InfoHub Logo

اتىراۋ وبلىسى، يندەر اۋدانى ، بودەنە اۋىلىندا تۇراتىن كەڭەس سارسەنعالييەۆ بالالار اراسىندا «كىتاپحاناشى اعاي» اتانىپ كەتكەن. ول كىتاپحاناشىلىق قىزمەتكە كەلمەس بۇرىن بىرنەشە جۇمىس ورنىن اۋىستىرىپ ۇلگەرگەن دەپ جازادى اق جايىق باسىلىمى.

“باستاپقى جىلدارى اۋىلداعى مادەنيەت ۇيىندە جۇمىس ىستەدىم. كەيىن ديرەكتورى بولدىم. الايدا 1997 جىلى مادەنيەت ءۇيى جابىلىپ قالىپ، جۇمىسسىز قالدىم. ودان سوڭ اۋىلدىق وكرۋگتە باس مامان بولىپ ءۇش جىل جۇمىس جاسادىم، ءبىراق قىسقارتۋعا ۇشىراپ، تاعى جۇمىستان بوساپ قالدىم”، – دەيدى ول.

اۋىلدىق جەردە جۇمىستى تەك مەكتەپتەن، اكىمدىكتەن جانە امبۋلاتوريادان تابا الاسىڭ. جۇزدەگەن ادامنىڭ ىشىنەن ول جەرلەردەن جۇمىس تابۋ بىرەن-ساراننىڭ عانا ماڭدايىنا جازىلادى. مەيىربيكە بولىپ جۇمىس جاسايتىن جولداسىنىڭ ازعانتاي ايلىعى نەگە جەتسىن؟

كەڭەستىڭ باسقالارداي قالا كەزىپ، كاسىپ ىزدەۋگە مۇمكىندىگى بولمادى. سول سەبەپتى ازعانتاي مالىن باعىپ-قاعۋمەن اينالىستى. ال، 2011 جىلى كىتاپحاناشى جۇمىس ورنى پايدا بولىپ، ول كىتاپحاناعا جۇمىسقا ورنالاستى.

"كىتاپحاناشىنىڭ مىندەتى كىتاپ ۇلەستىرۋدەن تۇرمايدى. ول سول كىتاپقا ادامنىڭ قىزىعۋشىلىعىن وياتا ءبىلۋ كەرەك. 60-80ء-شى جىلدارى كىتاپتى تالاسا وقيتىن. ءقازىر بالا مەن ۇلكەننىڭ قولىندا پلانشەت، تەلەفون، كومپيۋتەر. بولماسا، ءۇندى، تۇرىك سەريالدارىن ۇزبەي كورەدى. بار كەرەگى مەن قىزىعىن سودان تابادى”، – دەيدى كەڭەس.

ول كەيدە كوركەم ادەبيەتتەردى ارقالاپ، اۋىل كەزىپ كەتەدى. زەينەتكەرلەرگە بارادى، كىتابىن ۇلەستىرەدى. وقىپ بولعان سوڭ جيناپ الادى، باسقاسىن اكەلەدى. اۋىل قوناقاسىندا جاڭا كەلگەن كىتاپتىڭ مازمۇنىن قىسقاشا اڭگىمەلەيدى. كىتاپحانادا باس قوسىپ، كىتاپتىڭ مازمۇنىن تالقىلايدى. قالاي ەتكەندە دە كىتاپقۇمارلار سانىن ارتتىرۋعا تىرىسۋدا.

بۇگىندە كىتاپحانا قورىندا 10 745 كىتاپ بار. ال وقىرماندار سانى 500ء-دىڭ ۇستىندە. جىلىنا 200-گە جۋىق جاڭا كىتاپ كەلەدى. ونىڭ ىشىندە كوركەم ادەبيەتتەن باستاپ پوەزيا، بالالار كىتابى بار.

"كىتاپ مۇلدەم ەشكىمدى قىزىقتىرمايدى دەپ ايتۋعا بولمايدى. ءبىزدىڭ جاستاعىلار ءالى كوركەم ادەبيەتتەن، كلاسسيكالىق شىعارمالاردى وقۋدان قول ۇزگەن جوق. وقىرماننىڭ جارتىسى مۇعالىمدەر مەن وقۋشىلار. اسىرەسە، باستاۋىش سىنىپ بالالارى ءجيى كەلەدى. مەنى سول قۋانتادى. ماسەلەن، 9-شى سىنىپ وقۋشىسى الما ايماشيەۆا ءبىر جىل ىشىندە 70-كە جۋىق كىتاپ وقىپ ۇلگەردى”، – دەيدى كىتاپحاناشى.

"راس، تەحنيكا تەز دامىپ كەلەدى، ءقازىر كەز كەلگەن كىتاپتى ينتەرنەتتەن تاۋىپ، تىڭداۋعا دا بولادى. ءبىراق مەن پاراقتاردى اۋدارىستىرىپ، ولاردىڭ سىبدىرىن ەستىگەندى ۇناتاتىن جانە كىتاپتىڭ ءيىسىن ساعىنىپ تۇراتىن ادامداردىڭ ءبارىبىر بولاتىنىنا سەنەمىن”، – دەيدى ول.

---