىندە: «ستاليندىك رەجىم كەزىندەگى ءار جىلداردا بۇتىندەي ءبىر حالىقتار – 800 مىڭعا جۋىق نەمىس، 102 مىڭ پولياك، 550 مىڭ سولتۇستىك كاۆكاز حالىقتارىنىڭ وكىلدەرى، 18،5 مىڭ قيىر شىعىستاعى كورەي وتباسىلارى قونىس اۋداردى. ولاردى ۆاگونداردان اشىق دالاعا اكەلىپ ءتۇسىردى. ول كەزدە مۇندا تەك قازاقتار عانا تۇراتىن. سوندىقتان قابىلداعان دا سولار بولدى. ءسويتىپ، وزدەرى مۇقتاجدىقتا ءومىر ءسۇرىپ جاتقان قازاق وتباسىلارى ولاردى وزدەرىنىڭ سامان ۇيلەرىندە قابىلدادى. ءبىزدىڭ وتباسىمىز دا ءۇش بالاسى بار ەرلى-زايىپتىلاردى قابىلدادى»، – دەگەن بولاتىن.

سونىمەن قاتار پرەزيدەنت: «قازاقستان حالقى اسسامبلەياسى قۇرىلعان كۇن – 1 ناۋرىزدى جىل سايىن بارلىق ەتنوستاردىڭ ءبىر بىرىنە جانە مەيىرباندىق تانىتىپ، ول ادامداردى ءوز تۋعانىنداي قابىلداعان قازاقتارعا العىس ايتۋ كۇنى رەتىندە اتاپ ءوتۋ ادىلەتتى بولار ەدى. ول كۇن ءبىزدى بۇرىنعىدان دا گورى جاقىنداستىرا تۇسپەك. بۇل كۇن مەيىرىمدىلىكتىڭ، بۇكىل قازاقستاندىقتاردىڭ ءبىر بىرىنە دەگەن دوستىعى مەن ماحابباتىنىڭ جارقىن مەرەكەسى بولا الار ەدى»، – دەدى.

وسىلايشا، بۇگىننەن باستاپ قازاقستان رەسپۋبليكاسىنداعى كاسiپتiك جانە وزگە دە مەرەكەلەر قاتارى تولىقتى.

دەرەك: اقوردانىڭ باسپا ءسوز قىزمەتى.