InfoHub Logo

سوڭعى جىلدارى مەكتەپتەردە ءمۇعالىم مەن وقۋشى اراسىنداعى كيكىلجىڭ كوبەيىپ كەتتى. كۇندەلىكتى جاڭالىقتان ەستيتىنىمىز «ءمۇعالىم وقۋشىعا قول كوتەردى»، «وقۋشى ۇستازىنا ءتىل تيگىزدى» دەگەن سارىنداعى حابارلار.

ۇستازعا دەگەن قۇرمەت جىلدان جىلعا تومەندەپ بارا جاتقانداي. وسىعان بايلانىستى «nur.kz» پورتالىنىڭ «ءمۇعالىم مەن شاكىرتتىڭ ءتىل تابىسۋىنا نە كەدەرگى؟» دەگەن ساۋالدىڭ جاۋابىن وقىرمان نازارىنا ۇسىنامىز.

تاياۋدا عانا اتىراۋدا مەكتەپ وقۋشىسىنا قول كوتەردى دەگەن تاربيە ءىسىنىڭ مەڭگەرۋشىسى لاۋازىمىنان تومەندەتىلگەن بولاتىن.

«قۇلاعى اۋىرىپ جۇرگەن قىزىمنىڭ مەكتەپ دالىزىندە باس كيىممەن جۇرگەنىن ۇناتپاعان ۇستاز بالامنىڭ باسىنان ۇردى، - دەگەن اتا-انا ءتيىستى ورىندارعا شاعىم تۇسىرگەن. ول وقۋشىعا قول كوتەرگەن ۇستاز جۇمىستان تۇبەگەيلى بوساتىلسىن دەگەن بولاتىن.

ال، اقتوبە قالاسىندا كەرىسىنشە ەلدىڭ كوزىنشە ءمۇعالىمىن بالاعاتتاپ، قوعامدىق ءتارتىپ بۇزعان وقۋشى 15 مىڭ تەڭگەگە جۋىق ايىپپۇل تولەيتىن بولدى.

وسى جىلدىڭ قازان ايىندا باتىس قازاقستان وبلىسىنا قاراستى قاراوبا اۋىلىنداعى مەكتەپتىڭ 10-سىنىپ وقۋشىسى العاشقى اسكەري دايىندىق ءپانى مۇعالىمىنەن تاياق جەپ، اۋرۋحانادان ءبىر-اق شىققانى ەستەرىڭىزدە بولار. وقۋشىسىنىڭ شابىنان تەۋىپ جىنىس مۇشەسىنە زاقىم كەلتىرگەن ءمۇعالىم بۇگىنگى تاڭدا قىزمەتىنەن كەتىپ تىندى.

6-سىنىپ وقۋشىسى ساباق ۇستىندە تارتىپسىزدىك تانىتىپ، قىتىعىنا تيە بەرگەن سوڭ شىمكەنتتىك 26 جاستاعى ۇستاز وعان دورەكىلىك تانىتىپ، جاعاسىنان العان. ارتىنشا ءمۇعالىم ءوز ەركىمەن جۇمىستان كەتكەن بولاتىن.

تىزە بەرسە، مۇنداي جايتتار جەتىپ ارتىلادى.

مۇعالىمدەر وقۋشىلارىن تىڭداتا الماي ما، الدە وقۋشىلاردىڭ مىنەزى بۇزىلدى ما؟

27 جىلدىق ەڭبەك ءوتىلى بار ساۋىربايەۆا ريزا ەسىمدى الماتىلىق ۇستازدىڭ جەتەكشىلىگىمەن وسى ۋاقىت ارالىعىندا ءتورت سىنىپ تۇلەپ ۇشقان ەكەن.

«ءوز باسىم - ءقازىر مەكتەپتە ەڭ بۇزىق دەگەن سىنىپتىڭ جەتەكشىسىمىن. بالالاردىڭ پسيحيكاسى دا زامانعا قاراي وزگەرگەنىن جاسىرمايمىن. ءقازىر مۇعالىمدەر مەن وقۋشىلاردىڭ اراسىندا تۇسىنىستىك جوق. ولار ءتارتىپ بۇزىپ، سوزگە قۇلاق اسپايتىن بالالاردى «سەن بۇزىقسىڭ»، «سەن اناۋسىڭ-مىناۋسىڭ» دەپ بالاعاتتاۋعا دەيىن بارىپ جاتادى. ءسويتىپ ولاردى وشىكتىرىپ الادى. ءدال سول مۇعالىممەن ەرەگەسەدى، سونىڭ ساباعىندا تىنىش وتىرمايدى. مەنىڭ كورىپ جۇرگەنىم وسى»، - دەيدى تاجىريبەلى ۇستاز.

ريزا اپاي الدىنا كەلگەن ءتارتىبى ناشار بالامەن جۇمىس ىستەۋ تاجىريبەسىمەن ءبولىستى.

«مەنىڭ الدىما كەلگەن ەڭ بۇزىق دەگەن بالالاردىڭ ءوزىن «سەن جاقسىسىڭ»، «سەنەن سونداي مىقتى بىرەۋ شىعادى»، «سەن بولاشاقتا جاقسى تۇلعا بولاسىڭ» دەپ قاناتتاندىرىپ قويامىن. «كەل، سەن بۇگىنگى ساباقتا بالالارعا باسشى بول، ولاردىڭ ءتارتىبىن قارا» دەپ كەيدە ولارعا سەنىم ارتىپ، ىنتالاندىرامىن. «سەن - ەسۋاسسىڭ»، «بۇزىقسىڭ» دەي بەرسەڭ، كەز كەلگەن بالانىڭ نامىسىنا تيەدى بۇل ءسوز. سوندىقتان ءمۇعالىم مەن وقۋشىنىڭ اراسىنداعى كيكىلجىڭنىڭ بولۋ-بولماۋى ەڭ ءبىرىنشى ۇستازعا بايلانىستى» - دەپ ويلايدى ريزا اپاي.

جاقسى ۇستاز «نادان» دەگەن بالادان سانالى بالانى قالىپتاستىرا الاتىنىنا سەنىمدى.

«مەنىڭ بيىلعى 9 سىنىپ وقۋشىلارىما جەتەكشىلىك ەتۋدەن بۇكىل مەكتەپ باس تارتقان. ولاردىڭ اراسىندا اتا-اناسىن تىڭدامايتىن بالالار دا بار. مەن ولاردى ايىپتاپ، ەشقانداي جەتىستىككە جەتە المايتىنىمدى ءبىلدىم. ونىڭ ورنىنا ولارعا «نەگە سەندەر جاماناتتى بولا بەرەسىڭدەر؟ وزدەرىڭدى كورسەتىڭدەرشى»، - دەدىم. ءقازىر، قۇدايعا شۇكىر، ولار مەكتەپ فورماسىن كيىپ، ساباقتان قالمايدى»، - دەيدى ۇستاز.

تاجىريبەلى ۇستاز مۇعالىمدەردىڭ قازىرگى بەدەلىنە قاتىستى ءوز پىكىرىن ءبىلدىردى.

«بىزدە ءقازىر بەدەل جوق. بالالارعا ءسال قولىمىزدىڭ ۇشىن تيگىزدىك پە، بالالاردىڭ وزدەرى ءبىزدى: «ءقازىر مامام كەلەدى، شاعىم جازادى»، - دەپ قورقىتادى. بالالار توبەلەستى مە - سىنىپ جەتەكشىسى سوگىس الادى، وقۋشى ساباققا كەلمەدى مە، ساندالىپ سونىڭ ۇيىنە بارىپ ساباققا كەلۋىن ءوتىنىپ، جالىنامىز. بىرەۋدى زورلاپ كەتسە دە ءمۇعالىم كىنالى، ءبىز ولاردىڭ جانىندا مايشام ۇستاپ تۇرعانداي... كوپتەگەن اتا-انالار بالالارىنا كوڭىل اۋدارۋعا ۋاقىت تاپپايدى. بالالارى مەكتەپكە كىردى مە، ءبىتتى. ءبىزدىڭ موينىمىزعا ارتىپ تاستاعان. ال بىردەڭە بولا قالسا، بىردەن مەكتەپكە جەتىپ كەلەدى. ءبىز كىنالى بولماساق تا اتا-انانىڭ الدىندا كەشىرىم سۇرايمىز»، - دەيدى ۇستاز.

ال اۋىل مەكتەبىندە 29 جىل بويى ماتەماتيكا پانىنەن ساباق بەرىپ كەلە جاتقان مايرابانۋ ەسجانوۆا قازىرگى وقۋشىلار مەن بۇرىنعى وقۋشىلاردىڭ اراسىنداعى ايىرماشىلىقتىڭ جەر مەن كوكتەي ەكەنىن ايتادى.

«ءبىز سەنگىش، يلانعىش بولدىق. بىزگە نە تاپسىرما بەرسە، سونى مۇلتىكسىز ورىندايتىنبىز. ارتىق ۇرىس ەستۋدەن قاشاتىنبىز. ۇرىس ەستىسەك، جانىمىزداعى بالالاردان ۇيات ەدى. قازىرگى بالالاردا نامىس جوق پا، ۇرىس ەستىپ جاتسا دا، ۇيرەنشىكتى سياقتى. بەرىلگەن تاپسىرمانى ورىنداماي كەلە سالادى. بارىنە توپىراق شاشپايمىن، ءىشىنارا جاۋاپتى بالالار بار»، - دەيدى ۇستاز.

مايرابانۋ اپاي جاس مامانداردىڭ ءتىلازار وقۋشىلارمەن دۇرىس جۇمىس ىستەي المايتىنىن العا تارتادى.

«ولار وزىنە ءسوز قايتارىپ، ءتىل المايتىن وقۋشىلارعا بالاعات سوزدەردى بايقاماي ايتىپ قالىپ جاتادى. ول ەتيكاعا جاتپايتىنى بەلگىلى. بۇل جاعدايدى ارينە، بالا ۇيىنە جەتكىزىپ بارادى. سودان جانجال باستالادى. مەنىڭشە، قازىرگى جاس ماماندارعا وقۋشىلارمەن تۇسىنىستىك تابا ءبىلۋ كەرەك. ولاردى قورقىتىپ، ايعايلاپ شوشىتۋدان ەشتەڭە شىقپايدى»، - دەيدى مايرابانۋ اپاي.

---